Kucangtsi 28

Yakubu Sha Unda ti Awu u Mbe

1Ikyaen yine Ishaku kunn Yakubu u nde wu itinyang u ri te wu baa, “Umbae-m, mbe-fu unda ti Kanana be. 2Ru yi Padan-aram, yi kununn Betuwel, itse iya-fu. Ru yi atang ti fu ka mbe kinjo uwae anyisu ti anda uye-fu, Laban. 3Rimam ti site kuko patag ā nde fu itinyang, ti fu mbae jwunn, u jwunn ama u kafe mbukwen ande. 4Awu ā nde fu ti rishi-fu itinyang pangma ti awu nde na Ibrahim, ti fu ba somkyi riben wu ti ati si rikyen atang ne, riben wu ti Rimam nda Ibrahim.” 5Isim yine, Ishaku tē Yakubu ru yi Padan-aram uwog Laban umbae Betuwel urae Aram, inja Rebeka, iya Yakubu ti Esuwa.

Esuwa Mbe Kyi Unda Tishe

6Esuwa fxen baa, Ishaku na wae na pu wu Yakubu ira, na u tē wu ru pu wu yi Padan-aram, ti awu na ka mbe unda atang, ama fa wu kusen baa, awu na mbe-wu unda yi Kanana be. 7Ama Yakubu na nae risu riben te ira itse-wu ti iya-wu, ama na ru pu wu yi Padan-aram. 8Tiri Esuwa nungye ti unda ti Kanana ti awu mbe na nyang-yi uwae itse-wu Ishaku be. 9Ikyaen yine Esuwa ru ka mbe umbae Ishimayel ti unda fa kyi awa-wu ti kununn. Rinyi unda wu si Mahalati, mbiya Nebayoti umbae Ishimayel ti si umbae Ibrahim.

Yakubu Sunn Kurwa yi Betel

10Yakubu ama, isim ti awu nwunn Beyersheba u ye ikyin ku ru yi Haran. 11Ti awu ka sang uwog iki ama usir te pu wu, awu sa kutxom ta, u sa risu-wu naetsa atang ku cwag kicwag. 12Atang awu sunn kurwa baa, awu na sae kufwá iki ti tsi riben u tso ka sang ti apupwen, ama atom Rimam ti apupwen ku tsutso ku sisi atang. 13Yaweh ama tsitsa risu kufwá wu u ri baa, “Ame ti si Yaweh, Rimam na abitse-fu Ibrahim, ti Ishaku. Ame u nda fu ti rishi-fu riben wu ti afu nae atang ne. 14Rishi-fu u jwunn pangma isa riben. Afu u ka ru usir ti kiskinn ti ti ureb, ti isi ti isku meme. Ande utense u tu itinyang ru uwog-fu ti rishi-fu. 15Nung! Ame te fu ta tetso, ame u kyir fu ko aka ti afu a ru, ame u pu fu kafe ba ti riben wune. Ame u ya fu ta-m be, se ame a nde pu m meme iken ti ame yer unju te fu.”

16Ti Yakubu shwu kicwag, awu ri baa, “Kubenti, Yaweh ta uwog wune, ama ame nung-m be ara.” 17Ikyenricwu ye wu, awu ri baa “Uwog wune site riyinn, awu si kang kusog Rimam, u si ufu ti ku tso yi apupwen.”

18Ucwe fam-yi ti kiskinn fifae, Yakubu sa kutxom wu ti awu sa ta risu-wu utitang wu, u sa sim riben ti u si kutxom na ititangsom, ama u yaen kindob si risu-wu. 19Awu kunn rinyi uwog wu baa, Betel, ti imbyi-yi si “kusog Rimam”, amaa, kucang, a ku kunn rinyi uwog wu baa, Luzi. 20Atang Yakubu yer unju te Yaweh baa, “Asiti Rimam a te m ta tetso, u kyir m uwae ikyin-m ti ame ku ru ne, ama u nda m wuci ti atupwa ti ame u si, 21ti ame a ru, u ka kafe ba ti kusog itse-m uwae kujimshwur, Yaweh u si Rimam-m, 22ama kutxom wu ti ame sa sim tsi ne u si kusog Rimam. Meme iken ti afu a nda m, ame u sa iken kinjo uwae rijwe na fu.”

Currently Selected:

Kucangtsi 28: kubNT

Highlight

Copy