MATIU 27

Ram lai Jisas lawe Baelat

1Lolo robongi siaga ira muei rugurugu meire tamaragai nora sinobu doluegi ram sone bubugi, ve rain wehi vagamate Jisas wuraha. 2Ram vauhie ram vano meie, ram laie lawe i Baelat a Kavman.

A mateana noi Judas

3Siu i Judas, a tangaloi u rongo na leoi gai Jisas, mo leo ve rau vevegi vagamatea, nge mo ladowenigi, mo lai mulegi na homu ngavulu gaitolu a silva lawera muei rugurugu meire tamaragai taligu, 4mo veve vena, “Nau galegaleasi huri nau rongo na leoi gai tangaloi hi u vovohoi.” Ngere ram veve vena, “Hatie nomai lune. Ngehi a nomu sibomu.” 5I Judas mo tuli na homu sulolo vale gogona, ko mo sireginire; siu nge mo vano mo ligo vagamate sibona. 6Ira muei rugurugu ram vile na homu ram veve vena, “He tatarise tea mena Leo hora ve vin teure lo tanoi homu, a vevenagi a homu hi a gaivoli dai.” 7Ram lado bubugi huri ve rain voli na tano u waregi ve a Ute noi tangaloi mo vai na laha tano, ve rain tuleginire hala vano aie. 8Giniehi, ram waregi na tano hi ve a Sarasarai Dei, mo dadari gaqarigi. 9Mwerehi mo vagahorongi na leo noi God nge u vevea gina singoi Jeremaea a tangaloi veve rarai vena: “Ram lai na homu ngavulu gaitolu a silva, a gaivoli matei tangaloi, a sinobu a duvi Israel ram lado bubugi huri na gaivoline, 10ko ram voli na Ute noi tangaloi mo vai na laha tano ginire, mwere a Huqe u hora tau laweau.”

I Baelat mo hui Jisas

11I Jisas mo labe lo nagoi Kavman, ko a Kavman hi mo huie vena, “?Iniko i ratahigi nora ta Judia?” I Jisas mo duvi vena, “Iniko gom vevea mwerehi.” 12Nge ingeie he duvi tea gorora muei rugurugu meire tamaragai ram taweie. 13Siu i Baelat mo huie vena, “Go he rongo tea ve ram taweigo huri na gineu u sao?” 14Nge i Jisas he duvi goroe tea gena leo gatagale, ko a Kavman mo awogi garagara huri.

Ram vevegi Jisas huri mate

15Lo vataha taroi hinaga huri Halegagaliu i Bailat mo siregi na tangaloi vauveu gatagale lawera sinobu mwere ram tarani. 16Lo tarogi hi a tangaloi uebalu gatagale rau ilo vurugeginie mo toga, a henana i Jisas Barabas. 17Siu lune a sinobu ram sone bubugi, i Baelat mo huire vena, “?Ihine nem tarani ve nain siregi lawe gimiu, i Jisas Barabas sige i Jisas mo warea ve i Kraes? 18Huri nge u ilo ve rau lei i Jisas lawea lo garagarasi. 19Lune i Bailat mo toga lo tanoi togatoga vevegi, i gahorana mo hora na leona lawea vena: “Gon mese vai na gineu lawe na tangaloi vovohoi hi, a vevenagi lo boborea lolo bongi nam gagarasi liu hurie.” 20Nge ira muei rugurugu meire tamaragai ram dori na domire sinobu ve rain navuhi Bailat ve vin siregi Barabas lawera ko ve vin hora ve rain vei vagamate i Jisas. 21Siu i Baelat mo huire vena, “?Ihine deni garue ngaha nem tarani ve nain sireginie lawe gimiu?” Ram duvi vena, “!Barabas!” 22I Baelat mo veve lawera vena, “?Nge nem tarani ve nain vei na hava gineu lawe Jisas mo warea ve i Kraes?” Nere ram duvi vena, “Toto vehavehaginie!” 23Nge i Bailat mo huire vena, “?Huri hava gineu, u vei na hava gineu esi?” Ngere ram ulo siaga den tomue vena, “Toto vehavehaginie!” 24I Baelat mo leo huri ve vin he vai lei na hava gineu tea, nge bataha rain qalo, nge mo lai na wai, mo qaqaga ginie lo nagora sinobu, mo veve vena, “A mateana noi tangaloi ngaha vin he saka tea luku. Ngehi a nomiu sibomiu.” 25A sinobu doluegi ram duvi vena, “A gagarasi huri na nona mateana na saka lumei ko luire netumai. 26Siu i Bailat mo siregi Barabas lawera ko mo lai Jisas ve ran talie huri ve rain toto vehavehaginie.

Ira soldia ram sovu Jisas

27Ira soldia noi Baelat ram vano mei Jisas lolo ara mo waregi vena Braitorium, huri ve a valei Baelat, ko ram ware bubugi lawea na buri soldia doluegi. 28Ram tugu vohogi na luqei Jisas ko ram saru goroe gina luqe memea mwasara huri ve a luqara ratahigi, 29ko ram virigi na garo kau mo voragi na qatulibo, ko ram tarie lo qatune, ko ram tau na mavuro lo matuana; siu ram sisiqeu goroe, ram sovue vena, Io, garea, i Ratahigi nora ta Judia! 30Ko ram lodosie, ram lai na mavuro ram wehi na qatune ginie. 31Lune rau sovue beno, ram lai vohogi na luqe memea mwasara denie, ko ram saru goroe taligu gina luqana sibona. Siu ram laie vano ve ran toto vehavehaginie.

Ram toto vehavehagi Jisas lo gai saroutu

32Lune ram mwalue ram haqe na tangaloi gatagale ta Saerini a henana i Saemon. Ram laie ve vin weli na gai saroutu noi Jisas. 33Ram vonai sulo ute u waregi ve Kolkota, lo noda leo ve a, ‘Tanoi Vurugi Qetu.’ 34Ram bete na waen lawe Jisas rau rogea mena roboi betu gagarasi u waregi ve a kol. Nge mo sim leo, nge ingeie he tarani tea vena inue. 35Siu irahine ram toto vehavehaginie lo gai saroutu ram wahegi na luqana, ram vui hikehike ve ihine vin lei na hava mavusui luqe, 36ko ram toga hivo ram mavaginie. 37Ram tau lo ului qatune na reve gigilegi huri nona vai vagasile vena: “Ngehi i Jisas i Ratahigi nora ta Judia.” 38Ko mei Jisas ram toto vehavehagi na tangaloi uebalu gairue, gatagale lo matuana ko tuegi lo mawirine. 39Ingere ram dige utu, ram bulegi na qature, ram veve asiesigi Jisas vena: 40“Iniko hi goin ta1a vohogi na vale gogona ko goin vutue lo rani gaitolu, gon vagamwasoigo sibomu!” Tare ve iniko i Netui God, gon hivo dena gai saroutu!” 41Mwerehi vage, ira muei rugurugu meire huhui talo Leo hora noi Mosis ko ira tamaragai ram sovu Jisas, ram veve vena: 42“Nge u vagamwasoire wagineu, nge he vagamwasoie sibona tea lai! Ingeie i Ratahigi nora a duvi Israel, na hivo dena gai saroutu siserigi hi, ko dain ladohogo ginie. 43Nge u lado talui God. Siu God na vagamwasoie, tare ve mo taranie. Huri ngeie hi u veve vena, ‘Ineu i Netui God. 44Ko ira tangaloi uebalu hi rau toto vehavehaginire mei Jisas rom sawirie vage.

A mateana noi Jisas

45Lo matainaho tu vovohoi a dodo mo tango goro na vanue doluegi mo dadari aho gaitolu. 46Lategi lo aho gaitolu i Jisas mo ulo gina dilogi lawua vena, ?Eli, Eli, lema sabaktani? Lo noda leo ve, “?Noku God, noku God, huri hava gineu gu toa vohogi denieu?” 47Ngere lavasigi ram labe kakarani ram rongoe, ram veve vena, “Nge mo ware Elaeja!” 48Siu siserigi gatagale denire mo toa, mo lai na qasa, mo dudunie lolo waen gagasi, mo turuginie lo mavuro, mo sogaginie lawe Jisas ve vin sumue. 49Nge ingere lavasigi ram veve vena, “Mese be, da leo tare ve i Elaeja vin vonai huri ve vin vagamwasoie.” 50I Jisas mo ulo taligu gena dilogi lawua, siu mo mabusurigi. 51Ko leo, a turegi huri mataivale lo Sara Gogona mo madare lo vuhungegi mo dadari vuine. A ruru mo ruru, ko a vatu ram tawaga, 52a qaru ram waga, ko ira tangaloi gogona noi God rau mate tau tuei ram maraga. 53Ram mwalue dena qaru; ko lo tagui Jisas mo maraga, ingere ram ahu sulolo togagi venue gogona Jerusalem, ko a sinobu u sao ram lehire. 54I leogoro soldia vudolue mei ngaraha ram toga meie ram matagi Jisas, ram rongo na ruru ko ram lehi na gineu ngerehi mo vaire, ram matagu liu, ram veve vena, “A hogo, ingerehi i Netui God!” 55A vavine u sao ingere taiehi vage ram tu vagahao ram leo. Ngerehi rau huri Jisas den Kalili ko rau buluie. 56Meire i Meri ta Makdala ko i Meri ratahi Jemis ko i Josev, ko i ratahire netui Sebedi.

Ram tau Jisas lolo malangai mateana

57Mo kakarani revirevi a mwerai homu ta Arimatia, a henana Josev, mo vonai, ingeie a rorongtagi noi Jisas. 58Nge mo vano mo ahu lobei Baelat, mo navuhie huri na betui Jisas. Siu i Baelat mo hora ve rain lei na betune lawe Josev. 59I Josev mo lai na betune, mo luqesie gina gavu mwasara, 60mo mabue lolo nona malangai mateana garaqa u tei durue lolo vatu. Siu nge mo lulugi na vatu lawua goro na matai malanga, mo mwalue. 61I Meri ta Makdala ko i Meri ratahi Josev rom toga hivo aie, rom leo vovohoi na matai malanga.

Ram taure leogoro lo qaru

62Lo rani tuegi, ngehi a rani lo tagui Bongi Vaivagatai, ira muei rugurugu meire Varise ram sone bubugi mei Baelat, 63ram veve vena, “Huqe, gamai gam lado haqe huri ve a tangaloi ve a tangaloi kalikeli hi u veve lune u mwaso tau vena, ‘Lo tagui rani gaitolu nain maraga taligu.’ 64Giniehi, gon horara nomu tangaloi ve rain leogoro vurugegi na qaru vin dadari lo rani gaitoligi, huri vate vai ira nona rorongtagi rain vonai rain belu na betune, ko rain veve lawe na sinobu vena nge u maraga taligu dena mateana. Tare ve mwerehi, a kalikeli vagasigi vin esi vin liu den tomue.” 65I Baelat mo veve lawera vena, “Nen lai ira soldia lavasigi, nen vano, nen leogoro na qaru mwere gimiu neu iloe.” 66Siu ram mwalue ram gorogoro vurugegi na matai malanga, huri ve ram tau na gigilegi lo vatu ko ram tau na soldia ve rain leogoro.

Currently Selected:

MATIU 27: HNT

Highlight

Copy