Luka 3
3
Yohana Unde ti ku Nde Batisma
(Matiyu 3:1-12; Markus 1:1-8; Yohana 1:19-28)
1Uwae kusang ti fa ti rijwe asu itsong na Ukwe Tiberiya Kaisar, kiye ti Buntus Bilatus si unde ti uwe uten Yawudiya, Herodus si ukwe ti Galili, inja-wu Filip si ukwe na uten ti Ituriya ti Tirakonitu; Lisaniya ama si ukwe na Abilene. 2Anas ti Kayafas si akwen Rimam tiyang kiye wu. I si kiye wune ti ira Rimam ba tu Yohana umbae Zakariya uwae kutur. 3Awu nwunn ku kyang pakob meme uten ti fer ti uyinn ti Yordan ku ya iskin baa, ande na ā ya ikentitibi-ba ta, u nde batisma ikyaen ti Rimam na u ya ta na ba ikentitibi-ba. 4Pangma ti Ishaya unde ti ku ya iskin ira Rimam bae uwae Kutsingken Rimam baa,
“Unde iki ku ya iskin uwae kutur baa,
‘Ni kyae nyang fengo na
Itsekuru tsi ji wu.
Ni ndab ta uwog ti kukwer,
ti wu u ba putsa atang.
5Ni tae kyi meme akwae
ti ta fengo.
Ni mbub ambukunn ti abab rikwen
si yi riben,
ti ni ndab nyang yi.
Ni ndab nyang uwog ti kukwer
ti uwog ti atxom.
6Meme ande u nung unde
ti Rimam tom ru ba
ti wu na ru ba nwangru utense.’ ”
7Yohana ri te ande meme ti ru ba ku nde batisma uwog-wu baa, “Ani anyisu ajwae ti ikob! Aye ti ri te ni baa, ani na ter nwang rinae na Rimam ti ru ku ba? 8Ni nde iken ti u tso baa, ani na ya ikentitibi-ni na ta pu ni. Ani ku ri ira tetso baa, ani u nwangru uwae rinae Rimam ikyaen ti ani si anyisu Ibrahim! Iyee! Ame ku ri te ni kubenti, Rimam u nde tu ti wu u nda atxom yine kafe anyisu nà Ibrahim! 9Ani si ituku ti a sa rikae nae pu ba imbyi-yi ti a yer yi si si riben. Kutuku ti a waen-wu awaen ti tinyang be a u tur ra wu si riben u sa wu ru ka u twen mbub urwa.”
10Ande ba rang wu baa, “Ati u nde rimang tiri?” 11Yohana ri te ba baa, “Unde titini uwae-ni ti a site atupwa ifaen, awu ā sa kinjo na unde ti site-wu be. Unde ti site wuci, awu ā ndeya unde ti tu-wu be, ikyaen ti awu ā tu u ci ama.”
12Ande ti ku mbe aser ukwe ka ru ba ikyaen ti Yohana na nde ba batisma. Ama aba rang wu baa, “Unde ti uwe, ati ama re, ati u nde rimang?” 13Awu ri te ba baa, “Ni mbe-ni aser skeb aser ti a sa tsi be.”
14Akyirten ama rang wu baa, “Ati ama re? Ati u nde rimang?” Awu ri te ba baa, “Ni byinn fxaen mbe-ni iken unde iki be. Ni ri-ni ira itikong tsa unde iki be. Ni ye utob te iken ti a ku pae ni.”
15Iken yine meme nda ande kab ira ku rang ijwe-ba ira baa, iki be Yohana na si Unde wu ti Rimam Tsab Tsi, ti a bae ira risu-wu kute. 16Yohana ri te ba meme baa, “Ame ku nde na ni batisma ti ambyi, amaa unde wu ti ru ku ba skeb pu wu ame ti rurob. Ame ko-m ti m u tunn apwafxen-wu be. Awu u nde na ni batisma ti Kusung Rimam ti urwa. 17Awu sa kutukwab-wu fa mam pu wu kujwo ti wu skae awum. Awu u byir ayaen-yi ti tinyang si uwae kurug, ama ifwen-yi awu u pu si uwae urwa ti ku ten ku jim-wu jim be.”
18Uwae fengo ti tsotso, awu kwen na ande ira ti tinyang na Rimam u ku ri te ba ti a na kafe utob-ba. 19Ama awu ku fwan Ukwe Herodus kibyag ikyaen ti awu Ukwe Herodus ye pu Herodus uwa inja-wu mbe. Awu ku nde ikentitibi iki ama ti tsotso. 20Ama ricwunnkyi-yi, awu nde kyi ikentitibi iki ti skeb ayi ti kucang u ru ka ye Yohana cwunnkyi pursuna.
21Uwae kiye wu ti Yohana ku nde na ande meme batisma, awu nde na Yesu ama. Isim ti Yesu nde mam pu wu batisma u tsi ku jwam Rimam, apwa apupwen mbubta. 22Kusung Rimam si ba risu-wu yi ijwe na kikwae. Ufxenjwin si apupwen ba baa, “Afu si Umbae-m ti riyaen utob-m. Ame ku tsen utob te fu timambe.”
23Yesu nde asang rijwe ita itawe awu ye wande-wu ti ti nde. A sa wu tsi baa, awu na si umbae Yusufu.
Yusufu si umbae Heli.
24Heli si umbae Matati.
Matati si umbae Lawi.
Lawi si umbae Meliki.
Meliki si umbae Janai.
Janai si umbae Yusufu.
Yusufu si umbae Matatiya.
25Matatiya si umbae Amos.
Amos si umbae Nahum.
Nahum si umbae Esili.
Esili si umbae Nagai.
26Nagai si umbae Mati.
Mati si umbae Matatiya.
Matatiya si umbae Semeyin.
Semeyin si umbae Joseki.
Joseki si umbae Joda.
27Joda si umbae Jowanan.
Jowanan si umbae Resa.
Resa si umbae Zerubabel.
Zerubabel si umbae Sheyatiyel.
Sheyatiyel si umbae Neri.
28Neri si umbae Meliki.
Meliki si umbae Adi.
Adi si umbae Kosam.
Kosam si umbae Elmadam.
Elmadam si umbae Er.
29Er si umbae Jeshuwa.
Jeshuwa si umbae Eliyezer.
Eliyezer si umbae Jorim.
Jorim si umbae Matati.
Matati si umbae Lawi.
30Lawi si umbae Simeyon.
Simeyon si umbae Yawuda.
Yawuda si umbae Yusufu.
Yusufu si umbae Jonam.
Jonam si umbae Eliyakim.
31Eliyakim si umbae Meleya.
Meleya si umbae Menna.
Menna si umbae Matata.
Matata si umbae Natan.
Natan si umbae Dawuda.
32Dawuda si umbae Jese.
Jese si umbae Obed.
Obed si umbae Bowazi.
Bowazi si umbae Sala.
Sala si umbae Nashon.
33Nashon si umbae Aminadab.
Aminadab si umbae Adimin.
Adimin si umbae Arini.
Arini si umbae Heziron.
Heziron si umbae Perezi.
Perezi si umbae Yawuda.
34Yawuda si umbae Yakubu.
Yakubu si umbae Ishaku.
Ishaku si umbae Ibrahim.
Ibrahim si umbae Tera.
Tera si umbae Nahor.
35Nahor si umbae Serug.
Serug si umbae Reyu.
Reyu si umbae Peleg.
Peleg si umbae Eber.
Eber si umbae Shela.
36Shela si umbae Kayinan.
Kayinan si umbae Arpahadi.
Arpahadi si umbae Shem.
Shem si umbae Nuhu.
Nuhu si umbae Lameki.
37Lameki si umbae Metusela.
Metusela si umbae Enoki.
Enoki si umbae Jared.
Jared si umbae Mahalalel.
Mahalalel si umbae Kayinan.
38Kayinan si umbae Enos.
Enos si umbae Seti.
Seti si umbae Adamu.
Adamu si umbae Rimam.
Currently Selected:
Luka 3: kubNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
