MATIU 24

I Jisas mo laqa huri vin vei vohogi na Sara Gogona

1Lune i Jisas mo mwalue mo vano dena Sara Gogona, ira nona rorongtagi ram vonai lobena vena haharagi na vale ngerehi lo Sara Gogona lawea. 2Ingeie mo duvi lawera vena, “?Io, gimiu nem lehi na gineu ingere ngaha? A hogo, nam veve lawe gimiu vena, a vatu gatagale vin he toga tea lo ului vetu tuegi, nge rain sasarugi doluegi.”

A tauvui romasi

3Lune i Jisas mo toga lo Vusi Oliv, ira rorongtagi ram vonai lobena gahera, ram huie vena, “Gon serelue lawe gamai ve a gineu ngere ngaha vin vei tagaha, ko a hava gigilegi vin haharagi ve iniko goin vonai ko ve a ure vin rovo.” 4I Jisas mo duvi lawera vena: “Nen leo goro gimiu vaiteu ihine tea mo sine gimiu. 5A tangaloi u sao rain vonai lo henaku, rain veve vena, ‘Ineu hi i Kraes!’ ko rain sine na sinobu sao. 6Gimiu nein rongo huri na vuro ko a roroi vuro. Nen leo goro vaiteu nem romasi hurie. A gineu ingere ngaha rain he mese tea rain dadari tomue, nge a rovonagi hatie tau. 7Huri a sinobu vin qalo mena sinobu, ko a vanue mena vanue. A maro ko a ruru rain vonai lo vanue saosao. 8A gineu ingere naha doluegi ram mwere na tauvui gagarasi lo bavabava. 9“Ngere rain wiri bibi gimiu huri ve rain vei gagarasigi gimiu ko rain uevagamate gimiu. A tangaloi doluegi rain sebugi gimiu huri na henaku. 10U sao rain siregi na nora ladohogo lo taro hi; rain vui rono na leoi gara ko rain vui sebuginire. 11A tangaloi ligoligogi kalikeli u sao rain maraga ko rain sine na sinobu u sao. 12A gineu esi rain gagaburegi, ko giniehi, a tabetabe nora sinobu u sao vin gamwadidi. 13Nge ihine vin labe siaga vin dadari lo rovonagi vin mwaso. 14Ko vin toretore gina Roro Garea ngaha huri ve i God vin voragi nora Ratahigi dali na ure doluegi, huri na gigilegi lawera tangaloi doluegi - siu a rovonagi vin vonai.

A gineu vovonosi

15“Gimiu nein lehi na ‘Gineu Vovonosi mo vai mwasarugi’, ngehi a tangaloi veve rarai i Daniel u veve huri, vin labe lo ute gogona.” (Ihine mo vasogo nge na ilo vurugegi!) 16Lo tarogi hi ingere ram toga Judia ran toa sulo vusi. 17Ihine mo toga lo ului valena vin he hivo tea lolona vena lai na hava gineu. 18Ihine mo toga lo talu vin he mule tea lo valena vena lai na luqana. 19Nge hahagavi hurire vavine ram wali taqangi ko irahine ram vagahuhu lo bongi ngerehi! 20Nen tataro ve igimiu nein mese toa lolo taroi gamwadidi sige lo rani mangaana! 21A vevenagi lo tarogi hi a gagarasi vin lawua, hatie gagarasi mwerehi mosigei lo tauvui ure mo dadari hibagataha, ko vin he mwerehi tea taligu tetagaha. 22Nge God mo wiri utu na bongi ingere naha; ve mwerehi hatie, ihine vin he mwaso lai tea. Nge a vevenagi a sinobu i God u leowahera, nge u wiri utu na bongi ingere ngaha. 23“Lo tarogi ngehi, tare ve ihine vin veve lawe gimiu vena, ‘Leo, hingaha i Kraes!’ sige ‘Ingeie hi!’ nen he ladohogo te ginie. 24Huri ira Kraes kalikeli ko ira tangaloi veve rarai kalikeli rain maraga; rain vei na gigilegi lalawua ko a vaigivui huri ve ran sinara leowahe noi God, tare mo lai. 25Nen leo, ineu nau veve beno na gineu ingere ngaha lawe gimiu gitomue. 26“Sige tare ve a sinobu rain veve lawe gimiu vena, ‘Leo, Ingeie lo vanue vurogi!’ nen he vano te aie; sige rain veve vena, ‘Leo, Ingeie mo hili tahi!’ nen he ladohogo te ginie. 27Huri i Netui Tangaloi vin vonai mwere na vile mo vile utuhi na mahava doluegi dena matainaho kalo mo dadari lo matainaho roro. 28“Vin mwere na manu hi ram gani na matei gineu. Lune a matei gineu mo taqao ingere ram sone bulutegi aiehi.

A vonaiana noi Netui Tangaloi

29“Siserigi lo tagui gagarasi lo bongi ngerehi a aho vin dodo ko a vule vin he leleo tea, ko a visiu rain soi dena mahava, ko a managi talo mahava rain gilu lategi den tanora. 30Ko lo tarogi ngehi a gigilegi noi Netui Tangaloi vin serelue lo mahava; ko a duvi sinobu doluegi lolo ure rain tengi, ko rain lehi i Netui Tangaloi vin vonai lo dodo lolo mahava mena managi ko a varavara lawua. 31Siu nge vin hora ira nona engsel mena diloi tavue ko rain vile ira nona leowahe dali na ureure.

A gato tavalu huri na vui duledule

32“Nen hikehike lo gato tavalu huri na vui duledule. Lune a rangana mo tauvuigi mo mwaukeuke, ko mo tavutevu, nem ilo ve a mwagoto mo kakarani. 33Mwerehi vage, lune nem lehi na gineu ingere ngaha doluegi ram vonai, nein ilo ve a tarogi mo kakarani vonai lo mataivale. 34A hogo, nam veve lawe gimiu vena, a tangaloi ram mwaso siseri ngaha ran he mate tea doluegi vin dadari a gineu doluegi naha rain vonai. 35A mahava ko a tano roin rovo, nge noku leo vin he rovo lai tea.

Ihine he ilo tea na tarogi hi

36“Nge huri na bongi ngehi sige a mahoi reni ngehi ihine he ilo tea, hatie ira engsel ta eulu, hatie i Netui, nge i Mama hogosie. 37Huri mwere u vei lo taroi Noa, mwerehi vage vin vei lo tarogi i Netui Tangaloi vin vonai. 38Huri lo taro tomue a wai u horo goro na vanue, rau gagani, rau inuinu, rau legi, u dadari lo tarogi Noa mo kalo lolo aka; 39nge rahe ilo na hava gineu tea, u dadari a wai u horo goro na vanue ko mo wali vohoginire doluegi. Vin vei mwerehi lo tarogi i Netui Tangaloi vin vonai. 40Lo tarogi hi a tangaloi gairue roin tabana lolo talu; vin leie tuegi, tuegi vin tino. 41A vavine gairue roin vei na hinaga bubugi; vin leie tuegi, tuegi vin tino. 42Siu nen leo huri, a vevenagi ne he ilo tea a tarogi a nomiu Huqe vin vonai lolona. 43Nge ne ilo vurugegi ngaha, tare ve a huqei vale u ilo na hava taro lolo bongi huri ve a tangaloi belu vin vonai lolo valena, nge vin leo goro na tangaloi belu hi ve vin mese waga na valena. 44Giniehi, gimiu vage nen toga rarai, a vevenagi i Netui Tangaloi vin vonai lo tarogi gimiu nge he lado rarai tea.

A tangaloi tabanagi a hui garea sige a hui wiri

45“?Ihine hi a tangaloi tabanagi a hui garea ko u mataisao? Ingeie hi a huqei vale mo taue mo leogorora tangaloi tabanagi doluegi talo valena, ve vin bete na gara hinaga lawera lo tarogi vovohoi. 46Havuhevu mena tangaloi tabanagi hi nona huqe vin haqea mo vai mwerehi lune nge vin mule vonai teligu lo valena! 47A hogo, nam veve lawe gimiu vena, nona huqe vin teue vin leogoro vataha na nona lalaie doluegi. 48Nge a tangaloi tabanagi hi a hui wiri vin lado lolo domine sibona vena, ‘Noku huqe vin he vonai tea vena siseri,’ 49ko nge mo tau vuigi mo wehire tangaloi tabanagi lavasigi, mo gagani mo inuinu meire tangaloi ram inu dadavule. 50Siu nona huqe vin mule vonai teligu lo tarogi nge he lado rarai tea ko lo mahoi reni ne he ilo tea; 51a huqe vin tei vurivurie, vin teue vin vano meire kali goro. Aiehi vin tangi ko vin gasigesigi livona.

Currently Selected:

MATIU 24: HNT

Highlight

Copy