Matiyu 23

Kusen ti Fwa Risu Iken ti Kwen

(Markus 12:38-39; Luka 11:43; 11:46; 20:45-46)

1Yesu ri ira te ande ti funn atang ti atugbug-wu baa, 2“Ande ti ku kwen na ande icwe Rimam ti kumbub Farisi si ande ti a nda ba kuko ti a na ri te ande imbyi icwe Musa.#23:2 Yi kutsingken unju Mbahelene a bae atang baa, kumbub Farisi na somtsa ikentisom Musa. 3Ikyaen yine ni nae risu riben ti ni putsa ira ti a ri te ni meme. Amaa, ni putsa-ni ajwo wande-ba be, ikyaen ti, aba ku nde-ba iken ti aba ku kwen na ande be. 4Aba ye usu ti rob timambe nae tsa ande ukwae, amaa, aba ti risu-ba cwe-ba ti a u sa kukyikyin kujwo ndeya ande ti su usu yi be. 5Aba ku nde iken-ba meme ikyaen ti ande na nung. Nasi ti a pu bae kyi fe uwe-ba ti ajwo-ba yaen skeb ana ande meme. A ku kyae nyang unju atupwa-ba ti ande na nung. 6Aba ku sha kob ti a u som kutugbug ti site rurob yi uwog ukwab, ti kutugbug ti tinyang uwae kusog Rimam. 7Aba ku sha ti ande na kunnji ba ira uwae ritug baa, ‘Unde ti uwe.’ 8Ni cwe-ni ti ande a kunn ni baa, unde ti uwe be, ikyaen ti, ani si ameinja atso u site nyang unde ti uwe kinjo amam. 9Ni kunn-ni unde iki baa ‘Ite’ uwae utense ike be, ikyaen ti, Ite-ni si nyang kinjo amam, awu ti ta apupwen. 10Ni cwe-ni ti a kunn ni baa, ‘Unde ti ku kwen iken’ be, ikyaen ti, unde ti ku kwen iken-ni si nyang Kristi amam. 11Unde ti ko siskeb uwae-ni ā si upyi-ni. 12Unde ti a ndub risu, a u shir wu si yi riben. Unde ti a nae risu riben ama, a u shir ra wu tso yi apupwen.

Yesu Fwa Ande ti Kufur Kusen

(Markus 12:40; Luka 11:39-42; 11:44; 11:52; 20:47)

13“Ayae-ni, ani ande ti kumbub Farisi ti ani ande ti ku kwen na ande ira Icwe. Ani ande ti kufur! Ani cwunnkyi ufu kusog Kujwokwe ti apupwen ayib ande, amaa ani ti risu-ni, i si-yi ti ani u sang-ni be, cwucwo ande ti kwab ti a u sang, ani byang kyi ba fengo.#23:13 Uwae atsingken iki na unju Mbahelene, a kora ira iki baa, 14 Ayae-ni ande ti kumbub Farisi ti ande ti ku kwen na ande ira Icwe. Ani ande ti kufur! Ani ku fxaen mbe anunn awa icwu, ama u ku jwam Rimam ti rikob ti rikob ikyaen ti ni ndub ijwe uwe ande. Ikyaen yine rikaen-ni uwe ike u skeb tag patag.

15“Ayae-ni ande ti kumbub Farisi ti ani ande ti ku kwen na ande ira Icwe! Ani ande ti kufur! Ani ku yen uyinn ku kyang kyife uten meme ku sha ti ni u shir ande ba fengo Rimam, ama kiye ti awu a ba putsa pu wu Rimam, ani ku sa wu kafe unde ti skeb ni skeb ti ira titibi, rikaen-wu ama uwae urwa ti ku jim-wu jim be u ba beb skeb ana-ni atsepu ifaen.

16“I si iken ti ku nde risi uwog-ni! Ani mbub ayib u ku tae ande iki tae. Ani ku kwen na ande baa, ‘Asiti unde a ben uben yi Kusog Rimam, uben-wu ayi u nde-yi iken iki be, amaa asiti awu a ben te zinariya ti a pu tsi kusog Rimam atang, uben-wu u ye wu.’ 17Ani ande ti kuskwab ti mbub ayib, awu Kusog Rimam site-wu rurob skeb-wu zinariya ti ta uwae-yi be a? I si Kusog Rimam ti ku nda zinariya wu kafe iken ti rurob. 18Ani ku kwen na kyi ande baa, ‘Asiti unde a ben uben yi kuta ti a ku twen iken atang na Rimam, uben-wu ayi u ye-wu be, amaa asiti awu a ben te rinyangwae ti a cwutsa risu kuta wu, uben na u ye.’ 19Ani ande ti mbub ayib! Iken ti ko skeb si rinyangwae ree, re kuta atxom ti nda rinyangwae wu kafe iken ti rurob? 20Asiti unde a ku ben uben ti kuta kutxom, awu ku ben ren fwa ti rinyangwae ti cwutsa risu-wu meme. 21Cwucwo asiti unde a ben uben ti kusog Rimam, awu ku ben kusog wu ti Rimam ti ta uwae kusog wu. 22Asiti unde a ben uben ti apwa apupwen, i si kutugbug na Rimam ti awu ku ben uben atang, ren fa te Rimam ti risu-wu, awu ti ku som tsa atang.

23“Ayae-ni ani ande ti kumbub Farisi ti ani ande ti ku kwen na ande ira Icwe, ani ande ti kufur! Ani ku sa kinjo uwae rijwe ana Rimam ruye uwae iken-ni, ka ti atsing kitinyíng, amaa ani ku sha-ni ti ni u putsa Icwe Rimam ti si iken ti ko siskeb be. Wande ti kubenti, ayibrisi, uwae kinjo, ayine si iken ti ani ú nde kang titawe m ba nde kinjo uwae rijwe.#23:23 Kinjo uwae rijwe Ande ti Farisi sa iken kinjo ruye uwae iken rijwe u nda Rimam, ko yi a si wuci uwae rukong-ba, ko yi a si uwae asinn-ba, ko yi a si uwae aser-ba. Uwae unju Mbahelene, a kunn rinyi atsing utong-ba ti a ku sa iken kinjo ruye atang baa, minti ti dili ti kuminn. 24A ku ri baa, ani na ku tatso ande fengo. Amaa ani si ande ti mbub ayib! Ani ku sa tsoye ikying ti jwunnsi uwae ambyi ti ngwa-ni, ama ku menn kakum si uwae!

25“Iken ti ku nde risi! Ani ande ti kumbub Farisi ti ani ande ti ku kwen na ande ira Icwe! Ani ande ti kufur! Ani ku jwo saen ise atú, ama uwae-yi munn te kufum ti ira ti kab titibi. 26Ani ande ti kumbub Farisi, ani ande ti mbub ayib! I nyang skeb ti ni ru ka jwosaen uwae atu titawe. Asiti ani a nde ahan, uwae-yi ti ise-yi meme u saen.

27“I si iken ti ku nde risi uwog-ni ani ande ti kumbub Farisi ti ani ande ti nung ira Icwe. Ani ande ti kufur! Ani pangma kuskab ti a shi wu te pinti ama ise-wu nyang itisae, amaa, uwae-wu munn te akub ande ti cwucwu ti iken ti ajib ti rimang meme. 28Ayi si ahan ama, ande ku sae ni baa, ani na si ande ti saen kyag, amaa, uwae-ni munn te ira ti kufur ti ira titibi.

Iken ti u Tu Ande Ndufu

(Luka 11:47-51)

29“Iken ti nde risi! Ani ande ti kumbub Farisi ti ani ande ti ku kwen na ande ira Icwe! Ani ande ti kufur! Ani mbye askab ande ti ku ya iskin ira Rimam ama kyae nyang askab ande ti ku nde iken ti tinyang 30ku ri tetso baa, ‘Á baa, a na mbae ti ayib abitse-ti ti kucang, ati ú ren-ti risu te ba u yaen mbub anying ande ti ku ya iskin ira Rimam be.’ 31Ayine tso baa, ani cwe pu ni baa, ani na si rishi ande ti wen ande ti ku ya iskin ira Rimam ti kucang. 32Ni ru-ni yi uwe ti ni kumunn kitu wande titibi ti abitse-ni bag! 33Ani anyisu ajwae ti ikob! Fengo ti rimang ti ani u nwangru uwae rikwen na urwa ti ku twen u jim-wu jim be? 34Ni fxen! Ame u tom ande ti ku ya iskin ira Rimam ba uwog-ni. Ame u tom ande ti ben ayib ti ande ti ku kwen na ande iken. Kubenti, ani u yerwen ariki u kwer wen ariki risu kutuku u byinn ariki kimbab uwae asog Rimam-ni u rwae ba ruye uwae uten uten. 35Yi fengo yine anying na ande ti kubenti ti a wen meme ta risu-ni, tsi uwog Abila awu unde ti kubenti wune ba uwog Zakariya umbae Barakaya ti ani wen kutampwa Kusog Rimam tiyang ti kuta ikentitwen. 36Kubenti ti ame ku ri te ni, meme iken yine u tu ande ti kiyuku ne.

Yesu Jwub Ira Risu Ande ti Urushelima

(Luka 13:34-35)

37“Ani ande ti Urushelima! Ani ande ti ku wen atom Rimam u ku pu atxom jwunn ande ti Rimam tom ba uwog-ni. Ko kiye titini, ame ku sha ti m u kunn byir-ni pangma ti mbakunn ku byir anyisu-wu yi asae-wu, amaa, ani cwe-ni be. 38Sae, kusog-fu u kú ukaen. 39Ikyaen yine, ani u nung-ni ayib-m cwucwo be, se usir ti ani a ri baa, ‘Itinyang ā si ana unde wu ti ku ba uwae rinyi Itsekuru-ti.’ ”

Currently Selected:

Matiyu 23: kubNT

Highlight

Copy