Matiyu 3

Yohana Unde ti ku Nde Batisma

(Markus 1:1-8; Luka 3:1-18; Yohana 1:19-28)

1Uwae kiye wune, Yohana ti ku nde batisma ba ku ya iskin ira Rimam uwae kutur khika ti ta uten Yawudiya 2baa, “Ni kafe isim ta ikentitibi-ni ikyaen ti, Kujwokwe Rimam fer mam pu yi.” 3Yohana wune si unde wu ti Ishaya unde ti ku ya iskin ira Rimam ri ira risu-wu ti kute baa,

“Unde ku ya iskin uwae kutur baa,

‘Ni kyaenyang fengo Itsekuru

tsi ji wu!

Ni ndab ta uwog ti kukwer

ti wu ba putsa atang!’ ”

4Kutupwa Yohana ti awu ku si, a ndxob yi te asung ikyinnsu ti kumunn isim.#3:4 Ikyinnsu ti kumunn isim si rakumi. Sae foto-wu uwae shafi 31. Awu taen kupwa yir ritxim imbyi-wu. Wuci-wu si ayag ti ijaen iwog. 5Ande ku nwunn Urushelima ti imbae uten ti Yawudiya ti imbae uten ti ta unju unyim ti Yordan meme ku ru ba uwog-wu. 6Aba ku fxir ikentitibi-ba, ama awu ku nde na ba itijwosaen ti ku cwucwe#3:6 itijwosaen ti ku cwucwe. Ti ti kiye na Yesu, Mbayawuda ti ku sha ti a u sang kusog Rimam ti a jwam Rimam, aba tawe u jwo ijwe-ba uwae ambyi ti ande ti uwe pu kyae tsi ikyaen wande yine. Yohana sa ira yi u ku nde wande atang baa, unde ti ku sha ti wu sang Kujwokwe Rimam na u jwo kang ijwe itawe. Né iken ti nde awu ku nde na ba itijwosaen wune. A ku kunn yi baa, batisma yi unju Mbahelene. uwae unyim ti Yordan.

7Ande ndufu iki ti ta kumbub Farisi ti kumbub Saduke yang-ba akwen ba uwog-wu ama. Ti awu nung ba ku ba, awu ri te ba baa, “Ani anyisu ajwae ti ikob, aye ti ri te ni baa, ani na ter nwang rinae Rimam ti si ku ba risu-ni? 8Ni nde iken ti u tso baa, ani na ya ikentitibi-ni ta pu ni. 9Ni kab-ni baa, ani na u nwangru uwae rinae Rimam ikyaen ti Ibrahim na si itse-ni be. Ame ku ri te ni kubenti, Rimam u nde tu ti wu u nda atxom ne kafe anyisu Ibrahim. 10Ko tine, rikae ta pu wu imbyi ituku ti a u yer wu si riben. Kutuku ti a waen-wu awaen ti tinyang be, a u tur ra wu si riben u pu sang urwa. 11Ame ku nde na ni batisma ti ambyi. Ayi ku tatso baa, ani na ya ikentitibi-ni ta pu ni. Unde wu ti ku ba isim-m u ru ba nde na ande batisma ti Kusung Rimam, ti urwa. Awu skeb pu wu ame ti kuko. Ame ko-m ti m u pu ajwo-m ye apwafxen-wu be. 12Awu ye su kutukwab-wu kujwo ti wu u ru ba skae awum atang. Awu u pu ayaen awum si uwae kurug, ama ifwen-yi awu u yaen yi si uwae urwa ti ku ten u ku jim-wu jim be.”

Yohana Nde na Yesu Batisma

(Markus 1:9-11; Luka 3:21-22)

13Tiri, Yesu nwunn Galili ru yi unyim ti Yordan u ru ba tu Yohana ti Yohana na nde na wu batisma. 14Ama Yohana sha ti wu u shishaen u baa, “Ame ku sha ti afu na nde na m batisma, afu kyang rimang u ru ba tu kyi-fu ame?”

15Yesu ri te wu baa, “Nde na-fu ame titawe, ikyaen ti, ayine ti si fengo ti ati u kumunn iken ti Rimam ku sha.” Ama Yohana cwe u nde na wu batisma.

16Isim ti a nde mam na Yesu batisma, awu tso ba yi ukunn. Ti ritsen, apwa apupwen mbubta, awu sae Kusung Rimam si ku ba pangma kikwae u ba som tsa risu-wu. 17Ti a u nunung, afxenjwin si apupwen ba ku ri baa, “Awune si Umbae-m ti riyaen utob-m, ame ku tsen utob te wu.”

Currently Selected:

Matiyu 3: kubNT

Highlight

Copy