Markus 10

Iben ti Wen

(Matiyu 19:1-12; Luka 16:18)

1Yesu nwunn ya uwog wu ta u ru yi uten Yawudiya ti uten ti ta ukunn unyim ti Yordan. Ti awu ka atang, ande yang akwen ru ba byir kyi uwog-wu pangma ti kucang. Ama awu ku kwen na kyi ba cwucwo pangma ti awu ku nde kob ti kute. 2Uwog wune, ande ndufu iki ti kumbub Farisi ru ba uwog-wu ikyaen ti a na fxen wu ira unju. A byib wu baa, “Uwae icwe, a byang kyi unde ti wu u wen ribaen-wu ti uwa-wu a?” 3Yesu rang ba baa, “Musa bae imi risu ira wune uwae icwe-wu?”

4A ri baa, “Musa cwe baa, unde u nde tu ti wu bae na uwa-wu kutsingken na ribaen ti wen, u kata te wu.” 5Yesu ri te wu baa, “Iken ti nde itawe Musa bae na ni icwe yine, si ikyaen ti, ani si ande ti kpag risu. 6Ti kucang ayi si-yi ahan be. ‘Ti ti Rimam kyae iken meme, awu kyae urom ti unda som utense. 7Ayine si iken ti nde unde u ya itse-wu ti iya-wu ta u ba te uwa-wu som te atso. 8Aba meme ifaen-ba kafe iken kinjo.’ Aba si-ba ifaen cwucwo be, aba si kinjo amam. 9Ikyaen yine, iken ti Rimam a yir pu wu, unde iki ā saen ta-wu ayi be.”

10Ti Yesu ti atugbug-wu kafe ba sang uwae kusog, aba rang kyi wu ira cwucwo risu ira iben ti wen yine. 11Yesu ri te ba baa, “Unde ti a wen ribaen te uwa-wu u ru ka mbe unda iki, awu tsi uwe Rimam pangma si unde ti ku nae amae. 12Unda ama ti a ya ubaen-wu ta u ru ka baen unde iki, awu tsi uwe Rimam pangma unda ti ku nae amae.”

Yesu Wae Ira na Anyisu Tinying

(Matiyu 19:13-15; Luka 18:15-17)

13Ande iki pu anyisu ku ba yi uwog Yesu ti awu na sa kujwo nae tsa ba risu. Amaa atugbug-wu fwan ba kibyag baa, aba na ba-ba uwog-wu be. 14Ti Yesu nung iken ti atugbug-wu ku nde, awu tso rinae u ri te ba baa, “Ni byangkyi-ni anyisu tinying ba be. Ni ya ba ta ti a ba uwog-m. Ikyaen ti, utso ande ti pangma bane ti Kujwokwe Rimam ta ikyaen-ba. 15Kubenti ti ame ku ri te ni, unde u sang tu-wu Kujwojwe Rimam be, se awu a cwe ti Rimam u nae ukwe risu-wu pangma ti Rimam ku nae ukwe risu anyisu tinying.” 16Uwog wune, Yesu ye anyisu ba fa ajwo u sa kujwo nae tsa ba u nde na ba ti tinyang.

Unde ti Rifunn

(Matiyu 19:16-30; Luka 18:18-30)

17Ti Yesu nwunn ku ru fengo, unde iki ru ba uwog-wu ti inyae u ba ku riben uwe-wu u rang wu baa, “Unde ti ku kwen iken ti tinyang, ame u nde rimang itawe ame u tu unyang ti tsikukunn?”

18Yesu ri te wu baa, “Afu nde rimang ku kunn m baa, ‘Unde ti tinyang!’ Unde ti tinyang ta-wu be, se Rimam kinjo-wu amam ti si ti tinyang.” 19Yesu ri te unde wu baa, “Afu nung pu fu icwe Rimam: Wen-fu unde be, nae-fu amae be, yib-fu riyib be, yer tikong tsa-fu unde be, ci-fu iken unde ti tikong be, nda itse-fu ti iya-fu kuko.”

20Unde wu cwe baa, “Een, unde ti uwe, ame ku putsa icwe yine meme ti ti ame ser itaen-m ba kwar tine.” 21Yesu sae wu ayib ure u ri te wu baa, “Ayi tsitsi iken kinjo amam ti afu nde-fu khika be. Ru ka pu iken-fu meme jabci, ti pu aser yi kan na ande ti rikaen, titawe afu u tu rifunn na Rimam ti apupwen. Isim yine, ru ba putsa m.” 22Ti unde wu fxen ira Yesu yine, utob-wu ndembeb, awu ye uwe ndembeb ndembeb u ru-wu iken-wu, ikyaen ti, awu site rifunn ko timambe.

23Yesu sae ayib pakob atugbug-wu u ri te ba baa, “Ayi u kpag ti unde ti rifunn u sang Kujwokwe Rimam.”

24Ira yi ti awu ri ne fur ba ayib. Ama Yesu ri te kyi ba ira cwucwo baa, “Anyisu-m, itisang Kujwokwe na Rimam kpag timambe! 25Ayi tomskeb ti kakum u sang imbyi uyi ti ti unde ti rifunn u sang Kujwokwe ana Rimam.”#10:25 Kakum. Uwae unju Helene a bae “kamelos,” wato, ikyinnsu ti kumunn isim.

26Atugbug Yesu nung ira yine fur ba ayib si-yi ti ti ri be. Aba ku rang atso baa, “Itso ira yine, unde iki u nwangru uwae rikwén Rimam njwaa?”

27Yesu sae ba ayib piin u ri te ba baa, “Ande u nwangru tu-ba risu-ba be. Amaa uwog Rimam ayi site-yi rikaen be. Iken meme pab, Rimam u nde tu yi.”

28Bitrus ye ra afxenjwin tso baa, “Meme iken ti ati site, ati ya yi ta ikyaen ti ti putsa fu.”

29Yesu ri baa, “Kubenti ti ame ku ri te ni, unde titini ti a ya kuru-wu ta, ko ameinja-wu ko ambakaya-wu ko iya-wu ko itse-wu ko anyisu-wu ko risaen-wu, ikyaen ira-m ti ikyaen na ira Rimam ti tinyang ti ame sa ba, 30ame ku ri te ni, ti ti unde wu tsi ti user uwae utense ne, awu u tu iken yine meme skeb ti kucang atsepu mae itsong, ko ayi a si kuru, ko ayi si ameinja, ko ayi si ambakaya, ko iya, ko anyisu, ko risaen. Ama awu u ngwa kang rikaen ama. Cwucwo, awu u tu unyang ti tsi kukunn kiye ti awu a cwu.” 31Yesu ri baa, “Ande yang akwen ti si ande ti uwe tine u ba kafe ande ti isim. Ande ti ta ti isim tine ama u ba kafe ande ti uwe.”

Yesu Ri Kyi Ira Risu Iticwu-wu

(Matiyu 20:17-19; Luka 18:31-34)

32Yesu ti ande-wu rijwe asu ifaen ti ku kwen iken uwog-wu ta fengo ku tso yi Urushelima. Yesu ku ru uwe, ande-wu ku putsa wu isim. Anying yer ba utob. Ande ti ku putsa ba isim ama, ku kyen ikyenricwu. Yesu pu aba rijwe asu ifaen tsi iyen kyaeb u ri te ba iken ti u tu wu uwae Urushelima. 33Awu ri baa, “Ande-m, ati ku tso yi Urushelima, ati a ka pu ti atang, a u sa Umbae Unde sang kujwo akwen tiyang ti ande ti ku kwen na ande Icwe. Aba u pwen wu rikwen iticwu. Aba u sa wu fae si kujwo ande ti nung-ba Rimam be. 34Ande ba u txir wu itxir. Aba u tub atsang si wu rimenn. Aba u byinn wu kimbab. Isim ayine aba u wen wu. Amaa usir ti fa ti ita awu u nwunn uwae kuskab ti unyang.”

Yakubu ti Yohana Jwam Yesu Iken

(Matiyu 20:20-28)

35Yakubu ti Yohana, anyisu Zebedi, ru ba uwog Yesu u ri te wu baa, “Unde ti uwe, asiti ati a jwam fu iken iki, ati ku sha ti afu na nde iken yi na ti.” 36Awu rang ba baa, “Iken ti ani ku sha ti m u nde na ni si imi?” 37A ri te wu baa, “Kiye ti afu a som pu fu uwae riyinn na ukwe-fu, uwae-ti ande ifaen ne, ati ku sha ti unde iki na som kujwo rici-fu, unde ti ifaen ama u som yaen kujwo ife-fu.” 38Yesu ri te ba baa, “Ani nung-ni iken ti ani ku jwam be. Ani u ngwa tu iticwae ti ame u ngwa a. Ko ani u nde tu batisima ti ame u nde a.” 39Aba ri te wu baa, aba na u nde tu. Yesu ri te ba baa, “Kubenti, iticwae ti ame u ngwa, ani u ngwa, ama batisima ti a u nde m te yi, a u nde ni te yi ama. 40Amaa ame site-m fengo ti ame u nda ande ti a som kujwo rici ti kujwo ife-m be. Ayi si wande na Rimam ti u nda ande uwog ti si ana ande ti a kyae yi tsi na ba.” 41Ti atugbug-wu rijwe ti tsitsi fxen ira yi ti Yakubu ti Yohana ri, aba tso rinae te ba. 42Ama Yesu kunn ba meme ira ru ba u ri te ba baa, “Ani nung pu ni, aba akwe na ande ti nung-ba Rimam be, aba ku tso ande-ba kuko ukwe-ba timambe. Ande ti uwe-ba ama ku fwan pang-ba ande kibyag yi kuko ti tso. 43Amaa, uwog-ni ande ti putsa m, ayi ā si-yi ahan be. Unde ti a ku sha ti wu u si unde tiyang uwae-ni, awu u nde kang rikaen na ni meme-ni. 44Unde iki uwae-ni a ku sha ti wu u si unde ti uwe, awu u sa risu-wu kafe upyi na ande ti tsitsi. 45Ikyaen ti, Umbae Unde ba-wu utense ikyaen ti a na nde na wu wande apyi be, amaa, ikyaen ti wu na nde na ande wande. Cwucwo, awu ba ti wu u sa unyang-wu tika ikyaen ti wu u jab mbe unyang ande yang akwen.”

Yesu Nwangru Unde ti Mbub Ayib

(Matiyu 20:29-34; Luka 18:35-43)

46Aba ru ka sang uten ti Jeriko. Ti Yesu ti atugbug-wu nwunn ku ru ku ye uwae uten atang, ande yang akwen putsa ba. Ama unde ti mbub ayib iki ku som riben iyen fengo atang, ku jwam iken. Rinyi-wu baa Bartimawu. (Imbyi rinyi-wu ayine baa, umbae Timawu.) 47Ti awu fxen baa, Yesu unde ti Nazareti na ya ku fe, awu sa afxenjwin tso ritsen u nghae ira baa, “Yesu, umbae Dawuda#10:47 umbae Dawuda. Mbayawuda som ku ji Ukwe tiyang ti u nwangru ba kujwo ande ti rika-ba. Aba ku kunn ukwe wune baa, Umbae Dawuda, ko iki be, Unde ti Rimam Tsab Tsi., sae m ayibrisi.” 48Ande yang akwen fwan wu kibyag baa, awu na bwe tag. Amaa, unde wu nghae ira skeb ti kucang baa, “Umbae Ukwe Dawuda, sae me ti ayibrisi!” 49Yesu kyae tsi u ri baa, aba na kunn unde wu ira na ba. Aba kunn wu ira u ri te wu baa, “Tsen utob! Nwunn ritsen! Awu ku kunn fu ira!” 50Awu waen pu kutupwa ti yab-wu tika u fa sunwunn u ru yi uwog Yesu. 51Yesu rang wu baa, “Iken ti afu ku sha ti m na nde na fu si imi?” Unde ti mbub ayib wune ri baa, “Unde ti uwe, ame ku sha ti ayib-m na mbubta ti ame u sae uwog.” 52Yesu ri te wu baa, “Ka-fu nyinyang. Uwae kinjo-fu nwangru pu wu afu.” Ti ritsen, ayib-wu mbubta, awu sae uwog. Ama awu putsa Yesu fengo atang.

Currently Selected:

Markus 10: kubNT

Highlight

Copy