LUK 6
6
A leo huhui huri na Rani Mangaana
1Lo Rani Mangaana gatagale i Jisas mo dige lolo talui kon meire nona rorongtagi, ram tauvuigi ram due na kon ram vuvuri na mwasigi talo qaqai limara ko ram ganie. 2Ko ira Varise lavasigi ram veve vena, “?Huri hava gineu gimiu nem vai na gineu hi a Leo hora noi Mosis u gato goro lo Rani Mangaana?”
3I Jisas mo duvi gorora vena, “?Wa igimiu nehe value tea huri na gineu i Devet u veie lune ingeie mena nona tangaloi ram mwaruruhi? 4Nge mo ahu vano lolo valei God, mo lai na bereti hi rau hogoginie lawe God, mo ganie, ko mo bete lawera nona tangaloi vage. Mo hure na Leo hora noi Mosis, ve ira rugurugu hogosie rain geni lei na bereti ngaha.
5Ko i Jisas mo tarihougi vena, “I Netui Tangaloi ingeie a Huqegi goro na Rani Mangaana.”
A tangaloi a limana u koru
6Lo Rani Mangaana tuegi i Jisas mo vano lolo valei soneana ko mo huhui. A tangaloi gatagale aie a limana lo matuana u koru. 7Ira huhui lavasigi talo Leo hora noi Mosis ko ira Varise ram tarani ve ran tawei Jisas; giniehi, ram matabibie huri ve vin vagamwasoie lo Rani Mangaana. 8I Jisas mo ilo na nora domiana ko mo veve lawe na tangaloi a limana u koru vena, “Gon maraga, gon labe lo livuge.” A tangaloi hi mo maraga, mo labe aiehi. 9Siu i Jisas mo veve lawera vena, “Nam hui gimiu: ?Noda Leo hora u siregi lawe gide ve dai vei vahavagi lo Rani Mangaana? ?Ve dai veivei garea sige dai vei asiesigi? ?Ve dai vei vagamwasoi na tangaloi sige dai vei vagamatea? 10I Jisas mo leo vatahaginire doluegi, siu mo veve lawe na tangaloi hi vena, “Gon vugeri tovoragi na limemu.” Nge mo vai mwerehi ko a limana mo garea taligu.
11Siu ingere ram lologagasi garagara ko ram tauvuigi ram laqalaqa ginire ve ingere ran vei wuraha lawe Jisas.
I Jisas mo leowahe na nona gaihora hangavulu domwagi gairue
12Lo tarogi hi i Jisas mo hage lo vusi huri tataro, ko mo tataro lawe God vava mo rani. 13Lolo robongi nge mo ware ira nona rorongtagi vomai lobena ko nge mo leowahera hangavulu domwagi gairue denire, mo suri na henara gaihora: 14I Saemon (nge mo suri na henana vage i Bita) ko i tuana Andru; i Jemis ko i Jon, i Vilib ko i Batolomiu, 15i Matiu ko i Tomas, i Jemis tamana Alvius, ko i Saemon (mo ware ve i Garohuri), 16i Judas tamana Jemis, ko i Judas Iskariot ngehi u rongo na leoi gai Jisas.
I Jisas mo huhui ko mo vagamwasoi
17Lune i Jisas meire nona rorongtagi ram himei dena vusi ko i Jisas mo labe lo ute tavola meire buri nona rorongtagi u lawua. A buri sinobu lawua ingere aie vage rau vomai dena Judia, ko Jerusalem, ko dena togagi venue Taea ko Saedon, a vanue gairue hi lo tahi; 18ram vomai ve ran rongo na nona leo ko ve ran mwaso dena gara segeana? ?Ngerehi a vui esi ram vaire ram vomai lobena, ram mwaso vage. 19A sinobu doluegi ram vai leo ve ran sikelie, huri na managi mo mwalue denie ko mo vaire doluegi ram mwaso.
A havuhevu ko a hahagavi
20I Jisas mo lehire nona rorongtagi mo veve vena,
“!Havuhevu mei gimiu nem mahogi;
huri nomiu a mwasoana garaqa God
mo ratahigi lolona!
21!Havuhevu mei gimiu nem
mwaruruhi siseri ngaha;
huri gimiu nein guqe!
!Havuhevu mei gimiu nem
tangi siseri ngaha;
huri gimiu nein mana!”
22“!Havuhevu mei gimiu lune a tangaloi ram leomasi gimiu, ko ram taha vohogi gimiu, ko ram hurei gimiu, ko ram veve vena gimiu neu esi, huri i Netui Tangaloi! 23Nen havuhevu lune ram vai lawe gimiu mwerehi, ko nen wetu gina rong garea, huri a gaitawe lawua mo eno rarai gimiu lo eulu. Huri retubure rau vei mwerehi lawera tangaloi ligoligogi.”
24“!Nge hahagavi huri gimiu hi
nem ratahigi siseri ngaha;
huri u vei mesurigi
na mwasoamiu beno!
25!Hahagavi huri gimiu hi
nem guqe siseri ngaha;
huri nein mweruruhi!
!Hahagavi huri gimiu hi
nem mana siseri ngaha;
huri gimiu nein hahagavi ko nein tangi!”
26Hahagavi huri gimiu lune a tangaloi ram garigi gimiu; huri retubure rau laqa mwerehi lawera tangaloi veve rarai kalikeli.
A tabetabe huri tavului vuro
27“Nge nam veve lawe gimiu hi nem rongoau vena: nen tabe ira nomiu tavului vuro, ko nen vai garea lawe rahine hi ram leomasi gimiu, 28nen veve gareagi rahine ram veve asiesigi gimiu, ko nen tataro hurire ram vaivei gimiu. 29Tare ve ihine mo rabago lo balahemu tavulugi, gon siregi lawea ve na rabago lo tavulugi vage; tare ve ihine mo lai na gavumu, gon siregi lawea na luqemu vage. 30Gon bete lawe hine mo navu na gineu denigo, ko lune ihine mo lai na nomu gineu, mese hui huri teligu. 31Vataha gineu nem tarani ve a tangaloi rain vei lawe gimiu, nen vai nomiu mwerehi lawera vage.
32“?Tare ve nem tabe irahine hogosie ram tabe gimiu, God vin vevegareagi gimiu huri hava gineu? Huri ira galegaleasi ram tabe na tangaloi hi ram tabera. 33?Ko tare ve nem vai garea lawe rahine hi hogosie ram vai garea lawe gimiu, God vin vevegareagi gimiu huri hava gineu? Huri ira galegaleasi ram vai mwerehi vage! 34?Ko tare ve nem siregi na gineu lawera hi hogosie nem lado rarai huri ve ran bete taligu, God vin vevegareagi gimiu huri hava gineu? Huri ira galegaleasi ram siregi na gineu lawera galegaleasi, huri ve ran lai taligu a tovogi u tatarise! 35Hatie! Nen tabe ira nomiu tavului vuro ko nen vai garea lawera. Lune nem siregi na gineu, nen mese lado rarai huri taligu. Huri gimiu nein lei na gaitawe lawua, ko nein voragi ira netui God hageliu. Huri nge u garea meire hi rahe tabea tea ko meire hi rau esi. 36Nen hahagavi, mwere i Tamamiu nge u hahagavi.
Mese vevegi
37“Nen mese vevegi ra hine wagineu, huri God vin he vevegi gimiu tea. Nen mese veve asiesigi hine tea, huri God vin he veve asiesigi gimiu tea. Nen ladovohogi na bugui hine wagineu, huri God vin ladovohogi na bugumiu. 38Nen bete lawe na tangaloi wagineu, huri God vin bete lawe gimiu. Siu vin hogoni na nomiu gete, rain horo madiridiri ko rain rurungudu, ve nein he hako laire tea. Mwere nem tovo lawe na tangaloi wagineu, God vin tovo taligu lawe gimiu mwerehi.”
A doridorimiu vin vovohoi vurugegi
39I Jisas mo gato tavalu lawera, mo veve vena, “A tangaloi a matana u dodo vin he tomuegi lei tea na matadodo tuegi vage. Tare ve vin vei mwerehi, roin soi vugerue lolo walu. 40A rorongtagi he hageliu na nona huhui tea. Nge lune a rorongtagi hi vin rovo lo nona hikehike, nge vin mwerei na nona huhui.
41“?Huri hava gineu gom lehi na mavusui gei lolo matai tuemu, nge go he lado na welehi tea lolo matamu sibomu? 42?Huri hava gineu gom veve lawe i tuemu vena, ‘Siregi laweau nan lai vohogi na mavusui gei dena matamu,’ nge go he lehi na welehi tea lolo matamu sibomu? I kaligoro! Gitomue gon lai vohogi na welehi dena matamu sibomu, siu goin leo vurugegi ve gon lai vohogi na mavusui gei dena matai tuemu.
A gai ko a mwasine
43“A gai garea vin he wai na mwasigi tea u esi, ko a gai esi vin he wai na mwasigi tea u garea. 44Nein ilo vurugegi na gai lo mwasigi. Ingeie he bitu na mwasi duledule tea dena garo kau, sige a mwasi duele tea dena moli gehu. 45A tangaloi garea mo lai lue dena nona lalaie garea lolo lolona a gineu garea, ko a tangaloi esi mo lai lue dena nona lalaie esi a gineu esi. Huri a wuwana mo serelue na gineu teri a taqangine u horo ginie.
A tangaloi hako vale gairue
46“?Huri hava gineu nem wareau vena, ‘Huqe, Huqe,’ Ko ne he vai na gineu tea hi nau vevea lawe gimiu? 47Vataha hine mo vomai lobeku mo rongo na noku leo ko mo hurire, nge nain haharagi lawe gimiu ve nge u mwere na hava tangaloi. 48Nge u mwere na tangaloi mo hakovi na valena. Mo geli na walu bue ko mo tau na tutunagi lo vatu. Siu a wai mo hale mo hugi sulo vale hi nge he gilu tea, a vevenagi huri a vale hi u siaga. 49Nge ihine mo rongo na noku leo, siu he hurire tea, nge u mwere na tangaloi mo hakovi na valena lo tano madamada hogosie, hate tutunagi lune. Siu a wai mo hale mo hugi sulo vale hi, ko mo soi siserigi. Ko mo tuli talatalae!”
Currently Selected:
LUK 6: HNT
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific, 2013
