MATIU 25

A gato tavalu huri na taqalugu hangavulu

1“Lo tarogi hi a mwasoana garaqa God mo ratahigi lolona vin mwere na taqalugu hangavulu ingere ram wali nora laeti ko ingere ram vano ve rain bulu mei lagi lune nge vin mule taligu lo valena. 2Gailime denire rau dalodaloga ko gailime rau mataisao. 3Ngerehi rau dalodaloga ram lai na nora laeti nge rahe lai na mahoi waigi tea meire, 4nge ngerehi rau mataisao rau lei rarai ne nora waigi vage mena nora laeti. 5I lagi he vonai tea vena siseri, siu a taqalugu hi matara ram huegi ko ram maturu. 6“Lolo livugata a tangaloi mo waregi vena, ‘I lagi nge ngaha! Nen vonai nen bulu meie!’ 7A taqalugu hangavulu hi ram maraga ko ram vagatai nora bulu. 8Siu ngerehi rau dalodaloga ram veve lawera hi rau mataisao vena, ‘Nen bete tea nomiu wai lawe gamai, huri a nomai bulu rau mate.’ 9Nge ira mataisao ram duvi vena, ‘Hatie, vate vai mo he tatarise tea mei gide vunu. Nen vano lo valei volivoli ko nen voli nomiu sibomiu.’ 10Lune ira taqalugu dalodaloga ram vano ve rain voli nora waigi, i lagi mo dadari. A taqalugu gailime hi rau vagatai ram ahu bubugi meie huri hinagai legie, ko a matai vale mo gorogoro. 11“Lo tagugi hi a taqalugu lavasigi hi ram dadari, ram veve vena, ‘Huqe! Huqe! Gon roa lawe gamai!’ 12I lagi mo duvi lawera vena, ‘A hogo, nam veve lawe gimiu vena, na he ilo gimiu tea.’ ” 13Ko i Jisas mo veve vagasigi vena, “Nen leo huri, huri nehe ilo na tarogi tea sige a mahoi reni.

A gato tavalu huri na tangaloi tabanagi gaitolu

14“U mwere na tangaloi mo siregi na vanuana ko mo vano vagahao: mo ware na nona tangaloi tabanagi ko mo taure ve rain leogoro na nona lalaie. 15Mo bete vatahaginire mo huri na nora mataisao: lawea gatagale a vatu teri vagalime, lawea tuegi a vatu teri vagarue, lawea gaitoligi a vatu teri vagatagale. Siu mo dige. 16A tangaloi hi u bete lawea a vatu teri vagalime mo vano mo tabana lune, mo haqe na vatu teri vagalime vage. 17Mwerehi vage a tangaloi tuegi hi u bete lawea a vatu teri vagarue mo tabana lune, mo haqe na vatu teri vagarue vage. 18Nge a tangaloi gaitoligi hi u bete lawea a vatu vagatagale mo vano me geli na walu lolo tano mo tulegi vunigi na homu noi nona huqe. 19“Lo tagugi hi u ribi beno a huqe nora tangaloi tabanagi ngaha mo mule mo dadari taligu ko mo vovohoigi na bugui homu ngaha u bete lawera. 20A tangaloi tabanagi naha u bete lawea teri vagalime mo vonai mo bete lawe na huqe lo ulugi a vatu teri vagalime vage, mo veve vena, ‘Huqe, gu bete laweau a vatu teri vagalime. Leo! Nge ngaha a semsemegi a vatu teri vagalime vage nau haqea.’ 21A huqe mo veve lawea vena, ‘U garea liu, iniko a tangaloi tabanagi a hui garea. Gu hui garea lo gineu biti, nge nain teugo goin voragi leogoroi gineu lawua. Gon vonai, gon havuhevu bubugi meieu.’ 22Siu a tangaloi tabanagi hi u bete lawea teri vagarue mo vonai ko mo veve vena, ‘Huqe, gu bete laweau a vatu teri vagarue. Leo! Nge ngaha a semsemegi a vatu teri vagarue vage nau haqea.’ 23A huqe mo veve lawea vena, ‘U garea liu, iniko a tangaloi tabanagi a hui garea. Gu hui garea lo gineu biti, nge nain teugo goin voragi leogoroi gineu lawua. Gon vonai, gon havuhevu bubugi meieu.’ 24Siu a tangaloi tabanagi hi u bete lawea a vatu teri vagatagale mo vonai mo veve vena, ‘Huqe, nau ilo ve a domimu u huire: huri gom lai na mwasigi hi iniko gohe rivu tea, ko gom vile bubugi na hinaga hi iniko gohe gaburegi na toligi tea. 25Ineu nam matagu, tau nam vano nam vunigi na nomu homu lolo tano. Leo! Nge ngaha hi a nomu.’ 26Nge a nona huqe mo duvi goroe vena, ‘Iniko a tangaloi tabanagi gu esi ko gu hui wiri! Gu iloau huri nam lai na mwasigi na he rivu tea, ko nam vile bubugi na hinaga na he gaburegi na toligi tea. 27Ve gu teu na noku homu lolo bangki, sevai u garea, ko nain leie mena semsemegi lune nain mule. 28Giniehi, nen lai vohogi na homu denie ko nen bete lawea hi a nona vatu teri vaga hangavulu. 29Huri ihine mo lai, vin bete lawea vage, ko nge vin lei nona u liuliu vage; ko ihine he lai tea, vin lei vohogi nona lalaie denie. 30Nge a tangaloi tabanagi hi a huri wiri, nen tuli vohoginie lolo dodogi varea; vin tangi ko vin gasigesigi livona aie.’

A vevegi vagasigi

31“Lune i Netui Tangaloi vin vonai lo tanoi ratahigi, ko ira engsel doluegi meie, vin toga lo tanoi togatoga ratahigi, 32ko a sinobu talolo ure doluegi rain sone bubugi lobena. Siu nge vin vile wahera talo burigi gairue, mwere na leogoro sibsib mo vile wahe na sibsib dena nani: 33vin teu na sibsib lo matuana ko a nani lo mawirine. 34Siu a ratahigi vin veve lawe na sinobu lo matuana vena: ‘Igimiu i Tamaku u vei gareagi gimiu: nen vonai, nen lai na nomiu tantano lolo mwasoana garaqa ngehi u vagatai beno huri gimiu lo tarogi hi u teu vuigi na ure. 35Huri nau mwaruruhi ko neu vanganieu, nau madogu ko neu bete wai bete wai laweau, ineu a hala ko neu lei vurugegieu lo valemiu, 36a luqeku he tatarise tea ko neu luqegieu, nau sege ko neu leo hurieu, nau toga lolo valei vauveu ko neu siroau.’ 37Ira vovohoi rain duvi goroe vena: ‘?Huqe, lo taro hilogo hi gau lehigo gu mwaruruhi ko gau vanganigo, sige gu madogu ko gau bete wai lawego? 38?Lo taro hilogo hi gau lehigo a hala ko gau lei vurugeginigo lo valemai, sige a luqemu he tatarise tea ko gau luqeginigo? 39?Lo taro hilogo hi gau lehigo gu sege sige gu toga lolo valei vauveu ko gau sirogo?’ 40Siu a ratahigi vin duvi gorora vena, ‘A hogo, nam veve lawe gimiu vena, lune neu vei mwere ngaha lawe tueku tea gatagale u biti vohogi, ngehi neu veie laweau.’ 41“Siu nge vin veve lawera hi ram toga lo mawirine vena, ‘Nen vano denieu, gimiu hi a lologagasi noi God u toga lumiu beno! Nen vano lolo avi redu ngehi u vagatai beno huri i Vui esi meire nona engsel! 42Huri nau mwaruruhi nge ne he vanganieu tea, nau madogu nge ne he bete te wai laweau, 43ineu a hala nge ne he lai te vurugegieu lo valemiu, a luqeku he tatarise tea, nge ne he luqegieu tea, nau sege sige nau toga lolo valei vauveu nge ne he leo hurieu tea.’ 44Siu rain duvi goroe vena, ‘?Ratahigi, lo tarogi hilogo hi gau lehigo gu mwaruruhi, sige madogu, sige a hala, sige a luqemu he tatarise tea, sige gu sege, sige gu toga lolo valei vauveu, ko gahe buluigo tea?’ 45Siu a ratahigi vin duvi gorora vena, ‘A hogo, nam veve lawe gimiu vena, lune nge he vai mwere ngaha tea lawe tueku tea gatagale u biti vohogi, ngehi ne he veie tea laweau.’ 46Tau ngerehi nge vin hora vohoginire talolo gagarasi redu, nge ira vovohoi rain vano lolo mwasoana radu.”

Currently Selected:

MATIU 25: HNT

Highlight

Copy