Kucangtsi 34

Shekem Nae te Dina Uwae Kpakang

1Dina, umbae ti unda ti Leyatu mbae na Yakubu, nwunn kaa kunnji anda ba iki ti uten atang ira. 2Ti Shekem umbae Hamor urae Hivi, ti si Ukwe na uten wu, nungye Dina, awu ye Dina, u nae te wu, u nda wu rukwae. 3Shekem sae Dina nyang uwae-wu timambe, ama awu tsag akaen te wu skuu, 4ama u ka ri te itse-wu Hamor baa, “Ka pu wandab wune na m ti m mbe.” 5Yakubu fxen baa, a na ye unda-wu Dina na ndembeb pu ba, amaa, anyisu-wu ti arom ta-ba atang be. Aba ta kutur ku nungkyi iken ti shi-wu atang. Ikyaen yine, awu bwe-wu u som ku sae itiba anyisu-wu. 6Ama Hamor, itse Shekem, ru ti awu kaa tsag akaen ti Yakubu risu umbae-wu ti unda. 7Ti anyisu Yakubu kafe ba kununn, u fxen iken ti a nde te mbiya-ba, utob-ba ndembeb si-yi ti ti ri be, ikyaen ti, Shekem nde iken ti ku wae rukwae yi Isirela ti awu nae te Dina, umbae Yakubu ti unda. Iken yine kpang-yi atang be.

8Amaa Hamor ri te ba baa, “Umbae-fu Dina nyang uwae umbae-m Shekem timambe. Ame ku jwam fu, pu wu na umbae-m ti awu ā mbe, 9ti ti yeb uyeb tetso. Pu anyisu-fu ti anda baen ti, ti ati u pu anyisu-ti ti anda baen ni ama. 10Ani u som te ti ike. Nung riben ti nae ru ne. Ni nae, ti ni tom, ti ni nde rifunn atang.” 11Shekem ama ri te itse Dina ti ameinja-wu baa, “Ame u pu na ni meme iken ti ani ku sha, asiti ame a tu kutxuwe titinyang uwog-ni. 12Ni pu na m wandab wune ti m mbe ti ni kyéb na m iken uyeb ti ame u pae na ni ko ayi a si imwa.” 13Ama anyisu Yakubu cwe na Shekem ti itse-wu Hamor uwae kukyaefa, ikyaen ti, Shekem ye Dina ndembeb pu wu. 14Anyisu Yakubu ri te ba baa, “Ati ku nde-ti itso iken yine be. Ati u pu mbiya-ti baen-ti unde ti tsen-wu kutxin be. Ayine si iken ti ku wae rukwae uwog-ti. 15Amaa ati u cwe, asiti ani a tsen na anyisu-ni ti arom kutxin pangma ti ati ku tsen titawe. 16Asiti ani a nde ayine, ati u pu anyisu-ti ti anda baen ni, ama u mbe ana-ni. Ati u som tetso u kafe iken kinjo. 17Asiti ani a cwe-ni ti ni u tsen kutxin be, ati u pu mbiya-ti na-ti ani be.”

18Ira ti ri-ba ayi nyang uwae Hamor ti umbae-wu Shekem. 19Ikyaen ayine, umbae ti utaen wune ci-wu kiye ti awu u nde iken ti aba ri te wu be, ikyaen ti, Dina umbae Yakubu nyang uwae-wu timambe. Shekem site rurob timambe yi ishikununn itse-wu.

20Ikyaen yine, Hamor ti umbae-wu Shekem ru yi rishen ti ta ufu ti ku sang uwae uten, u ka ri te ande ti uten-ba baa, 21“Ande bane site ure te ti, ikyaen yine, ati cwe na ba ti a som uten-ti u tom wuci, u nde rifunn, ikyaen ti riben wune ko pu wu. Ati u mbe anyisu-ba ti anda, aba ama u mbe anyisu-ti ti anda. 22Ne ti si nyáng fengo ti ande ba u cwe u som te ti u kafe ande-ti, asiti ati a cwe ti ti tsen na anyisu-ti ti arom kutxin pangma ti aba tsen. 23Asiti ati a nde ayine, asinn-ba, ti rifunn-ba, ti ikentishi-ba meme u si ana-ti. Ikyaen yine, ati cwe te ba ti a som kutampwa-ti.” 24Ama meme ande ba ti funn rishen ufu ti ku sang uten wu, fxen ira Hamor ti umbae-wu Shekem ama cwe ira yi. Ama ko urom titini, a tsen na wu kutxin.

25Isim usir ita, kiye ti meme-ba ku fxen iticaeb ribang kutxin-ba, anyisu Yakubu ifaen, Simeyon ti Lawi ameinja Dina, nwunn u pu kisum wen-ba ka purug ande ti uten atang ama u ye meme arom ti uten atang yer wen tag. 26A ye Hamor ti umbae-wu Shekem u wen ba ti kisum wen, u pu ra Dina nwunn kununn Shekem. 27Anyisu Yakubu ti tsitsi sang ka su pu rifunn uwae uten atang ru ikyaen mbiya-ba ti Shekem nae te. 28Aba pu tag asinn-ba ti meme iken ti aba site uwae uten atang ru, fa ti ayi ti ta uwae risaen afang-ba meme ru. 29Aba su tag meme rifunn-ba, ti awa-ba, ti anyisu-ba, ti meme iken ti ta ishikununn-ba.

30Yakubu ri te Simeyon ti Lawi baa, “Ani shir ira na pu ni ame. Tine ande ti Kanana ti Perizi ti nae uwae uten ike u sa m kuka. Ati jwunn-ti be. Asiti aba a ren risu u pu rika ba kunn ti tine, ame ti ishikununn-m meme u cwu tag.”

31Amaa aba rang itse-ba baa, “Ti awu nde te mbiya-ti pangma iyaen ama re?”

Currently Selected:

Kucangtsi 34: kubNT

Highlight

Copy