Luka 1
1
Ira Titawe
1Ande yang-ba akwen kwab u bae ira risu iken ti nde kutampwa-ti. 2Ira ti aba bae si sí ira ti ati kyangte uwog ande ti nung iken yi ti ayib-ba ti kucang u sa yi kyang ku ri te ande. 3Ikyaen yine, unde ti uwe, Teyofilos, ame tang baa, ayi na u nyang ti ame ama u bae ira risu iken yi ti imbyi ti imbyi na fu, ikyaen ti, ame nung putsa ira yi meme uwae asang yang-yi ti wur ru ne. 4Ame ku bae yi ikyaen ti afu na nung kubenti iken ti a kwen na fu.
Itimbae na Yohana
5Uwae kiye na Herodus, Ukwe Yawudiya, unde iki ta atang, rinyi-wu si Zakariya, awu si kukwen Rimam u ta kumbub na Abija. Uwa-wu ama si rishi Aruna ti rinyi-wu si Elizabet. 6Zakariya ti uwa-wu som usom ti saen kyag uwe Rimam. Aba ku putsa icwe Rimam meme, u ta-ba te riraen be. 7Amaa a mbae-ba umbae be, ikyaen ti Elizabet si unda ti kunn utsob. Meme ifaen-ba kyaen tag pu ba, si-yi ti a u mbae tu anyisu cwucwo be.
8Usir iki Zakariya nwunn ku nde wande uwae kusog Rimam, ikyaen ti kumbub-wu ti ku fen Rimam kiye wu. 9Pangma ti ayi ta yi icwe na kukwen, a tsab Zakariya yi fengo iticaen, ti awu na sang ka ten iken ti ku nung kuyang uwae kusog Rimam.
10Ti awu ta uwae kusog atang, meme ande na Rimam funn ise ku jwam Rimam ikyaen ti, ayi si kiye ti a ku ten na Rimam iken ti ten. 11Ama ti Zakariya u nunung, atom Rimam ti apupwen ru ba tsi te wu atang. Awu tsi kujwo rici na kuta ti a ku ten umung iken ti ku nung kuyang atang. 12Ti Zakariya nungye atom wu, unyang kunn wu, ayib fe wu, ikyenricwu ye wu.
13Ama atom wu ri te wu baa, “Zakariya, kyen-fu ikyenricwu be, ikyaen ti, a fxen pu ba ira ti jwam-fu. Uwa-fu Elizabet u mbae na fu umbae ti urom. Afu u fwa rinyi-wu baa, Yohana. 14Afu u tu utob ti tsen u pam ipam; ande iki yang akwen ama u kam ashwu ti a mbae umbae wune. 15Ikyaen ti, awu u si unde tiyang uwe Rimam. Awu u ngwa-wu iken ti ku nda unde shishaen be. Awu u munn te Kusung Rimam ti ti awu ta uwae rishwu iya-wu. 16Awu u nda ande ti Isirela yang-ba akwen kafe ba uwog Itsekuru-ba Rimam. 17Awu u ru uwe Itsekuru u site kpakang utob pangma ana Eliya, u kafe utob ana abitse ba uwog anyisu-ba, u sa ande ti kpag risu kafe ande ti ben ayib ana usom ti saen kyag, u kyaenyang utob ande ikyaen itiba ana Itsekuru.”
18Zakariya rang atom wu baa, “Ame u nung iken ayine rimang? Ame kyaen tag pu m, uwa-m ama kyaen tag pu wu.”
19Atom wu ri te wu baa, “Ame si Jibirilu ti ku tsi uwe Rimam. A tom me ti m na ru ba ri ira te fu, ama ti m na sa ira ti tinyang yine ru ba na fu. 20Ira-m ayine u ba nde kang uwe ike, amaa ikyaen ti afu ru-fu kubenti uwae-yi be, afu u tsi kyi unju u ri tu-fu ira be, se usir ti iken yine a ru ba nde pu yi.”
21Ande ti funn ise som ku ji Zakariya. Aba ku kab iken ti nde itawe awu som yer uwae kusog Rimam.
22Kiye ti awu ka ru ba yi ise, awu ri tu-wu ira unju cwucwo be. Aba nungye baa, Rimam na tatso wu ira ti kitam uwae Kusog Rimam atang. Awu ku tso nyáng kujwo, ikyaen ti, unju-wu tsikyi pu yi.
23Kiye ti usir wande-wu yi mam tag, awu nwunn ru yi kununn-wu.
24Isim ira ayine uwa-wu Elizabet kyaen rishwu. Awu nde ishaen itsong u ruye-wu ise be, u ku ri baa, 25“Itsekuru-m Rimam ndeya pu wu ame tiri uwae rishwu ti ame kyaen ne. Awu sa ruye pu wu ame uwae rikwae ti wae ayib jwunn ande.”
Rimam Ri Ira te Mberimu
26Uwae ishaen ti fa ti itsongnjo na rishwu ti Elizabet kyaen, Rimam tom atom-wu ti rinyi-wu si Jibirilu ru ba kyi uwae imbae uten iki ti a ku kunn wu baa Nazareti, uwae uten ti Galili. 27Awu ru ka tu mbawandab iki ti rinyi-wu si Mberimu. Unde iki ti rinyi-wu si Yusufu, ti rishi na Ukwe Dawuda ye mam pu wu isam risu-wu ti wu na u mbe wu mbe. 28Atom wu ru ba uwog Mberimu u ba ri te wu baa, “Usuko! Itinyang si pu yi ana-fu. Rimam te fu ta te atso.”
29Ti Mberimu fxen ira yine, ikyenricwu ye wu si-yi ti ti ri be. Awu ku kab uwae utob-wu baa, ayine si itso ira ti kunnji ti rimang bara. 30Atom wu ri te wu baa, “Kyen-fu ikyenricwu be, Mberimu, ikyaen ti, afu tu pu fu risu ti tinyang uwe Rimam. 31Afu u kyaen rishwu, u mbae umbae ti urom. Afu u fwa rinyi-wu baa Yesu. 32Awu u si unde tiyang. A u kunn wu baa, Umbae Rimam. Itsekuru-ti u nda wu Kujwokwe na itse-wu Dawuda. 33Awu u nae ukwe risu rishi Yakubu tsi kukunn ike ru fife yi uwe. Itinae na ukwe-wu, ricwunnkyi-yi u ta-yi be.”
34Mberimu rang atom wu baa, “Ama ame u mbae umbae rimang ti ame nung-m urom khika be?” 35Atom wu ri te wu baa, “Kusung Rimam u si ba risu-fu. Kuko na Rimam u si ba munn fu munn. Ikyaen yine umbae wu ti afu u mbae, a u kunn wu baa Umbae ti sisaen, u si Umbae Rimam. Awu u site-wu ti ikentitibi be. 36Cwucwo, mbiya-fu Elizabet ti kyáen tag ne kyaen pu wu rishwu ti wu mbae umbae ti urom. Awu ti ande ku kunn wu baa, unda ti kunn utsob, awu kyaen pu wu rishwu. Ushaen wune fa ti itsongnjo tine. 37Uwog Rimam, iken meme kpag-yi kpag be.” 38Mberimu ri baa, “Ame si upyi Rimam. Meme ira ti afu ri ne ā nde pangma ti afu ri.” Ama atom wu nwunn u ya wu ta.
Mberimu Kunnji Elizabet Ira
39Ayi tsi-yi tsi be, Mberimu nwunn, u ru fengo rikyen yi imbae uten iki ti ta imbyi rikwen uwae uten Yawuda. Elizabet ti ubaen-wu Zakariya ta imbae uten iki ti ta imbyi rikwen uwae uten Yawudiya atang. 40Ti awu ka pu wu atang, awu sang kununn Zakariya, u ka kunnji Elizabet ira.
41Ti Elizabet fxen kikunnji Mberimu, umbae ti ta rishwu-wu Elizabet fxae kafe. Ama tiri Kusung Rimam si ba kumunn Elizabet. 42Awu ri ira tso ti ribom baa, “Titinyang si ana-fu kutampwa anda, ti tinyang ama si ana umbae ti afu u mbae! 43Ayi nde rimang ti iken yine nde te m ti iya Itsekuru-m ba ku nung m? 44Ti ame fxen kikunnji-fu, umbae ti ta uwae rishwu-m fxae kafe ti ushwu ti shwu. 45Afu u tu itinyang yine ikyaen ti, afu ru kubenti uwae ira ti Itsekuru-ti Rimam ri te fu.”
Mberimu Teb Rimam
46Ama Mberimu ri baa,
“Ame ku teb rinyi Itsekuru-m
ti utob-m meme.
47Utob-m tsen ikyaen na Rimam
ti nwangru m.
48Ikyaen ti, awu nung risi-m,
ko ti ame si-m iken iki be.
Tsi ike ru yi uwe ande
u kunn me baa,
unda ti tu itinyang Rimam.
49Awu ti skeb ande meme
nde na pu wu ame wande tiyang.
Rinyi-wu si itisaen kyag.
50Ande ti ku kyen ikyenricwu wu,
awu ku sae ba ti ayibrisi.
Anyisu-ba ama u tu rinyangwae-wu,
ti anyisu ti ku ba isim-ba
ru fife yi uwe.
51Awu nde wande tiyang
te kujwo-wu
u rwae shag tag pu wu
ande ti ku ndub risu,
ku sae ru ande ti tsitsi.
52Awu shir ande ti uwe
si pu wu riben.
Ande ti nae risu riben ama,
awu shir ba nwunn pu wu ritsen.
53Awu sha wuci ti tinyang
na pu wu ande ti rimenn ye ba.
Awu jae ande ti rifunn ru ti ajwo ukaen.
54Awu ndeya pu wu upyi-wu Isirela.
Awu tangsom te ba
u nung ba ti ayibrisi,
55pangma ti awu yer unju
te abitse-ti, ti Ibrahim,
ti ande ti ru ba isim-wu
ru fife yi uwe.”
56Mberimu som te Elizabet ka ishaen ita u kafe ru ti yi kununn-wu.
57Uwae kiye wune ama tiri rishwu Elizabet ben pang pu wu ti wu u mbae umbae. Awu mbae umbae ti urom. 58Kiye ti ande Elizabet ti ande ice-wu fxen baa, Rimam na nde na pu awu itinyang, aba tsen utob te atso.
59Usir ti fa ti itsongta aba sa umbae-wu ba ti a na tsen wu kutxin. A ku pwen ti a na u fwa rinyi-wu baa Zakariya pangma rinyi ite-wu. 60Amaa iya-wu ri baa, “Iyee! A u kunn wu baa, Yohana.”
61A ri te wu baa, “Uwae rishi-ni, rinyi unde iki si ahan a?” 62A ru ka pwen asae te Zakariya, ku sha ti a nung rinyi ti awu ku sha ti a na fwa na umbae wu.
63Awu tso kujwo te ba baa, aba na nda wu iken ti a ku bae iken atang. Awu bae si uwae atang baa, “Rinyi-wu si Yohana.” Meme-ba, ayib fur ba timambe. 64Ti ritsen unju Zakariya mbubta, awu ku ri ira ku teb nyang rinyi Rimam. 65Ikyen ricwu ye meme ande ice-wu ti funn atang. Ira ayine shag kyi fe uwae uten Yawudiya meme. Unde titini ku ri yi. 66Meme ande ti fxen ira yi, a ku kab ira atang. Ama a ku rang atso baa, “Umbae wune u ba si-wu rimang?” Ikyaen ti, itinyang ana Itsekuru-ti Rimam te wu ta te atso.
67Uwog wune tiri, Kusung Rimam munn ite-wu Zakariya, awu nwunn ku ya iskin ira Rimam baa,
68“Itinyang ā si ana Itsekuru Rimam,
Rimam na Isirela
awu ti ru ba nwangru pu wu ande-wu.
69Awu ye nwunn pu wu
unde ti u nwangru ti,
ruye uwae rishi upyi-wu Ukwe Dawuda.
70Pangma ti awu ri ti kucang
yi unju atom-wu ti sisaen baa,
71awu na u nwangru ti uwae
kujwo na ande ti rika-ti
ti ande ti sa ti kuka.
72Awu kumunn pu wu
unju ti yer ti sisaen
ti awu yer ti abitse-ti baa,
awu na u nung risi-ti.
73Awu nde pu wu
iken ti awu yer unju
te itse-ti Ibrahim baa,
74awu na u nwangru ti uwae
kujwo na ande ti rika-ti.
Awu u nda ti riya ti ti u fen wu,
ati u kyen-ti ikyenricwu unde iki be.
75Ati na sisaen
ama u som usom ti pang atang,
tsi kunn ike ru fe yi uwe.
76Amaa, afu umbae-m,
a u kunn fu baa,
unde ti ku ya iskin ira Rimam,
Rimam ti skeb ti tag.
Ikyaen ti,
afu u ru uwe Itsekuru-ti
u ka kyae nyang fengo tsi ku ji wu.
77Afu u ka ri te ande-wu baa,
a na u ya ta na ba ikentitibi-ba,
aba na u nwangru
uwae rikwen Rimam.
78Ikyaen ti,
awu site ayibrisi timambe.
Pangma ti ucwefam ku yae
ti kiskinn,
ayi si ahan ama
awu u ba ti itinwangru.
79Awu u pu ande ti som uwae kufub
ba sang uwog ti sisaen,
ati ande ti ta uwae kusung iticwu,
ikyaen ti wu na tatso ti
fengo kujimshwur
ti ti na kyang atang.”
80Umbae wu ser ben, u kpag utob, ama som uwae kutur khika ba kwer ti usir ti awu ba tso risu-wu uwog ande na Isirela.
Currently Selected:
Luka 1: kubNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
