Matiyu 24

Itibyinmbub Kusog Rimam Uwe Ike

(Markus 13:1-2; Luka 21:5-6)

1Ti Yesu nwunn ku ruye kusog Rimam u kyang ku ru, atugbug-wu ba tu wu u tatso wu asog ti a mbye yi Kusog Rimam atang. 2Yesu ri te ba baa, “Een, iken ti ani ku sae-ni, kubenti ti ame ku ri te ni, fengo iki ta-yi ti a u ya kutxom iki ta ti wu ā tsitsa iki be. A u byinn mbub yi si tag riben.”

Rikaen ti ku Ba Risu Ande ti Utense

(Markus 13:3-13; Luka 21:7-19)

3Kiye ti Yesu som yi Rikwen Zetunn, atugbug-wu ba tu wu ti kitam u ri baa, “Ri te ti kiye ti iken yine u nde. Imi ti u tatso itiba-fu ti ricwunnkyi na utense?”

4Yesu ri te ba baa, “Ni nung nyinyang ti unde iki ā kyaefa-wu ani be. 5Ikyaen ti, ande yang-ba u ba uwae rinyi-m u ba ri baa, ‘Ame ti si Unde wu ti Rimam Tsab Tsi’, ama u kyaefa ande yang-ba akwen. 6Ani u fxen ira rika fifer te ni. Ande u ba ri te ni ira rika ti a ku tā fengo ti rwen. Ni yer-ni anying utob be, ikyaen ti, iken yine u nde kang, amaa kiye ti ayi a ku nde, ni tang-ni baa, usir ti ricwunnkyi na ba pu wu be. 7Uten ti uten u ta rika tetso. Ukwe ti ukwe u tom akyirten-ba ka ta rika tetso. Rimenn u pu uten uwog ti tsotso ti tsotso uwae utense. Riben u kyi ijwe uwog ti tsotso ti tsotso. 8Meme iken yine si pangma itibag ana kicaeb umbae ti unda ku pwe.”

9“Isim ayine, ande u ye ni u nde ni rikaen u wen ni. Ande ti utense meme u sae ni ayib urwa ikyaen rinyi-m. 10Ama ande ti putsa-m yang-ba akwen u jwunnsi fengo-m uwae kiye wune, a u pu atso jabci u sae atso ti ayib urwa. 11Ama ande ti ku ya iskin ira tikong u nwunn u kyaefa ande yang-yi akwen. 12Ikyaen ti, ande ti putsa-ba icwe be u ko ku fufa. Ayine u nda ure na ande yang-ba u jim ndembeb. 13Amaa, unde ti a ye utob ba usir ti ricwunnkyi, awu u nwangru. 14Usir ti ricwunnkyi u ba-wu be se iken ti a sa ira ti tinyang Rimam ri te tag pu ba ande uwae utense meme. Unde titini u tu riyae u fxen yi, itawe usir ti ricwunnkyi u ba.”

Iken ti ku Txi Iyib ti A u Sa Tsi Kusog Rimam

(Markus 13:14-23; Luka 21:20-24)

15“Kiye iki ani u nung iken ti ku txi iyib ti a u sa tsi yi uwog ti sisaen pangma ti Daniyel unde ti ku ya iskin ira Rimam ri. (Unde ti ku nung putsa kutsingken wune, awu ā nungye!) 16Uwae kiye wune ande ti ta uten Yawudiya ā ter tso yi rikwen! 17Unde ti ta usen rukub ā kab-wu uwae ti wu u ka pu usu-wu uwae kusog be. 18Unde ti ta risaen ufang ā kafe ka-wu ti kununn ti wu ā ka sa kutupwa-wu be. 19Uwae kiye wune ayib u byaen anda ti kyaen rishwu ti anda ti ye su umbae ibyan. 20Ni jwam Rimam ti inyae ti ter-ni ā si-yi ushaen upwen#24:20 Uwae uten Isirela ushaen upwen si kiye ti ikyin ti kyang caeb siskeb. ko usir ikyinn be. 21Ikyaen ti, rikaen uwae kiye wune u skeb tag rikaen ti ande ngwa ti ti Rimam mam utense ru ba ti usir ti yaka ne. 22Á baa, Rimam na ko si-wu usir yi be, iken ti site unyang iki ú nwangru-ba be. Amaa, ikyaen ande ti awu tsitsab, awu u ko si usir yi.”

23“Asiti unde iki a ri te ni baa, ‘Ni sae ike, né Unde wu ti Rimam tsab tsi ta ri, ko ta akwen,’ ni ru-ni uwae kinjo uwog-ba be. 24Ikyaen ti, ande tikong ti ande ti ku ya iskin ira Rimam tikong u nwunn u nde wande ti ku fur ayib ti yang-yi ti a u kyaefa ande, kwer ti ande ti Rimam tsitsab. 25Ni nung nyinyang. Ame ku ri te ni ira yine ti ti kiye-yi ba-yi khika be.”

26“Asiti ande iki a ba ri te ni baa, ‘Ni sae, nee awu ti ta kutur khika akwen,’ ni ka-ni atang be. Asiti a ri te ni baa, ‘Awu ta uwae kusog ike,’ ni ru-ni kubenti atang be. 27Ikyaen ti Umbae Unde u ba pangma imam ti ku jaen wur apwa apupwen tsi kujwo usir ti kiskinn ru fe ye kujwo usir ti ureb.

28“Uwog ti rukom a ta atang, indo u ru ka byir atang ama.

Iken ti u Nde Kiye ti Yesu u Kafe Ba

(Markus 13:24-27; Luka 21:25-28)

29“Uwae kiye wu, isim ti ande a ngwa tag rikaen yi, ti ritsen usir u byikyi, ushaen u tsen-wu cwucwo be. Aswer ti apupwen u jwunnsi yi riben, iken ti si te kuko apupwen u kyi ijwe. 30Isim yine ani u nung iken iki yi apupwen ti u tatso itiba Umbae Unde. Ande ti utense meme u jwub ira u sae Umbae Unde ku ba uwae abyi ti apupwen. Awu u ba ti kuko ti riyinn. 31A u kunn kutumu ti ribom, ama awu u tom atom-wu ti apupwen kaá byir tag ande Rimam ti awu tsab tsi uwae utense meme.”

Kutuku Kututung

(Markus 13:28-31; Luka 21:29-33)

32“Ni naa atong ti m u kwen na ni ira risu kutuku kututung. Kiye ti kukya-wu a shab ruye, atsing-wu ama a kafe irum tirisub u mbagta, ani nungye baa, ushaen kufáen na kyang ku yaen pu wu. 33Ayi u si ahan ama, kiye ti ani a sae iken yine, ani u nungye baa, usir ti ricwunnkyi na kyang ku yaen pu wu. 34Ame ku ri te ni kubenti, meme iken yine u nde titawe ande ti ta utense tine u cwu tag! 35Apupwen ti riben u yafe, amaa ira-m u yafe-yi fe ama be.

Yesu u Ba Purug Ande ti Utense

(Markus 13:32-37; Luka 17:26-30,34-35)

36“Unde iki nung-wu usir wu ko kiye wu be. Ko atom Rimam ti apupwen ko awu Umbae Rimam ti risu-wu nung-wu be, se Itse amam. 37Itiba na Umbae Unde u pangma iken ti nde kiye Nuhu. 38Pangma kiye Nuhu ti ambyi wen tag-yi ande khika be, ande ku ci ku ngwa ku mbe anda ku fe atso ba sang usir ti Nuhu sang uwae kuyae. 39Aba nung-ba iken ti ku nde be, se kiye ti ambyi ba su pu ba ru. Ayine si ahan ama kiye ti umbae unde u ba. 40Uwae kiye wu ande ifaen u ku tom ritom uwae risaen ufang. A u ye ra uriki ru u ya ti ifaen ta ti isim. 41Anda ifaen u ku pwa awum ricwo. A u ye ra kinjo ru u ya uti ifaen ta. 42Ni som ti ujwin ikyaen ti, ani nung-ni usir ti Itsekuru-ni Rimam u ba atang be. 43Ni tangsom baa, á baa, unde ti kununn na nung kiye ti unde ti riyib na ku ba, awu ú tsi ujwin u cwe-wu ti unde ti riyib na sang ka yib riyib kusog-wu be. 44Ikyaen yine, ani ama, ni som ti ujwin ko kiye titini, ikyaen ti, ani nung-ni kiye ti Umbae Unde u ba be.

Upyi Tinyang ti Upyi Titibi

(Luka 12:41-48)

45“Upyi ti tinyang ti ben ayib si upyi ti unde ti kununn-wu sa wu tsi uwe apyi ti tsitsi ti wu na nda ba wuci-ba uwae kiye ti pang atang. 46Itinyang si ana upyi wu asiti unde ti kununn a ba tu wu ku nde wande-wu. Upyi wune u tsen utob! 47Kubenti ti ame ku ri te ni, unde ti kununn wu u sa upyi ti tinyang wune som tsa risu rifunn-wu meme. 48Amaa asiti awu a si upyi titibi, awu u kab ira ti utob-wu baa, ‘Unde ti kununn-m u kafe ba-wu ti kife be.’ 49Awu u ye apyi ti tsitsi byinn u ku ci u ku ngwa ku shaen te itaen ti ku ngwa iken. 50Unde ti kununn-wu u ka ba usir ti awu nung-wu be, u ba purug uwae kiye ti awu nung-wu be. 51Unde ti kununn wu u ba ye wu byinn yer byinn yer u ye wu sang uwog ti ande ti kufur ku sang atang. Uwog atang, ande u jwub ira u kub kujwo anyi.”

Currently Selected:

Matiyu 24: kubNT

Highlight

Copy