Matiyu 28

Yesu Nwunn Uwae Kuskab

(Markus 16:1-10; Luka 24:1-12; Yohana 20:1-10)

1Isim ti Usir ikyinn wur ru pu wu, ti ucwe fam ku yae na usir ti kucang uwae kutsab-ba, Mberimu Magadalen ti Mberimu wu ti ifaen ama ru ti a kaa sae kuskab wu. 2Ti aba u nunung, utense meme kyi ijwe, atom Rimam ti apupwen iki si apupwen ba kaenra kutxom ti ta unju kuskab atang ru yi iyen kyab u ru ka som tsa atang. 3Kutxuwe-wu ku jaen ku wur wurwur pangma imam ti ku jaen. Kutupwa-wu ama tsen porr pangma kitub. 4Aba ande ti ku kyir kuskab wu nungye iken yine u fwer ijwe u pu cwucwu amam.

5Ama atom wune ri ira te anda abane baa, “Ni kyen-ni ikyenricwu be, ikyaen ti, ame nung pu m, ani ba ti ni ku sha Yesu ti a kwer wu risu kutuku ti cice. 6Awu ta-wu ike cwucwo be. Awu nwunn pu wu pangma ti awu ri te ni ti kucang. Ni ba nung uwog ti a sa wu nae atang kucang. 7Isim ayine, ni ru ti kife ti ni ka ri te atugbug-wu baa, awu na nwunn pu wu uwae itikicwu, ama u tá uwe ru pu wu yi Galili. Ani u tu wu atang. Ame ri te pu m ani.”

8Aba nwunn kuskab atang ti kufe ti ikyenricwu ti utob titsen timambe, u ter ru ka ri te atugbug-wu ira yi. 9Kiye ti aba ta fengo ku ru ru, Yesu ti risu-wu tu ba fengo u ri te ba baa, “Suko-ni.” Anda ba ba ye afxen-wu ama fen wu. 10Yesu ri te ba baa, “Ni kyen-ni ikyenricwu be. Ni ru ti ni ka ri te ameinja-m baa, aba na ru yi uten ti Galili. Aba na u tu m atang.”

Akwen Pu Aser Cwunn Akyirten Unju

11Ti anda ba ku ru, ariki uwae akyirten ba ti ku kyir kuskab wu sang uwae uka ka ri te akwen tiyang meme iken ti nde. 12Aba kunn byir ande ndufu ti tsitsi u yer unju-ba u sha aser yang-yi na akyirten ba ti ku kyir kuskab 13u ri te ba baa, “Ni ru ti ni ka ri te ande baa, atugbug-wu na yib ra rukom-wu ru kiye ti ani na nae kicwag utitang. 14Ko asiti ira yine a ba sang atong gomna, ati nung pu ti ira ti ati u ri te wu ti ira iki u tu-yi ani be.” 15Ara kubenti, ande bane mbe aser yi u nde wande ti ira ti ande ti uwe abane ri te ba. Ikyaen yine, ira ti aba tsag ku te ande ne shag kyife uten Mbayawuda meme ba ku sang ti usir ti yaka ne.

Yesu Nda Atom-Wu Wande Tiyang

(Markus 16:14-18; Luka 24:36-49; Yohana 20:19-23; Wande Atom 1:6-8)

16Aba atom Yesu rijwe asu kinjo nwunn u ru yi Galili u tso yi risu rikwen ti Yesu ri te ba. 17Kiye ti aba tu wu atang, aba ku riben uwe-wu u fen wu, ko ti ariki uwae-ba ku kab uwae risu-wu. 18Ama Yesu ba ri te ba baa, “Meme kuko ti ta apupwen ti kuko ti ta riben ike, a nda pu ba ame kujwo. 19Ikyaen yine, ni ru ti ni ka sha ande ti utense meme ti ni pu ba ba putsa ira-m. Ni nde na ba batisma yi rinyi na Itse ti Umbae ti Kusung ti Saen Kyag, 20ti ni kwen na ba ti aba ā putsa ira ti ame kwen na ni meme. Ame ama te ni ta tetso ko kiye titini ru ka sang ti usir ti ricwunnkyi.”

Currently Selected:

Matiyu 28: kubNT

Highlight

Copy