LUK 15

A sibsib mo sala

1Lo mahogi gatagale ira tangaloi vilevile takis meire tangaloi galegaleasi ram vomai ve ran rorongtagi Jisas. 2Ira Varise ko ira huhui talo Leo hora noi Mosis ram tauvuigi ram lologagasi, ram veve vena, “A tangaloi ngaha mo lai vurugegi ira galegaleasi ko mo gagani bubugi meire.” 3Siu i Jisas mo veve na gato tavalu ngaha lawera vena:

4“?Tare ve gatagale den gimiu a bulana sibsib vudolue ko gatagale denire mo sala, nge vin vei mwerehilogo? Nge vin sireginire ngavulu gaisiwo domwagi gaisiwo lolo ara ko vin vano vin hikesie hi u sala vin dadari lune vin haqea. 5Lune nge mo haqea mo havuhevu, mo taue lo siqana, 6mo walie mo mule ko mo ware bubugi ira nona buluana ko ira tagivenuana, mo veve lawera vena, ‘Nen havuhevu meieu, huri nau haqe na buleku sibsib hi u sala.’ 7Mwerehi vage, nam veve lawe gimiu vena, a havuhevu liu lo eulu huri na tangaloi galegaleasi gatagale mo ladowenigi denire sinobu ngavulu gaisiwo domwagi gaisiwo hi rau vovohoi, ra he tarani na ladowenigi tea.

A mane u sala

8“?Sige tare ve a vavine a nona vatu vudolue nge a vatu hangavulu denire mo sala, nge vin vei mwerehilogo? Nge vin bule na leleo ko vin kiri na valena, vin hike vurugeginie, vin dadari lune vin haqea. 9Lune nge mo haqea mo ware bubugi ira nona buluana ko ira tagivenuana, mo veve lawera vena, ‘Nen havuhevu meieu, huri nau haqe na noku mane hi u sala. 10Mwerehi vage, nam veve lawe gimiu vena, ira engsel noi God ram havuhevu huri na tangaloi galegaleasi gatagale mo ladowenigi.”

A tangaloi netune u sala

11I Jisas mo veve vage vena, “A tangaloi gatagale i netune gairue. 12A tahigi mo veve lawe tamana vena, ‘Mama, gon bete laweau siseri ngaha na duvi nomu hako gineu ngehi nain lei houginie lune goin mate.’ Siu i tamara mo bete wahe na nona hako gineu lawe re netune gairue. 13Lo tagui rani gaivihe goro a tahigi hi mo sogagi vohogi na nona duvi nona vivilakogi ko mo vano lo vanue vagahao mena manegi. Aiehi mo hako vievieragi na nona mane lo matahala rau esi. 14Lune a nona hako gineu u rovo, a maro lawua mo vomai lo vanue hi, ko nge mo tauvuigi mo mahogi. 15Siu mo vano mo tabana lawe na tangaloi gatagale talo vanue hi, a tangaloi hi mo horae mo vangani na bulana boe. 16Nge mo mwaruruhi liu, mo domi vena, ‘Ve mwerehi na gani lei na tagurui hinaga a boe ram ganie nase vai u garea liu.’ Nge a tangaloi gatagale he bete na gineu tea vohogi lawea ve na ganie. 17Lo tagugi hi, mo lado dori, a domine mo garea taligu, mo veve vena, ‘A hinaga gai ira tangaloi tabanagi noi tamaku ram gani mo tatarise siu mo eno tau. Nge ineu nam toga tangaha nam mate huri geku. 18Nain maraga nain mule taligu lobei tamaku, nain veve lawea vena, Mama, nau galegaleasi lo nagoi God ko lo nagomu vage. 19Nahe tatarise tea ve goin wareau gi netumu. Nge gon teueu nai voragi nomu tangaloi tabanagi.’ 20Siu mo maraga mo mule taligu lobei tamana.

“Lune mo vomai vagahao tau mosigei, i tamana mo lehie.

A lolona mo hahagavi liu, ko mo tao, mo rago bibie ko mo sungunie. 21Nge mo veve lawe tamana vena, ‘Mama, nau galegaleasi lo nagoi God ko lo nagomu vage. Na he tatarise tea ve goin wareau gi netumu.’ 22Nge i tamana mo ware na nona tangaloi tabanagi, mo veve vena, ‘Siseri! Nen lai na luqe garea ko nen saru goroe ginie. Nen tau na ringi lo bisune ko a butu ko karune. 23Nen wehi na natui bulugi u damoe ko igide da gagani ladotaligu hurie. 24Huri netuku ngaha u mate, ingeie mo mwaso taligu, u sala, nge ineu nam haqea taligu.’ Ko a gaganie mo tauvuigi.

25“Nge lo tarogi hi a togagi nge tau mosigei lolo talu. Lune nge mo mule, nge mo kakarani lo vale, nge mo rongo na diloi bue ko a hawana. 26Nge mo ware na tangaloi tabanagi gatagale ko mo huie vena, ‘?Hava gineu mo vai?’ 27A tangaloi tabanagi hi mo duvi lawea vena, ‘I tuemu u mule taligu ko i tamamu mo wehi na natui bulugi u damoe, a vevenagi u sala ko u haqea taligu mo mwaso tau.’

28“A togagi hi mo mero, mo rao ahu lolo vale, siu i tamana mo vomai mo warea ve na vano lobera. 29Mo duvi lawe tamana vena, ‘Leo, a higao sao nau kea vurogi lawego, nge na he vai liu na leomu tea. ?Nge gu bete na havai laweau? Go he bete na nani tea gatagale laweau ve nain genie mena noku buluana. 30Nge i netumu ngaha ingeie he u vearage na nomu vivilakogi doluegi lo vavine masimesinge u sao, ko lune nge mo mule taligu, gu wehi na natui bulugi u damoe hurie.’ 31I tamana mo duvi lawea vena, ‘Netuku, iniko gesegi meieu lo vanue ko a hava gineu teri a noku a nomu. 32Nge igide dam gagani bubugi ko da havuhevu, huri tuemu u mate, nge u mwaso taligu, u sala, nge dau haqea taligu.’ ”

Currently Selected:

LUK 15: HNT

Highlight

Copy