LUK 14

I Jisas mo vai vagamwasoi na tangaloi dena segeana

1Lo Rani Mangaana gatagale i Jisas mo vano mo gagani lo valei Varise gatagale, nge a tangaloi lawua, ko a sinobu ram matagi goro kakarani gi Jisas. 2A tangaloi gatagale a dai mateana mo vai na betune mo vomai lobei Jisas, 3ko i Jisas mo huire huhui talo Leo hora noi Mosis ko ira Varise vena, “?A noda leo u siregi ve dai vei vagamwasoi na tangaloi lo Rani Mangaana sige hatie?”

4Nge ingere ra he veve tea havai. Siu i Jisas mo lai na tangaloi hi, mo vagamwasoie dena nona segeana, ko mo horae mo vano taligu. 5Siu mo veve lawera vena, “?Tare ve i netumiu gatagale sige a bulemiu bulugi gatagale mo soi talolo walu lo Rani Mangaana, siu ngehi vin vei wuraha? Nam lado ve nein vano nein reve kaloe lo Rani Mangaana hi.”

6Nge ingere rahe duvi lei na leona tea.

A lado biti nona tangaloi

7I Jisas lehire hala rau vomai lolo vale hi, ram leo wahe na tanoi togatoga rau eno hageliu hurire, giniehi, mo veve na gato tavalu ngehi lawera doluegi, 8mo veve vena, “Lune a tangaloi mo warego huri hinagai lagiana, gon mese toga lo tanoi togatoga rau eno hage namawe, vaiteu u ware na tangaloi u lawua taligu denigo huri ve na bulu lo gaganie hi. 9A tangaloi hi u ware gimiru vin vomai lobemu, vin veve lawego vena, ‘Gon siregi na tanoi togatoga hi lawe na tangaloi ngaha.’ Aiehi bataha goin maemae goin hivo goin toga lo tanoi togatoga u eno hivo vuine vohogi. 10Nge lune a tangaloi vin warego, gon vano gon toga lo tanoi togatoga ngehi u eno hivo vuine, siu a tangaloi hi u warego vin vomai, vin veve lawego vena, ‘Buluana, gon vomai gon toga lo tanoi togatoga ngaha u eno hage namawe! Aiehi vin lei hageginigo lo nagora tangaloi gaganie hi lavasigi. 11Huri ihine mo lado hageginie sibona, God vin vei weweuginie, ko ihine mo lado weweuginie sibona, God vin vei hageginie.”

12Siu i Jisas mo veve lawe na tangaloi hi u warea huri na gaganie vena, “Lune goin vagatai na gaganie lo matainaho tuvovohoi sige lolo revirevi, goin mese warera nomu buluana sige ire tuemu sige ire havamu sige ira mwerai homu kakarani lobemu ve rain vomai rain bulu lo gaganie hi. Mwerehi rain warego taligu ve goin bulu meire. Aiehi goin lei na gaitawe huri hava gineu gu vei lawera. 13Lune goin vei vagatai na gaganie, goin warera mahoi tangaloi, ira tangaloi mena huihale, ira karuesi ko ira matadodo rain vomai bubugi huri na gaganie ngaha. 14Siu iniko goin havuhevu, huri rain he bete lai na gaitawegi tea lawego. Huri lo rani hi ira tangaloi vovohoi rain maraga dena mateana i God vin bete na gaitawe lawego.”

A gato tavalu huri na gaganie lawua

15A tangaloi gatagale denire hi ram toga lo tanoi gaganie mo rongo na leo ngaha ko mo veve lawe Jisas vena, “Havuhevu mei rahine hi rain toga lo tanoi gaganie lo mwasoana garaqa God mo ratahigi lolona!”

16I Jisas mo veve lawea vena, “A tangaloi gatagale mo vai na hinaga lawua, ko nge u warataugi lawe na tangaloi u sao ve rain vomai huri na gaganie hi. 17Lune u vagatai na gaganie u rovo, nge mo hora na nona tangaloi tabanagi gatagale vena vano na ware rahine hi u warataugi teu lawera, mo veve vena, ‘Nen vomai, a gineu doluegi u rarai beno.’ 18Nge ingere ram tauvuigi ram veve na gaitetugi vatavatahaginire. A muegi mo veve lawe na tangaloi tabanagi hi vena, ‘Nau voli na tano, tau nain vano nain lehe, Siu hahagavi, nain he vanatu lei tea.’ 19Tuegi mo veve vena, ‘Nau voli na bulugi hangavulu, siu vena vano na vai lehire. Siu hahagavi, nain he vanatu lei tea. 20Gaitoligi mo veve vena, ‘Nam bei legi na vavine garaqa. A vevenagi hi nain he vanatu lei tea.’

21“A tangaloi tabanagi mo mule mo veve na gineu ingere ngaha doluegi lawe na nona ratahigi. Ko a ratahigi hi mo mero, mo veve lawe na nona tangaloi tabanagi hi vena, ‘Gon vano lo turegi ko lo mahangai turegi vage, gon laire mahoi tangaloi, ira tangaloi mena huihale, ira matadodo ko ira karuesi ran vomai.’ 22Siu a nona tangaloi tabanagi hi mo veve lawe na nona ratahigi vena, ‘A gineu ngerehi nau veire, nge a mahogi ram eno tau.’ 23A ratahigi hi mo veve lawe na nona tangaloi tabanagi hi vena, ‘Garea, gon vano lo turegi lawua ko lo mwararai turegi tavala varea. Aiehi gon lai na tangaloi ran vomai huri a valeku na horo vurugegi. 24Ineu nam veve lawe gimiu vena, denire hi nau warera huri na gaganie, rain he gani tea havai den gaku hinaga.’ ”

A rorongtagi noi Jisas vin siregi na nona lalaie doluegi

25Sinobu sao ram huri Jisas lo turegi. Nge mo tudori mo veve lawera vena, 26“Tare ve ihine tea mo hurieu, vin siregi vohogi tamana ko i ratahine, gahorana ko ire netune, retuana ko i rehaqena, ko ingeie sibona vage. Tare ve hatie, vin he voragi noku rorongtagi lei tea. 27Tare ve ihine tea vin he wali na nona gai saroutu tea vena hurieu, vin he voragi noku rorongtagi lei tea.

28“Tare ve hine tea den gimiu mo tarani vena vutu na vale lawua, nge gitomue vin toga hivo vuine, vin velu bubugi na gaivoli lakolakohigi ve vin waheginie wuraha, vin leo ve a mane vin tatarise huri vin tabana lune vin rovo. 29Tare ve hatie, vin teuvuigi na togaibibi vuine, nge lo tagugi hi a vului vale he rovo tea. Ko lune a tangaloi rain lehe, rain sovue. 30Rain veve vena, ‘A tangaloi hi mo tauvuigi mo vutu na vale hi, nge vin he vai rovonagi nei lai tea.’

31“Tare ve a ratahigi gatagale mo vano mena nona tangaloi teri vatu hangavulu, vena qalo mena ratahigi wagineu hi a nona tangaloi u teri vatu ngavulu gairue, gitomuegi a ratahigi hi vin toga hivo, vin leoleo vurugegi ve ingeie u tatarise ve vin qalo mena ratahigi tuegi hi sige hatie. 32Tare ve hatie, vin hora na nona gaihora, vin vano vin dadari lobena ratahigi tuegi hi, lune ingeie u vagahao tau, ko nge vin nevu na tamwata denie. 33Mwerehi vohogi, ihine den gimiu vin he voragi noku rorongtagi lei tea, tare ve vin he siregi na nona lalaie doluegi tea.

A gato tavalu huri na mavai

34“A mavai u garea, nge tare ve mo voragi wai mweda, vin he vai gogona ginie tea lai taligu. 35He garea tea mena talu sige ve vin voragi vagalobugi. Nge vin tuli vohogi. Tare ihine qerona, na ronghuri vurugegi!”

Currently Selected:

LUK 14: HNT

Highlight

Copy