Luka 2

Itimbae ana Yesu

(Matiyu 1:18-25)

1Uwae kiye wune, Ukwe Kaisar Agusita sa icwe ruye baa, ande ti utense meme na ru ba ti ande ti uwe uten na bae rinyi-ba. 2Ayine si ande ti pwen ti kucang ti aba nde. A nde yi kiye ti Kiriniya si gomna na uten ti Siriya. 3Unde titini kafe ru ti uten-wu ikyaen ti wu na ka nda ba rinyi-wu ikyaen na ande ti pwen yi.

4Yusufu ama nwunn Nazareti ti ta uten Galili, u ru yi Betilami ti ta uten Yawudiya, uwog ti a mbae Ukwe Dawuda atang, ikyaen ti, awu ta uwae rishi Dawuda. 5Awu ku ru ti wu na sa rinyi-wu ru ka na ande ti ku pwen ande. Awu te uwa-wu Mberimu putsa atso. Kiye wune, Mberimu site rishwu. 6Kiye yi ti aba ta atang, Mberimu sang umbae ti pwe, ikyaen ti, rishwu-wu ben mam ti wu mbae umbae. 7Awu mbae umbae ti urom, umbae rifen-wu, u pu atupwa umbae ibyan burkyi wu u sa wu nae fa uwae kupam ti asinn ku ci wuci-yi atang, ikyaen ti, uwae kusog rikyen atang uwog ta-yi ti a u sang atang be.

8Uwae uten wu, ande ti ku shi mbawen ta atang. Aba nae fuyen na uten wu ku nungkyi asinn-ba utitang. 9Ti aba u nunung, atom Rimam sī ba tatso risu-wu uwog-ba, ama riyinn na Itsekuru pakob ba. Ikyenricwu ye ba si-yi ti ti ri be. 10Atom Rimam ri te ba baa, “Ni kyen-ni ikyenricwu be, ikyaen ti, ayi si ira ti tinyang ti ame sa ba ku na ni roo! Ayi si ira ti u nda ande meme patag tsen utob. 11Yaka ne uwae uten na Ukwe Dawuda a mbae na pu ba ani unde ti u nwangru ni. Awu ti si Unde wu ti Rimam Tsab Tsi! Awu ti si Itsekuru-ti. 12Iken ti u nda ni nungye baa, ira yine na si kubenti ta ri. Asiti ani a ka pu ni, ani u nung umbae wu nae fa uwae kupam ti asinn ku ci wuci atang. A bur wu ti atupwa umbae ibyan.”

13Ti awu u nunung, atom na Rimam iki yang-ba akwen si ba tu atom wu ti tsi ne, aba ku teb Rimam ku ri baa,

14“Rurob ā si ana Rimam ti skeb tag patag.

Kujimshwur ā ba uwog ande ti awu ku tsen utob te ba uwae utense.”

15Isim ti atom ba kafe tso yi apupwen u ya ba ta, ande ba ti ku shi asinn ri ira te atso baa, “Ti ru yi Betilami ti ti ru ka nung iken yi ti Itsekuru ri te ti ne.”

16Ikyaen ayine aba nwunn ti kufe u ru ka nung Mberimu ti Yusufu, ti umbae ibyan wu ti nae fa uwae kupam ara. 17Kiye ti aba nung mam pu ba umbae wu, aba tsag te aba Yusufu ira ti aba fxen uwog atom Rimam risu umbae wu. 18Meme ande ti ta atang, ti aba fxen ira yi ti ande ti ku shi iken ri te ba, ayib fur ba! 19Mberimu ti risu-wu sa ira yi meme tsi riyaen utob-wu u ku myae yi myae. 20Ande ba ti ku shi iken kafe ru, u tsi kunn ti ku teb rinyi Rimam ikyaen meme iken ti aba fxen u nung, si ti mbwe-yi ti atom Rimam ri te ba.

21Uwae usir ti itsongta, a tsen na umbae wu kutxin u fwa rinyi-wu baa Yesu, rinyi ti atom Rimam ri te ba ti ti a kyaen-ba rishwu-wu khika be.

A Sa Yesu na Rimam

22Kiye nde pu yi ti a kaa jwo saen ijwe-ba pangma ti Icwe Musa ri, ama aba tso yi Urushelima. Aba sa umbae wu tso yi atang ama, ikyaen ti aba sa wu ru ba tso Rimam. 23A nde yine ikyaen ti, a bae uwae icwe Rimam baa, meme umbae ti kucang ti urom ti a mbae, a na sa wu na Rimam. 24Aba ru ama ikyaen ti a kaa yerwen iken na Rimam pangma ti a ri uwae icwe na Rimam baa, “Imbae akwae ifaen ko imbae abeb ifaen.”

25Unde iki ta Urushelima ti a ku kunn wu baa Simeyon. Unde wune si unde ti ku nde iken ti tinyang uwe Rimam ama som usom ti saen kyag u som ku ji unde ti u nwangru Isirela. Kusung ti Saen Kyag te wu ta tetso. 26Ti kucang-yi Kusung Rimam tatso wu baa, awu na u cwu-wu be se ti awu a nung pu wu itiba na Unde wu ti Itsekuru-ti Rimam Tsab Tsi titawe. 27Usir iki Kusung Rimam nda wu nwunn ru ba sang kusog Rimam tiyang. Ayi si sí kiye ti Yusufu ti Mberimu pu Yesu sang ba kusog Rimam ti a ba nde iken ti Icwe Rimam ri. 28Simeyon ye ra umbae wu fa ajwo u teb rinyi Rimam baa,

29“Itsekuru-m, yata ti upyi-fu ā cwu-wu tiri uwae kujimshwur pangma ti afu ri.

30Ikyaen ti, ayib-m sae pu yi

fengo itinwangru-fu

31ti afu kyae tsi ikyaen na

ande ti utense meme.

32Awu u si urwa ti u tatso

ande ti si-ba ande-fu be

fengo ti ana-fu.

Ama awu u shir riyinn ba

uwog ande-fu, ande Isirela.”

33Ayib fur Yusufu ti Mberimu risu ira ti Simeyon ri risu umbae-ba. 34Ama tiri Simeyon jwam itinyang na Rimam si ba risu-ba u ri te Mberimu, iya umbae wu baa, “Rimam tsab ra pu wu umbae wune ikyaen ti ande ti Isirela yang-ba na nwangru. Ikyaen na wu cwucwo ande yang-ba akwen ama u jwunnsi. Awu u si unde ti ku tso kuko na Rimam, amaa ande yang-ba akwen u rimbeb rinyi-wu, 35ama ira ti kab ti ta utob ande kuko u nae ise. Afu ama, ayi u nde fu pangma a na ku ter fu kisim ti utob.”

36Uwae kiye wu, unda ti ku ya iski ira Rimam iki ta atang ti a ku kunn wu baa, Anna. Itse-wu si Fanuwel ti rishi na Asher. Awu kyaen pu wu. Ti kucang awu nde asang itsongfaen te ubaen-wu itawe ubaen-wu cwu. 37Isim ayine, awu som usom uwa icwu yine ka asang mae inje asu inje. Usirtaen ti utitang awu ku jwam Rimam, u ku fen Rimam u ku cwe unju uwae kusog Rimam tiyang. 38Kiye ti a sa Yesu sang ba kusog Rimam, unda wune nde fxaefa na Rimam, u nwunn ku ri ira risu umbae wu te meme ande ti som ku ji usir ti Rimam na u sa ru ande ti Urushelima uwae rikaen.

39Isim ti a nde mam pu ba iken ti a bae uwae Icwe Rimam, Yusufu ti Mberimu kafe ru ti uten Galili u ka ru fe kununn-ba Nazareti. 40Umbae wu ser tso u bom. Awu ben ayib si-yi ti ti ri be, u tu risu tinyang uwe Rimam.

41Ko kusang titini, Yusufu ti Mberimu ku ru ka Urushelima ikyaen na Ukwab Itiyafe. 42Kiye yi ti Yesu ka asang rijwe asu ifaen, aba nwunn tso yi Urushelima pangma ti aba ku nde kob. 43Isim ti aba ci mam pu ba ukwab u nwunn kafe ku ru yi kununn, Yesu som-wu ti isim ti uwae Urushelima, ite-wu ti iya-wu nung-ba be. 44Aba ku tang baa, awu na putsa pu wu kumbub ande iki ti kafe ku ru yi kununn ama. Ti aba kyang ikyin usir kinjo ba sang usir jwo ureb, aba sha rifab-wu uwae ameinja-ba ti ande ti ure-ba. 45Amaa, aba tu-ba wu be. A kafe ba ti Urushelima, ku rang ku sha wu. 46Isim usir ita ti a ku kyang ku sha wu, a ru ba tu wu uwae kusog Rimam. Awu som fa kutampwa ande ti ku kwen na ande iken, ku naa kutong ama ku rang ba ira. 47Meme ande ti fxen wu nung ira yi ayi si iken ti ku fur ayib. Meme ande ti fxen wu, rijwen si ba ijwe ikyaen iken meme ti awu nungye, ti ira ti awu ku ri. 48Kiye ti Yusufu ti Mberimu ru ba tu wu, ayib fur ba. Iya-wu rang wu baa, “Umbae, imi ti nde afu nda ti rikaen ahan? Ame ti ite-fu ndembeb utob ku sha fu ti kucang akwen.”

49Awu ri te ba baa, “Ikyaen imi ti ani ku sha rifab m? Ani nung-ni ti ame u som kang uwae kusog Ite-m be a?” 50Aba nungye-ba ira ti awu ri te ba ne be.

51Ama tiri awu nwunn u putsa ba si ba yi Nazareti. Awu nae risu riben te ba. Iya-wu sa iken yine meme tsi riyaen utob-wu.

52Yesu ko ben. Ribom ijwe-wu ti ben-ayib-wu ko fufa. Ama awu tu risu tinyang uwog Rimam, ti uwog ande meme ko fufa ru yi uwe.

Currently Selected:

Luka 2: kubNT

Highlight

Copy