Matiyu 2

Ande ti Ru Uwe Usir ti Kiskinn Ba Kunnji Yesu

1A mbae Yesu uwae uten ti Betilami ti ta uwae uten ti Yawudiya. Kiye wu, Herodus si ukwe uten ti Yawudiya. Kiye wune, ande ti ben ayib iki ru uwe usir ti kiskinn ba Urushelima, 2ku rang baa, “Aka ti a mbae Ukwe Mbayawuda atang? Ati nung kititaen ti ku tso itimbae-wu uwe usir ti kiskinn, nee ati ba ti ti u fen wu.” 3Kiye ti Herodus fxen ira yine, utob-wu ndembeb. Ande ti Urushelima meme kyirunn ikyaen ira yi. 4Awu Herodus kunn byir ande ndufu ti ku fen Rimam, ti ande ti ku kwen na ande ira icwe, u rang ba uwog ti ande ndufu ti kute ri baa, a na u mbae unde wu ti Rimam tsab tsi, atang. 5Aba ri te wu baa, “A u mbae wu uwae uten Betilami ti ta uwae uten ti Yawudiya, ikyaen ti, uwae kutsingken na unde wu ti ku ya iskin ira Rimam, a ri atang baa,

6‘Afu Betilami,

ti ta uwae uten Yawuda,

afu si-fu uten ti isim

uwae uka tiyang tiyang

na uten Yawudiya be,

ikyaen ti,

unde ti site kuko

u ruye uwog-fu

ti u ru ba nae ukwe

risu ande-m Isirela.’ ”

7Ti Herodus fxen ira yine, awu kunn ande ti rikyen bane uwae kitam u rang ba kiye ti aba nung kititaen wu. 8Isim yine awu tom ba ru yi uten ti Betilami u ri te ba baa, “Ni ru ka rang nyang uwog ti a mbae umbae wu atang. Ani a tu pu ni awu, ni kafe ba ri te m, ti ame u ru kaa fen wu ama.”

9Ti ande ba fxen mam ira-wu ayi, aba nwunn u ye ikyin ti kyang-ba. Ti aba ta fengo ku ru, aba nungkyi kititaen wu ti aba nung ti kucang uwe usir ti kiskinn. Kititaen wu pu ba ru ka tsi uwog ti a mbae umbae wu atang. 10Kiye ti aba nung kititaen wu tsi atang, aba tsen utob si-yi ti ti ri be. 11Aba sang yi uwae kusog wu u ru ka nung umbae wu ti iya-wu Mberimu. Aba kú riben u kunnji umbae wu ira. Isim yine aba mbubta usu-ba u nda Yesu rinyangwae ti site aser timambe, zinariya ti umung akang frankisi fa ti kindob murr.

12Kiye ti a kunnji mam Yesu ira, Rimam fwa ba kusen uwae kurwa baa, aba na kafe ka-ba uwog Ukwe Herodus cwucwo be. Ikyaen yine aba putsa fengo iki u kafe ru yi uten-ba.

A Sa Yesu Ter Ru yi Uten ti Ejib

13Isim ti ande ti rikyen ba ru pu ba, atom na Rimam iki ba tu Yusufu uwae kurwa u ri te wu baa, “Sunwunn ti pura umbae wu ti iya-wu ter ru ka tam uten ti Ejib, se kiye ti ame a ri te fu titawe, ikyaen ti, ayi u tsi-yi tsi be Herodus u sha unyang umbae wu.” 14Ama Yusufu nwunn ti ukatitang u pu Yesu ti iya-wu ter ru yi uten Ejib. 15Aba som atang ba kwer kiye ti Herodus sa cwu. Iken yine nde ikyaen ti ayi ā kumunn ira ti Rimam ri ti kute, unju atom-wu baa, “Ame kunn umbae-m ruye uwae uten ti Ejib.”

Herodus Wen Anyisu Tinying

16Kiye ti Ukwe Herodus nungye baa, ande ti rikyen aba na kyaefa wu fa, awu tso rinae ko timambe. Awu nda ande-wu wen tag anyisu arom ti tinying ti ta uwae uten ti Betilami ti asang-ba tsi ifaen si yi isim. Awu myae kwer ti ira ti awu fxen unju ande ti rikyen ba, kwer ti kiye ti aba nung kititaen wu apupwen.

17Ayine kumunn ira ti a ri kute, unju na Irimiya unde ti ku ya iskin Ira Rimam baa,

18“A fxen ufxenjwin uwae uten ti Rama,

ufxenjwin na ira ti jwub,

ti ukunn ricwu ti tso.

Rahel ku jwub ira ikyaen anyisu-wu.

Awu jwub ira u pyir ira ande

ti ku ri jim wu utob,

ikyaen ti,

meme anyisu-wu cwu tag pu ba.”

A Pu Yesu Nwunn Ejib Kafe Ba ti Isirela

19Kiye ti Ukwe Herodus cwu pu wu, atom na Rimam iki ru ba tu kyi Yusufu uwae uten Ejib 20u ri te wu uwae kurwa baa, “Nwunn ti pu umbae wu ti iya-wu kafe ru yi uten na Isirela, ikyaen ti, ande ti ku sha ti a u wen wu cwu pu ba.” 21Ama, Yusufu nwunn u pu umbae wu ti iya-wu kafe ru yi uten na Isirela.

22Amaa, ti awu fxen baa, Arkelawus umbae ukwe Herodus na tsokyi pu wu ukwe itse-wu Herodus uwae uten ti Yawudiya, ikyenricwu ye Yusufu ti awu u ka atang. Ama Rimam tom atom-wu ba uwog-wu u fwa wu kusen yi uwae kurwa. Ikyaen yine awu nwunn u ru yi uten ti Galili, 23u ru ka som uwae umbae uten iki ti a ku kunn baa, Nazareti. Awu nde ayine ikyaen ti a na kumunn ira ti ande ti ku ya iskin ira Rimam ri kute baa, “A u kunn wu baa, unde ti Nazareti.”

Currently Selected:

Matiyu 2: kubNT

Highlight

Copy