LUK 10

I Jisas mo horara tangaloi ngavulu gaibitu domwagi gairue

1Lo tagugi ngaha a Huqe mo bei leo wahera tangaloi lavasigi ingere ngavulu gaibitu domwagi gairue ko mo horara ram vano, hogo gairue, ram tomueginie lo vataha vanue ngerehi nge vin vano aie. 2Ingeie mo veve lawera vena: “A hinaga matue u sao lolo talu, nge a tangaloi tabanagi he sao tea. Giniehi, nen tataro lawe na Huqegi talo talu huri ve vin horara tangaloi tabanagi sulolo talune. 3Nen vano! Ineu nam hora gimiu mwere netui sibsib sulolo livugei wiriu turu. 4Nen mese hako tantanoi mane, tanga ko a butu; nen mese manga lo turegi ve nen lai vurugegi na tangaloi. 5Lune nem ahu lolo vale nen veve vena, ‘A tamwata na toga lolo vale ngaha.’ 6Tare ve a tangaloi mo tarani na tamwata mo toga lolo vale hi, nomiu tamwata na hivo lo ulune; nge tare ve hatie, nomiu tamwata na tudori lawe gimiu. 7Nen toga lo vale gatagale, nen gani me ko nen inu a hava gineu tea hi ram hogogi lawe gimiu, huri a tangaloi tabanagi u tatarise meie huri a nona gaitawe. Nen mese ahu ehu vale wagiwagineu. 8Lune nen ahu lolo qatui venue ko ram lai vurugegi gimiu sulolo vale, nen gani na hava gineu ingere ram bete lawe gimiu. 9Nen vagamwasoire ram sege lolo qatui venue hi, ko nen veve lawera sinobu ta aiehi vena, ‘A Ute noi God u vomai kakarani beno lobemiu. 10Nge lune nem vano lolo qatui venue ko ra he lai vurugegi gimiu tea, nen mwalue vano lo turegi, nen veve vena, 11‘A qie talolo nomiu qatui venue ram bulu na karumai gam heheragi vohoginire goro gimiu; nge gimiu nen iloe huri ve a Ute noi God u vomai kakarani beno lobemiu!’ 12Nam veve lawe gimiu vena lo Rani Vevegi i God vin hahagavi liu huri na sinobu ta Sodom dena sinobu talo qatui venue ngaha!”

A togagi venue ra he ladohogo tea

13“Hahagavi hurigo, Korasin! Hahagavi hurigo, Betsaeda! Huri tare ve u vei na managi lo vanue Taea ko Saedon mwere u vei lawe gimiu, tuei vohogi a sinobu aie rau toga hivo rau seru gorora gina luqe buburesige ko rau tatavigi gina qie, a gigilegi ve ram ladowenigi dena nora galegaleasi! 14Lo Rani Vevegi God vin hahagavi liu huri na sinobu ta Taea ko Saedon den gimiu. 15?Ko igimiu ta Kabeniam, neu tarani ve nen tabe kalo gimiu siu lo eulu? Vin tuli gimiu talolo tanoi gagarasi!”

16I Jisas mo veve lawera nona rorongtagi vena, “Ihine mo ronghuri gimiu, mo rongohurieu; ihine mo taha gimiu, mo tahau; ko ihine mo tahau, mo taha hine hi u horau vomai.”

Ngere ngavulu gaibitu domwagi gairue ram mule taligu

17Ngere ngavulu gaibitu domwagi gairue ram mule taligu gina havuhevu lawua, ram veve vena, “Huqe, a vui esi rau rongo gamai lune gamai gau ware na henamu!”

18I Jisas mo duvi lawera vena, “Ineu nau lehi Setan u soi himei dena eulu mwere na vile. 19Nen rongo! Ineu nau lei na managi lawe gimiu, huri ve gimiu nen bilehi na mata ko a boe bulei Tagaro ko a managi doluegi noi Tavului Vuro, ko a gineu esi vin he vai gimiu tea. 20Nge nen mese rongarea huri ve a vui esi ram rongo gimiu, nge nen rong garea huri ve u reve na henamiu beno lo eulu.”

I Jisas mo vevegarea i tamana

21Lo tarogi hi a Vui Gogona mo vai Jisas mo havuhevu liu mo veve vena, “E Mama, Huqe ta eulu ko lovavagi! Nam vevegarea ginigo huri gu vunigi na gineu teri denire rau iloilo ko rau mataisao, ko gu haharaginire lawera haroharo. Io, Mama, huri ve u garea mwerehi lo nagomu.

22“I Tamaku u bete laweau na gineu doluegi. Ihine he ilo tea i Netui nge hogosie i Mama, ko ihine he ilo tea i Mama nge hogosie i Netui, mei rahine i Netui mo haharaginie lawera.”

23Siu i Jisas mo tudori gorora nona rorongtagi mo veve rorongogi lawera vena, “Havuhevu mei gimiu, huri gimiu nem lehi na gineu ingere ngaha! 24Nam veve lawe gimiu vena, ira tangaloi ligoligogi u sao meire ratahigi rau tarani ve rain lehi na gineu teri gimiu nem leo, ko ingere rahe lehire tea, ko ve rain rono na gineu teri gimiu nem rongo, ko ingere ra he rongo lai tea.

A gato tavalu huri na tangaloi garea ta Samaria

25Siu a huhui gatagale talo Leo hora noi Mosis mo vomai ko mo sine lehi Jisas. Mo huie vena, “?Huhui, nain vei wuraha huri ve nain lei na mwasoana radu?”

26I Jisas mo duvi vena, “?A Reve reve Gogona ram veve wuraha? Gom ilo ve a domianagi mwerehilogo?”

27A tangaloi hi mo duvi vena, Gon tabe na Huqe nomu God gina taqangimu doluegi, ko gina mwasoamu doluegi, ko gina nomu huireana doluegi, ko gina domimu doluegi’; ko ‘Gon tabe na tagi venuemu mwereigo sibomu.’ ”

28I Jisas mo duvi vena, “Gu duvie vovohoi; gon vai mwerehi ko goin mwaso.

29Nge a huhui hi mo tarani vena veve sibona ve u vovohoi, siu mo hui Jisas vena, “?I tagi venueku ihine?”

30I Jisas mo duvi lawea vena: “A tangaloi gatagale mo maraga dena vanue Jerusalem mo hivo sulo vanue Jeriko; siu a tangaloi belu ram wiribibie, ram dare na luqana ko ram wehe, ram sireginie mo mate mwasomwaso. 31Siu a rugurugu mo hivo lo turegi hi tau; lune mo lehi na tangaloi hi a tangaloi belu rau wehe mo dige liliu denie mo vano. 32Mwerehi vage a tangaloi dena burigi noi Livae, ngerehi ram buluire rugurugu, mo vomai taiehi vage, mo vano ko mo lehi na tangaloi hi, ko mo rovo mo dige liliu denie mo vano. 33Nge a tangaloi gatagale ta Samaria mo hivo lo turegi ngehi mo vomai kakarani lobena; lune mo lehi na tangaloi hi mo hagavie. 34Mo dige vano lobena, mo didihi na vurei ko a waen lo matai gana ko mo vivire; mo rovo nge mo tau na tangaloi hi lo bulana dongki ko mo laie sulolo hotel, aiehi mo leo hurie. 35Lo rani tuegi nge mo lai na vatu vudolue vagarue ko mo betera lawe na tangaloi mo leogoro na hotel hi. Mo veve lawea vena, ‘Gon leohurie, ko lune nain vomai taligu nain voli na hava gineu ngerehi gu bete lawea.’ ”

36Ko i Jisas mo tarihougi vena, “?Gom lado ve ihine denire gaitolu hi u mwere na tagivenue lawe na tangaloi hi a tangaloi belu rau wehe?”

37A huhui mo duvi vena, “Ihine hi u hagavie.”

I Jisas mo duvi vena, “Gon vano ko gon vai mwerehi vage.”

I Jisas mo siro Mata tona Meri lo valera

38Siu i Jisas meire nona rorongtagi rau vano ram dadari lo togagi venue gatagale, a vanuei vavine nge henana i Mata nge mo lai vurugeginire sulo valena. 39A vavine hi i tuana i Meri, nge mo toga vuine lobei karui Jisas huri mo rorongtagi vurugegi na nona leo huhui. 40I Mata mo romasi huri na nona tabanagi u sao, mo vomai lobei Jisas mo veve lawea vena, “?Huqe, go he ladohuri tea ve i tueku u siregieu ve nan vai na tabanagi doluegi gaheau? Gon veve lawea na vomai na buluieu.” 41Nge a Huqe mo duvi lawea vena, “Mata, Mata! Iniko gom ladoasi me gom romasi huri na gineu sao, 42nge a gineu gatagale hogosie mo eno huri ve gon vaie. I Meri u leowahe beno na gineu garea, nge ihine vin he lai vohoginie tea denie.”

Currently Selected:

LUK 10: HNT

Highlight

Copy