Kucangtsi 33

Yakubu ti Esuwa Ba Ye Ure Tetso

1Yakubu txaen pu ayib tso, u sae Esuwa ku ba ti ande ukob inje. Ama awu pu anyisu-wu ka fa Leyatu, ti Rahel, ti aba apyi-wu ti anda ifaen ajwo. 2Awu pu apyi bane ti anyisu-ba ta uwe, Leyatu ti anyisu-wu putsa, Rahel ama ti Yusufu putsa ba isim. 3Isim ayine, awu ti risu-wu ba tur meme-ba ru isim, ama u ru ba ta uwe u ku kyang ku si ku riben na inja-wu, atsepu itsongfaen, ama ka fer inja-wu tiri. 4Esuwa ter ka ye inja-wu Yakubu bur utob ama meme ifaen-ba jwub ira. 5Ti Esuwa txaen pu ayib tso u sae anda ti anyisu, awu rang baa, “Abane si arikam ti putsa fu?” Yakubu ri baa “Abane si anyisu ti Rimam uwae ayibrisi-wu, pu na upyi-fu.” 6Ama apyi ba ti anyisu-ba ko ru ba, ku riben. 7Ama Leyatu ti anyisu-wu ko ba ku riben. Ricwunnkyi, Yusufu ti Rahel ko ba fer u ku riben na Esuwa.

8Esuwa rang baa, “Atub ande ti ame tu kucang ku tso imi?” Yakubu ri baa, “Ikyaen ti ame ku sha kutxuwe titinyang uwog-fu unde ti uwe.”

9Amaa Esuwa ri baa, “Inja, iken ti ame site pang pu yi ame. Pu ana fu kafe ru-fu.”

10Ama Yakubu ri baa, “Iyee inja, asiti ame a tu kutxuwe titinyang uwe-fu, paembe kang rinyangwae yine kujwo-m. Kubenti, ti ame nung uwe-fu ne, si pangma ti ame nung kutxuwe Rimam, ti afu paembe m nyinyang ne. 11Afu a cwe ira, paembe iken yi ti ame pu ba ku na fu ne, ikyaen ti, Rimam nde m itinyang timambe. Awu nda m rifunn yang-yi.” Yakubu tsi ngháng te wu, ama Esuwa mbe kang iken yi.

12Ama tiri Esuwa ri baa, “Ati ru-ti tetso, ame u ta uwe, ani u putsa.”

13Yakubu ri baa, “Unde ti uwe-m, nung anyisu tinying ta afxen-ti, aba kpag-ba be, indag ama ku nyam imbae-yi. Asiti ati a shir pang-ti ayi uwae usir kinjo, ayi u cwu tag. 14Ikyaen ayine, unde ti uwe-m, ru-fu uwe, ame u kyang sku sku ti indag ti anyisu tinying ba ti ta afxen-m ne. Ati kaa tu-ti afu yi Seyir.”

15Ikyaen ayine, Esuwa cwe u ri baa, “Ayi a si ahan, ame u ya ande-m iki ta te fu ti ike.” Ama Yakubu ri baa, “Iyee, yata-fu. Iken ti ame ku sha si kutxuwe titinyang uwog-fu amam, unde ti uwe-m.” 16Ama, Esuwa kafe ti isim ru yi Seyir. 17Amaa Yakubu ye ikyin-wu ru yi Sukoti, u ka mbye kusog-wu atang, u kyae afug na indag-wu. Ikyaen ayine, a ku kunn uwog wu baa, Sukoti.

18Ama Yakubu nwunn Padan-aram, u ka sang Shekem yi uten Kanana, uwae kujim. Isim yi awu sim afug fuyen uten atang. 19Awu jab riben uwog ti awu sim afug-wu atang ti azurfa mae itsong, kujwo anyisu Hamor, ti si itse na Shekem. 20Atang awu mbye kuta u kunn rinyi kuta wu baa, El-Elohe Isirela.#33:20 Imbyi El-Elohe Isirela baa, Rimam ti si Rimam na Isirela.

Currently Selected:

Kucangtsi 33: kubNT

Highlight

Copy