Markus 9

1Awu ri te ba ama baa, “Kubenti ti ame ku ri te ni, ande iki ta uwae-ni ike ti a u cwu-ba cwu be, se iken ti a nung pu ba ti Rimam ye Kujwokwe-wu tsi pu wu ti kpakang itawe.”

Ijwe Yesu Kafe ku Jaen Ayib

(Matiyu 17:1-13; Luka 9:28-36)

2Isim usir itsongnjo, Yesu pu Bitrus ti Yakubu ti Yohana ru ka tso fe kitaen rikwen iki ti kob ken pu wu. Ande iki ta-ba atang be, nyang aba inje amam. Ama ti aba tsi atang ku sae, ijwe Yesu ti kutxuwe-wu kafe ku jijaen wurwur pangma usir uwe-ba. 3Atupwa-wu ama kafe titsen patag u jijaen wurwur. Unde ta-wu uwae utense ti u jwo saen atupwa ti ayi u saen pangma ana Yesu kiye wune be. 4Ama tiri, Eliya ti Musa tatso risu-ba atang, ku ri ira ti Yesu. 5Bitrus ye ra unju tso u ri te Yesu baa, “Unde ti uwe, ti ati ba ike ne, ayi nyang timambe! Cwe na ti, ati u sim afug ita ike, kinjo ikyaen na afu, kinjo ikyaen na Musa, kinjo ikyaen na Eliya.” 6Awu ri ahan ikyaen ti, ikyenricwu ye ba, ama Bitrus nung-wu ira ti awu u ri be.

7Ama kubyi si ba kukyi ba. Aba fxen afxenjwin uwae kubyi ri baa, “Awune si Umbae-m ti utob uwae-m. Ni naa atong ti ni fxen wu!” 8Ti ritsen aba kafe ku sae ayib, a nung-ba unde iki cwucwo be, nyang Yesu amam ti tsi te ba atang. 9Ti aba si rikwen ku ba, Yesu fwa ba kusen baa, aba na ri te-ba ande iki iken ti aba nung ne be, se awu Umbae Unde na a nwunn pu wu uwae iticwu itawe. 10Ikyaen na ayine, aba ye su ira yi uwae utob-ba, ku rang atso baa, imbyi na ira ti itinwunn uwae iticwu ti Yesu ku ri ne si imi? 11Ama aba byib wu baa, “Imi ti nde nee ande ti ku kwen na ande Icwe Rimam ku ri baa, Eliya na u ba itawe, ama Unde wu ti Rimam Tsab Tsi na u ba ana wu isim?” 12Yesu ri te ba baa, “Kubenti, Eliya u ba kang itawe. Awu u kyae nyang iken meme.” Ama awu rang ba cwucwo baa, “A bae ira risu Umbae Unde baa, awu na u ngwa rikaen timambe, be a? Cwucwo ande na u sae ru wu, be a? 13Ame ku ri te ni, awu Eliya ru ba pu wu. Ande nde pu ba wu iken ti a ku sha utob-ba, pangma ti a bae uwae Kutsingken Rimam risu-wu.”

Yesu Nwangru Umbae iki ti Site Rijwen Titibi

(Matiyu 17:14-20; Luka 9:37-43)

14Ti aba si rikwen ba uwog atugbug ti tsitsi, aba nung ande funn atang ting ting! Ande iki ti nung ira icwe ta atang, aba ku shaen ishaen te atugbug Yesu. 15Ti ande ti funn atang sae ye Yesu, ayib fur ba. Aba ter inyae ba kunnji wu ira.

16Yesu rang ande-wu baa, “Ira yi ti ani ku shaen ishaen atang si imi?”

17Unde kinjo uwae ande ti funn atang ri baa, “Unde ti uwe, ame pu umbae-m ti urom ba uwog-fu. Rijwen titibi tsi kyi wu unju. 18Kiye ti rijwen titibi wu a nwunn pu risu-wu, ko ayi a si aka, ayi ku sa wu jwunnsi riben. Ufunn ku ba kag wu unju. Awu ku kub inger. Ijwe-wu ku kwen kyi kyi. Ame jwam atugbug-fu ti a na rwae ru na wu rijwen titibi ne. Aba nde tu-ba be.”

19Yesu ri te ba baa, “Ani ande ti kiyuku ne kyang rimang u ru-ni uwae kinjo be? Ame u som te ni ka kwer isinn? Ame u ye utob te ni ka kwar isinn? Pu umbae wu ba na m ike.”

20A pu umbae wu ba uwog-wu. Ti rijwen titibi wu nungye Yesu, ti ritsen, awu byinn ra umbae wu si riben. Ijwe-wu ku fufwer. Awu ku kaen riben. Ufunn ba kag wu unju.

21Yesu rang itse umbae wu baa, “Kiye titini ti kicaeb yine ye umbae wu?” Awu ri baa,

“Kicaeb yi tu wu ti ti awu si umbae ti kitinying. 22Kicaeb yi ku sa wu jwunnsi kob urwa ti uwae kukwae ambyi, ikyaen ti yi na wen wu. Afu a u nde tu pu fu, afu u nung ti ti ayibrisi, u ndeya ti.”

23Yesu rang wu baa, “Afu nde rimang rang baa, asiti ame na u nde tu bara? Asiti unde a ru uwae kinjo, awu u nde tu iken meme.”

24Ti ritsen itse umbae wu ye ra unju tso u ri te Yesu baa, “Ame ku ru uwae kinjo. Ndeya m ti uwae kinjo-m ā skeb ti kucang.”

25Ti Yesu nung ande yang akwen ku ba ku funn uwog-wu ti inyae, awu taen rijwen titibi ira ti ribom baa, “Afu rijwen titibi ti tsi kyi umbae wune unju ti atong, ame ku fwa fu kusen! Ya umbae wune ta! Kafe ba-fu uwog-wu cwucwo be!”

26Rijwen titibi wu taen ira u nda ijwe-wu fwer si-yi ti ti ri be, ama ruye. Umbae wu nae riben pangma si rukom, ama ande ti ta atang ri baa, awu na cwu pu wu. 27Amaa, Yesu ye kujwo umbae wu u shir wu nwunn ritsen, ama umbae wu tsi ritsen.

28Isim-yi ti Yesu sang pu wu uwae kusog ti atugbug-wu kum aba amam, aba rang wu baa, “Imi ti nde ati rwae ru tu-ti rijwen titibi wu be?”

29Yesu ri te ba baa, “Ani u nde tu-ni ti ni u rwae ruye rijwen titibi itso yine risu unde be, se ani a ku jwam Rimam titawe.”

Yesu Ri Ira Risu Iticwu-Wu

(Matiyu 17:22-23; Luka 9:43b-45)

30Aba nwunn uwog wune u nyaetsa uten ti Galili. Yesu ku sha-wu ti ande na nung uwog ti awu na ta atang be, 31ikyaen ti, awu ku kwen na atugbug-wu baa, “A u sa Umbae Unde sang kujwo ande, aba u wen wu. Ti aba a wen mam fe wu, usir ti ita awu u nwunn uwae kuskab ti unyang.” 32Ande na Yesu ba kab ye-ba imbyi ira yi ti awu ri te ba be. Amaa aba ku kyen ikyenricwu ti a u rang wu rang.

Ishaen ti Shaen Risu Kuko

(Matiyu 18:1-5; Luka 9:46-48)

33Aba ru ka sang uten ti Kaparnawum. Ti Yesu ta uwae kusog, awu rang ba baa, “Ira imi ti ani ku shaen ishaen te atso fengo ti ati ku ba?” 34Aba som piin, ikyaen ti, ira yi ti aba shaen ishaen te atso risu-yi fengo ku ba si ti, unde ti site rurob siskeb uwae-ba si aye.

35Yesu som riben u kunn ba ba, aba rijwe asu ifaen, u ri te ba baa, “Asiti unde a ku sha ti wu u si unde ti uwe, awu u si unde ti ricwunnkyi uwae-ba meme, ama u si upyi-ba meme.”

36Yesu ye umbae iki tsi uwe-ba. Isim yine awu ye umbae wu fa ajwo u ri te ba baa, 37“Unde ti a ku paembe umbae ti kitinying pangma anyisu tinying bane yi rinyi-m, si ame ti awu ku paembe. Cwucwo, unde titini ti a ku paembe m, si-yi ame ti wu ku paembe amam be. Awu ku paembe Rimam ti tom me ba.”

Unde iki Nde Iken ti ku Fur Ayib

(Luka 9:49-50)

38Yohana ri te wu baa, “Unde ti uwe, ati nung unde iki ti ku rwae ruye rijwen titibi risu ande yi rinyi na-fu. Ati byang kyi wu ikyaen ti, awu fa-wu uwae-ti be.”

39Yesu ri te ba baa, “Ni byang kyi-ni awu be. Unde ti a ku nde iken ti ku fur ayib uwae rinyi-m ayi site rikaen uwe ike ti awu u ba ri ira titibi risu-m. 40Unde ti a si-wu unde ti rika-ti be, awu si ana-ti. 41Kubenti ti ame ku ri te ni, unde titini ti a nda ni ambyi ti ngwa ikyaen ti ani si ana-m, awu u shanum-wu kujwojang-wu be, ko tikiyib.”

Iken ti ku Nda Unde Nde Ikentitibi

(Matiyu 18:6-9; Luka 17:1-2)

42Yesu ri baa, “Uwae anyisu tinying bane ti ku ru uwae kinjo uwog-m, unde titini ti a kyaefa kinjo uwae-ba ti wu na nde ikentitibi, ayi nyang skeb uwog unde wu ti a u sa ricwo tiyang kya fa unde wu ti ukwae u sa wu jwunnsi uwae uyinn tiyang. 43Asiti kujwo-fu a ku nda fu nde ikentitibi, yer ra wu tika. Ayi nyang skeb uwog-fu ti afu u sang kuru Rimam ti apupwen te kukum kujwo, ti ti afu u sang uwog urwa ti ku jim-wu jim be te ajwo ifaen.#9:43 Ariki uwae atsingken ti kucang site ira iki uwog ne baa, 44 Uwog urwa ne, acwucwug ti ku kub ijwe ande u cwu-yi cwu be. Urwa ama u jim-wu jim be. 45Asiti kufxen-fu a nda fu ti fu nde ikentitibi, yer ra wu tika. Ayi nyang skeb uwog-fu ti fu u sang kuru Rimam ti apupwen ti kufxen ti kukum, ti ti a u sa fu jwunnsi uwog urwa ti afxen-fu meme ifaen-yi.#9:45 Ariki uwae atsingken ti kucang site ira iki uwog ne baa, 46 Uwog urwa ne, acwucwug ti ku kub ijwe ande u cwu-yi cwu be. Urwa ama u jim-wu jim be. 47Asiti riyib-fu a nda fu ti fu u nde ikentitibi, wag ra wu tika. Ayi nyang skeb uwog-fu ti afu u sang kuru Rimam apupwen ti riyib kinjo ti ti aba u sa fu jwunnsi uwog urwa ti ayib-fu ifaen. 48Uwog urwa wune, acwucwug ti ku kub ijwe ande ti a pu jwunnsi atang u cwu-yi cwu be. Urwa ama u jim-wu jim be.

Ira Ifaen Risu Rinwaen

49“Rimam ku kyae nyang ande-wu ti urwa pangma ti rinwaen ku kyae nyang utong.

50“Rinwaen si iken ti tinyang, amaa asiti awu a ya utug-wu ta, afu u nde rimang itawe fu ba kyae nyang wu ti wu u nyang kyi utug cwucwo?

“Ame ku ri te ni baa, ni kyae nyang wande atso ti ayi ā si tinyang pangma rinwaen ti ku kyae nyang wuci. Cwucwo ni som usom ti jimshwur te atso!”

Currently Selected:

Markus 9: kubNT

Highlight

Copy