LUK 11

I Jisas mo huhuire huri na tataro

1Lo rani gatagale i Jisas u tataro lo ute gatagale. Lune nge u tataro u rovo a nona rorongtagi gatagale mo veve lawea vena, “Huqe, gon huhui gamai huri na tataro, mwere i Jon u huhuire nona rorongtagi.”

2I Jisas mo veve lawera vena, “Lune nem tataro, nen veve mwere ngaha:

‘Mama:

a henamu u gogona.

Gamai gam tarani ve a tangaloi doluegi

rain ladomava ginigo,

ko ve a nom Ute na himei.

3Gon bete na hinaga lawe gamai vataha rani

na eno huri gaqarigi.

4Gon ladovohogi na nomai galegaleasi,

huri gamai gam ladovohogi na gineu esi

ingere rau vei lawe gamai.

Gon mese siregi gamai lolo galegaleasi.’ ”

5Siu i Jisas mo veve lawera nona rorongtagi vena, “Tare ve gatagale den gimiu vin vano lolo livugata lo valei nona buluana, vin veve lawea vena, ‘Buluana, gon siregi a bereti gaitolu laweau, 6huri a noku buluana mo bei dadari siseri ngaha lo valeku, nge ineu a hinaga meieu hatie!’ 7Tare ve a nomu buluana nge lolo valena vin duvi lawego vena, ‘Gon mese vaieu nam romasi! Nau gorogoro na matai vale beno, ineu meire netuku gau eno beno lolo niemai. Nain he maraga tea ve nan bete na gineu lawego.’ 8Nam veve lawe gimiu, bataha nge vin he maraga tea vena bete na bereti lawea a vevenagi ingeie a nona buluana. Nge tare ve a nona buluana he maemae tea ve vin nevu vagasao, nge vin maraga vin bete lawea na gineu ngerehi u tarani. 9Ko nam veve lawe gimiu vena: Nen navu, ko vin lei lawe gimiu; nen hike, ko nein haqe; nen dingdingi, ko vin roa na matai vale lawe gimiu. 10Huri vataha hine mo navu, vin lei lawea; ko vataha hine mo hike, vin haqe; ko vin roa na matai vale lawe hine tea mo dingdingi. 11?Ihine tea mei gimiu ira tamagi vin bete na mwata lawe netune lune nge mo navu na ige? 12?Sige vin bete na boe bulei Tagaro lawea lune nge mo navu na toli? 13Igimiu ira galegaleasi, nem ilo ve nen bete na gineu garea lawe re netumiu. ?Nge siu i Tamamiu eulu vin he bete na Vui Gogona tea vena liu lawera hine ram navu denie?”

I Jisas ko i Bielsebul

14I Jisas mo vuro lue na vui esi dena tangaloi u baoga; lune a vui esi mo mwalue denie, a tangaloi hi mo tauvuigi mo gato. A sinobu ram awogi hurie. 15Nge ingere lavasigi ram veve vena, “I Bielsibul, a ratahigi nora vui esi, inge mo bete na managi lawea, huri ve vin vuro lue na vui esi.”

16Siu ingere lavasigi wagineu vage ram tarani ve ran sinae, ram huie huri ve vin haharagi na gigilegi ta eulu. 17Nge i Jisas u ilo vurugegi na domire, mo veve lawera vena, “Vataha vanue mo vilewahe duvigi goro duvigi vin soi; a vale mo vilewahe duvigi goro duvigi vin he labe lai tea. 18?Ko tare ve i Satan mo vilewahe denie sibona, nona ute vin labe mwerehilogo? Gimiu nem veve ve ineu nam vuro lue na vui esi gina managi noi Bielsibul. 19?Tare ve ineu nam vuro lue na vui esi gina managi noi Bielsibul, ira nomiu tangaloi rau vuro lue gina managi noi hine? A vevenagi hi ingere rain vevegi gimiu. 20Nge tare ve ineu nam vuro lue na vui esi gina managi noi God, nem ilo ve a mwasoana garaqa God mo ratahigi lolona u dadari beno mei gimiu.

21“Lune a tangaloi huire mo saru na nona lakolakoi vuro doluegi goroe, mo leo goro na valena, nona lalaie doluegi ram eno tabetabegi. 22Nge lune ve a tangaloi tuegi u huire liue vin vomai, vin qoraginie, nge vin lei vohogi na nona lakolakoi vuro denie, ngehi u lado talure, siu nge vin bete vohogi na gineu ngerehi neu belure tau.

23“Ihine hatie meieu mo tavului vuro meieu; ihine he vilegi bubugi tea meieu ingeie i tuli gabugeburegi.

A vui esi mo vomai taligu

24“Lune a vui esi mo mwalue dena tangaloi, mo dige duru lo tano mamaha mo hike ve na toga surigi ko nge he haqe te lai. Nge mo veve vena, ‘Nain mule vano taligu lo valeku nau mwelue vomai denie.’ 25Nge mo mule vano mo leo haqe ve u mwasara vurugegi. 26Nge mo vano mo lai na vui esi gaibitu ingere rau esi liue sibona ko ingere ram ahu ram toga lolo vale hi. Siu lo vagasigi a togaana nona tangaloi hi u esi den tomue.”

A havuhevu hogo

27Lo tarogi hi i Jisas u laqa mwere ngaha, a vavine gatagale mo waregi lawea lolo livugara sinobu mo veve vena, “Havuhevu mei na vavine u babago ko gom huhu lune!” 28Nge i Jisas mo duvi lawea vena, “Nge havuhevu liu mei rahine ram rongo na leo noi God ko ram tabea!”

Ram hui Jisas huri na vaigivui.

29Lo tarogi ngaha a sinobu ram sone dali Jisas, nge mo veve vano lawera vena, “A sinobu tau bagataha rau esi. Ram hike huri na gigilegi, nge hatie gigilegi ve vin haharagi lawera nge hogosie a gigilegi lui Jona. 30Mwere i Jona a tangaloi ligoligogi u voragi na gigilegi lawera tangaloi ta Ninive tuei, mwerehi vage i Netui Tangaloi vin voragi na gigilegi lawera sinobu tau bagataha. 31Lo Rani Vevegi a vavine ratahigi ta Hage vin maraga mena sinobu ta lo tarogi ngaha ko vin veveginire, huri nge u vomai lo goloi ure vena rongo huri na mataisao noi Solomon; ko leo, a gineu lawua liu den i Solomon nge tangaha. 32Lo Rani Vevegi ira ta Ninive rain maraga mena sinobu tau lo tarogi ngaha ko rain veveginire, huri ingere rau ladowenigi lune rau rono na toretore noi Jona; ko leo, a gineu lawua liu den i Jona nge tangaha.

A leleo huri na betugi

33“Ihine he bule na leleo tea vena tau vuniginie sige vena taue lo vavai laha; nge mo taue lo gaiturei leleo, huri ve a sinobu ran lehi na leleo siu ingere ram bei vomai lolo vale. 34A matamu a leleo huri na betumu. Tare ve a matamu u garea, a betumu doluegi vin horo gina leleo; nge tare ve a matamu u esi, a betumu doluegi vin horo gina dodogi. 35Giniehi, gon lado vurugegi, huri ve a leleo mo toga lolo lolomu nge bataha a dodogi. 36Siu tare ve a betumu doluegi mo horo gina leleo, nge hatie dodogi vohogi lolona, vin leleo dolueginie, lune a leleo mo leleo sulumu mena leleona.”

I Jisas mo veve vovohoire Varise meire huhui talo Leo Hora noi Mosis

37Lune i Jisas u laqa u rovo, a Varise gatagale mo navuhie ve ron gagani bulu lo valena; siu ingere rom vano rom toga vuine huri gaganie. 38A Varise mo awogi huri mo lehi Jisas he qaqaga tea gitomue siu ve na gagani. 39Siu a Huqe mo veve lawea vena: Nen leo, gimiu ira Varise nem solo na tagui laha mena peleti, nge a lolomiu u horo gina taratarani gineu ko a domiana rau esi. 40!Gimiu a reragi! ?God u vei na tagugi, nge wa he vai na lologi tea vage? 41Nge ve gimiu nen bete na gineu lolo loloi nomiu laha mena beleti lawera mahogi, ko mwerehi vataha gineu doluegi rain mwasara vurugegi ve huri na nomiu togatoga.

42“Hahagavi huri gimiu ira Varise! Nem bete lawe God a hangavulugi den vataha bulemiu rivurivu wuwerigi dam tau lo hinaga huri a bonagi mo garea, nge nem tau vohogi na lengai vovohoi ko a tabeana lawe God. Mo eno lawe gimiu ve nein vei na gineu ngerehi nge nen mese siregi na gineu wuwerigi ingere ngaha.

43“Hahagavi huri gimiu ira Varise! Nem tarani na muei tanoi togatoga lo valei soneana, ko nem tarani ve a tangaloi rain vevegareagi gimiu lo sarai volivoli. 44Hahagavi huri gimiu! Gimiu mwere na qarui mateana hate gigilegi lure, a tangaloi ram digedige lo ulure nge rahe ilo tea huri ve a qaru aiehi.”

45A huhui gatagale talo Leo hora noi Mosis mo duvi lawea vena, “Huhui, lune gom veve mwerehi gom veve asiesigi gamai vage.”

46I Jisas mo duvi lawea vena, “Hahagavi huri gimiu vage, ira huhui talo Leo hora noi Mosis! Nem tau na hakohako mava lo gainherera tangaloi, ingere rain he wali lei tea, nge igimiu sibomiu ngehi tarani tea ve nen buluire huri na hakohako mava hi. 47!Hahagavi huri gimiu! Nem vai na qaru huri ira tangaloi ligoligogi, nge ngerehi ire tubumiu rau wehire tuei beno. 48Mwerehi, nem lado bubugi mena lalakogi noi retubumiu rau vei; huri ingere rau wehire tangaloi ligoligogi, ko igimiu nem vai na qarure. 49Giniehi, a mataisao noi God u veve vena, ‘Neu nain hora ira tangaloi ligoligogi ko ira gaihora lawera; rain wehire lavasigi ko rain veiveire lavasigi.’ 50A vevenagi ngaha, ra sinobu tau bagataha rain rong gagarasi huri ira tangaloi ligoligogi doluegi rau ue vagamatera lo tauvui ure mo vomai mo dadari bagataha, 51u teu vuigi lui Ebol mo dadari lui Sekaraea, rau wehe lo livugei tanoi rugurugu ko a vali gogona lolo valei God. Io hogo, nam veve lawe gimiu vena, vin vei gagarasigi na sinobu tau bagataha hurire doluegi.

52“Hahagavi huri gimiu ira huhui talo Leo hora noi Mosis! Gimiu neu lei vohogi na ki mo roa na matai vale huri na iloilo huri na Reve reve Gogona; gimiu sibomiu ne he tarani tea ve nen ahu lolona, ko gimiu nem tugoro siagaginire tangaloi ram tarani ve ran ahu lolona.”

53Lune i Jisas mo mwalue dena vale hi, ira huhui talo Leo hora noi Mosis meire Varise ram tauvuigi ram vui garogi meie, siu ingere ram huie gina leo huihui u sao, 54ram sine lehe ve rain vunae lo leona.

Currently Selected:

LUK 11: HNT

Highlight

Copy