Kucangtsi 35

Yakubu te Ande-wu Ru yi Betel

1Rimam ri te Yakubu baa, “Nwunn ti ru yi Betel ti ka som atang, ti mbye na m kuta atang, ame Rimam ti tu fu kiye ti afu ku ter inja-fu Esuwa.”

2Ikyaen yine Yakubu ri te ishikununn-wu ti meme ande ti ta te wu baa, “Ni pu meme apxin ti ani site yi ajwo-ni jwunn tika, ti ni jwo saen ijwe-ni ti ni fin atupwa-ni. 3Isim yine, ni ba ti ti tso yi Betel, ti m kaa mbye kuta na Rimam, awu ti fxen m kiye ti ame ta uwae rikaen. Ba kwar tine, ko aka ti ame a ru, awu te m ta tetso.” 4Tiri aba byir meme apxin ti aba site, ti iken atong-ba, u pu yi na Yakubu. Awu pu yi nji imbyi kutuku Terebinti#35:4 Terebinti si kutuku tiyang ti kwen timambe. ti ta fer Shekem.

5Ti aba nwunn kyang ku ru, Rimam nda meme ande ti nae pakob ba ikyenricwu. Ko unde kinjo rwae tsa-wu anyisu Yakubu be. 6Ama Yakubu ti ande-wu ka sang Luzi, ti si Betel tine, ti ta uten ti Kanana. 7Atang awu mbye kuta u kunn rinyi uwog wu baa El Betel#35:7 Yi unju Mbayawuda imbyi rinyi wune baa Rimam na Betel., ikyaen ti, atang ti Rimam tso risu-wu uwog-wu kiye ti awu ku ter inja-wu Esuwa. 8Isim yine Debora, nyakam Rebeka, cwu, ama a sa wu nji imbyi kutuku Owak ti ta fer Betel. Ikyaen ayine aba kunn uwog atang baa, Alon-Bakuti ti imbyi-yi si ira ti jwub.

9Kiye ti Yakubu nwunn Padan-aram kafe ba, Rimam tu kyi wu ama u wae ira na wu. 10Rimam ri te wu baa, “Rinyi-fu si Yakubu, ama aba u kunn-ba fu baa, Yakubu cwucwo be, a u kunn fu baa, Isirela tiri.” Ne iken ti nde Rimam fa wu rinyi tishe baa, Isirela. 11Ama Rimam ri te wu baa, “Ame si Rimam ti site kuko patag. Mbae jwunn! Mbukwen mbukwen ande u ru ye utso-fu. Abikwe u ruye rimenn ijwe-fu. 12Riben wu ti ame nda Ibrahim ti Ishaku, ame u sa wu na fu. Ame u sa riben wune na anyisu-fu ti putsa isim-fu.” 13Tiri Rimam nwunn u tso, u ya wu ta ti uwog ti awu ri ira te wu atang. 14Ama Yakubu sim kutxom ititangsom uwog ti Rimam ri ira te wu yi Betel. Awu sa rinyangwae iken ti ngwa, ti kindob, yaensi risu kutxom wu, u yerkob wu. 15Ama awu fa rinyi uwog wu ti Rimam ri ira te wu atang baa Betel, (ti imbyi-yi baa, kusog Rimam).

Iticwu Rahel

16Yakubu ti ande-wu nwunn Betel. Kiye ti a ta rurwen ti Efirati, Rahel ta umbae ti pwe, ayi caeb wu timambe. 17Ti umbae ti pwe ku caeb wu, nyakam ri te wu baa, “Kyen-fu ikyenricwu be, afu u mbae kyi umbae ti urom.” 18Ama ti awu si ku jim, awu fa rinyi umbae wu baa, Benoni#35:18 Imbyi Benoni si mbaefa rikaen., ubaen-wu ama fa ana wu baa, Benjamin.

19Ama Rahel cwu, a sa wu nji fengo ti ku ru yi Efirati, ti si Betilami tine. 20Ama Yakubu sa kutxom ta kuskwab Rahel. Awu ti si kutxom ti ta kuskwab Rahel ba ku sang ti yaka ne. 21Isirela ru yi uwe ti ikyin ti kyang u ka sim afug-wu fer ti kitaen-kujwén Eder.

Anyisu Yakubu ti Arom

(1 Kucin 2:1-2)

22Ti Isirela nae ti uten atang, Roben ka nae te Biliha, upyi Rahel ti Yakubu mbe ama Isirela (Yakubu) fxen ira risu-yi.

Yakubu site anyisu rijwe asu ifaen. 23Anyisu Leyatu si Roben, umbae titawe Yakubu, ti Simeyon, ti Lawi, ti Yawuda, ti Isakar ti Zebulun. 24Anyisu Rahel ama si Yusufu ti Benjamin. 25Anyisu na Biliha, upyi Rahel ti unda si Dan ti Nafitali. 26Anyisu na Zilipa, upyi Leyatu ti unda si Gad ti Asher. Abane ti si anyisu ti a mbae na Yakubu kiye ti aba ta Padan-aram.

Iticwu Ishaku

27Yakubu ru yi kununn itse-wu yi Mamre, fifer ti Kiriyati Arba ti si Hebiron tine, kuru tikyi Ibrahim ti Ishaku. 28Kiye wu Ishaku site asang ukob kinjo ti mae inje (180). 29Ishaku cwu kiye ti awu kyáen tag pu wu. Ama anyisu-wu Esuwa ti Yakubu sa wu nji.

Currently Selected:

Kucangtsi 35: kubNT

Highlight

Copy