Matiyu 25

Kujwokwe Rimam Pangma Ukwab Unda Ishe

1“Kujwokwe ti apupwen si pangma anyisu wandab rijwe ti pu fitila-ba kaa kyangte ubaen unda ishe. 2Anyisu wandab itsong uwae-ba si ti askwab, itsong ti tsitsi ama ben ayib. 3Aba ti askwab bane kyangsu fitila, ama ye su-ba kindob iki fa atang be. 4Amaa, aba ti ben ayib ye su fitila fa ti kindob yi uwae kikwer-ba. 5Ubaen unda ishe wu ba-wu fife be, ama anyisu wandab ba skang kicwag ama kicwag ye pu ba ru.

6“Ti uka utitang, aba fxen ande ku shwu ushwu baa, ‘Ni sae ubaen unda ishe ba pu wu roo! Ni nwunn ti ni ka tu wu!’ 7Anyisu wandab bane shwu kicwag meme-ba, unde titini ko urwa fitila-wu tso. 8Aba ti askwab ku jwam kindob uwog aba ti ben ayib baa, ‘Ni si ra kindob-ni na ti ti ati u sa si fitila-ti ama be fitila-ti jim ku si si.’ 9Aba ti ben ayib abane ri te ba baa, ‘Ayi u ko-yi ati te ni be, ni ru yi uwog unde ti ku jabci yi ti ni ka jab.’ 10Ti anyisu wandab ti askwab itsong abane ru ti a kaa jab kindob, ubaen unda ishe ka ba. Ama aba ti som ti ujwin te wu sang yi kusog ukwab unda ishe, ama a ye ufu cwunnkyi.

11“Isim ayine, anyisu wandab ti kuskwab bane ba ku kwer kujwo ku ri baa, ‘Itsekuru, Itsekuru, mbub ta na ti ufu.’ 12Ubaen unda ishe cwe baa, ‘Iyee. Ame ku ri te ni kubenti, ame nung-m ani be.’ ”

13Isim ira yine Yesu ri baa, “Ni som usom ti ujwin ikyaen ti ani nung-ni usir wu ti kiye wu be.

Nde Wande te Iken ti Afu Site yi

(Luka 19:11-27)

14“Kujwokwe Rimam si pangma ti unde iki ku ru yi fengo rikyen u kunn ande ti imbyi-wu ira u sa rifunn-wu na ba kujwo. 15Awu kunn unde ti kucang u nda wu ayaen zinariya itsong. Unde ti ifaen, awu nda wu ayaen ifaen, unde ti ita awu nda wu riyaen kinjo amam. Awu nda ba aser pang ti ribom-ba ama u ru-wu iken-wu tiri. 16Awu unde ti mbe ayaen itsong, sa kiser-wu ru ka kafe ajwo atang u tu ayaen itsong som tsa risu-yi. 17Unde ti mbe ayaen ifaen ru ka kafe ajwo atang u tu ayaen ifaen som tsa risu-yi ama. 18Amaa, unde ti mbe riyaen kinjo ru ka mum riben u sa aser unde ti kununn-wu tam atang.

19“Isim kiye yang-yi unde ti kununn-ba awu ka kafe ba. Awu kunn byir ba ti a na ba pwen na wu iken ti a na nde te aser yi. 20Awu unde ti mbe ayaen itsong sa ayaen itsong som tsa risu-yi u sa ba uwe unde ti kununn-wu u ri baa, ‘Unde ti kununn, afu nda m ayaen itsong kiye ti afu ru ike. Ame kafe ajwo te yi u tu pu m ayaen itsong som tsa risu-yi, nee ayi ti ta ri.’

21“Itsekuru-wu ri te wu baa, ‘Suko ti itikwab, afu upyi-m ti tinyang ti kubenti! Afu nde wande ti kubenti te iken pang ti ame nda fu. Ikyaen yine ame u nda fu iken ti skeb ayine. Sang yi utob titsen ana itse-fu.’

22“Unde wu ti mbe ayaen ifaen ama sa ru ba, u ri baa, ‘Itsekuru, afu pu na m ayaen ifaen, ame ka kafe ajwo te yi u tu ayaen ifaen som tsa risu-yi ta ri.’

23“Unde ti kununn-wu ri te wu baa, ‘I nyang timambe, upyi-m ti tinyang ti kubenti. Afu kwab pu fu. Afu nde pu fu kubenti risu iken ti kpang ahan, ame u nda fu iken ti skeb ayine. Sang yi utob titsen ana Itsekuru-fu.’

24“Unde ti mbe riyaen kinjo ru ba ana-wu ti riyaen kinjo ti a nda wu u ri te itsekuru-wu baa, ‘Itsekuru-m, ame nung ira-fu kpag pang-yi. Uwog ti afu a yag-fu be, afu ku ndub pu ru-fu ru amam. Ande a skae tag awum-ba tsi afu ku ru ka ndub pu yi ru-fu ru ama. 25Ikyaen yine, ame ku kyen ikyenricwu-fu u sa kiser-fu awu ru ka mum riben u sa tam-m atang nae ku ji fu ama. Nee kiser-fu ta ri.’

26“Unde ti kununn-wu ri baa, ‘Afu upyi ti uyáng titibi! Afu nung baa, ame na ku bunn yi uwog ti si-yi ame ti tso be, ku ndub pu awum ti si-yi ame ti yag yi be ané? 27Nee ayi a si ahan, afu ú sa kiser-m ka nae kusog aser, ti ame ba ne, ame u mbe yi fa ti tsan risu-wu.

28“ ‘Ni mbe ra kiser wune ru kujwo-wu ti ni nda fa unde wu ti sa ayaen rijwe ba. 29Ame ku ri te ni baa, unde ti a site iken kujwo, a u sha iken na fa-wu atang. Awu u site iken ko timambe. Amaa, unde ti si-wu te iken kujwo be, ko iken kpang ti awu site, a u mbe ra yi uwog-wu. 30Ni ye upyi ti ukaen wune jwunn sang uwog ti byitang, uwog ti a u jwub ira u kub kujwo anyi atang.’

Rikwen ti Pwen Usir ti Ricwunnkyi

31“Kiye ti Umbae Unde u ba ti riyinn-wu ti meme atom-wu, awu u somtsa iken ti som-wu ti site riyinn. 32A u byir tag ande ti utense wune meme uwe-wu, awu ama u kata ba pangma ti unde ti ku shi iken ku kata iwentam ti iwenten. 33Awu u pu iwentam tsi kujwo rici-wu, ama iwenten, awu u pu tsi kujwo ife-wu.

34“Isim ayi awu ukwe wu u ri te aba ti ta kujwo rici-wu baa, ‘Ni ru ba ti ni ba ci rifunn itse-ni ti nde tsika ni, ani ande ti tu risu tinyang uwe Itse-m. Ni ba ti ni ci. Awu kyae iken yine tsika ni ti ti a mam utense wune. 35Ikyaen ti, ani nda m wuci kiye ti ame ku fxen ti rimenn. Kiye ti ame ku fxen ti unwaen ambyi ani nda m ambyi ame ngwa. Kiye ti ame sang rikyen kununn-ni, ani ye m ti ajwo ifaen. 36Ame tsi ribam, ani pu atupwa kukyi m. Ame nae kicaeb, ani ka kunnji m ira. A ye m kwer pursuna, ani ba uwog-m.’

37“Ande ba ti ku nde iken ti tinyang bane u rang wu baa, ‘Itsekuru-ti, ati tu-ti afu isinn ti afu shanum ti wuci ti afu ci, ne ati nda fu wuci? Ati tu fu isinn u nda fu ambyi ti ngwa? 38Ati tu fu isinn u pu fu sang ba kununn-ti? Ko ati tu fu isinn ti afu tsi ribam, ama ati pu atupwa si fu? 39Ati tu fu isinn ti afu nae kicaeb ko afu ta pursuna ama ati ba uwog-fu?’

40“Ukwe-ba wu ama u cwe baa, ‘Ame ku ri te ni kubenti, ti ani nde iken yine te unde ti yib siskeb uwae ameinja-m abane, ani nde yi te m.’

41“Awu a ri mam ira yine, awu u ri te aba ande ti ta kujwo ife-wu baa, ‘Ni ko ru ru uwe-m ike, ani ande ti ku nde iken titibi! Ni ru yi uwog urwa ti tsi kukunn ti Rimam kyae tsiji Shetann ti atom-wu. 42Ikyaen ti kiye ti ame ku cwu rimenn, ani nda-ni ame wuci be, ame ku cwu ti unwaen ambyi, ani nda-ni ame ambyi ti ngwa be. 43Ame sang rikyen uten-ni, ani kyangte ni ame anunn-ni be. Ame ku kyang ribam ani sha kutupwa na-ni ame be, ame nae kicaeb, ame nae pursuna, ani ka-ni uwog-m be.’

44“Tiri aba u ri baa, ‘Itsekuru, isinn ti ati nung fu ku fxen te rimenn, ko ti unwaen ambyi, ko ti afu sang rikyen, ko ti afu tsi ribam, ko ti afu nae kicaeb, ko ta-fu yi pursuna ama ati ndeya-ti afu be?’

45“Awu u ri te ba baa, ‘Ame ku ri te ni kubenti, ti ani nde na-ni unde ti yib siskeb uwae ande bane be, ani nde na-ni ame be.’

46“Ande bane u ru yi kusog urwa ti tsikukunn, ama ande ti som usom ti ti kubenti u ru yi kusog unyang ti tsikukunn.”

Currently Selected:

Matiyu 25: kubNT

Highlight

Copy