Kucangtsi 29

Yakubu Ka Sang pu wu Kununn Laban

1Yakubu ru yi uwe ti ikyin-wu u ka sang uten ande ti nae usir ti kiskinn. 2Ti awu ka sang atang, awu sae ribung iki. Kumbub iwentam ita nae fer atang. Ribung wune si ribung ti asinn yine ku ngwa kob ambyi atang. A ku kaen kutxom tiyang ba kukyi unju ribung wu. 3Kiye ti asinn yi a funn tag pu yi atang, ande ti ku shi yi u kaen kutxom wu ru iyen ikyab, u txi ambyi ta yi. Isim yi, aba u kaen kutxom wu cwunnkyi ribung wu ti atang.

4Yakubu rang ande ti ku shi asinn yi baa, “Ameinja-m, ani ru aka ba?” Aba ri baa, “Ati ru Haran ba.” 5Awu rang ba baa, “Ani nung Laban umbae na umbae Nahor a.” Aba ri baa, “Eēn, ati nung wu.” 6Ama Yakubu rang ba baa, “Awu som nyang pu wu a.” Aba ri baa, “Eēn awu som nyang pu wu. Nung Rahel, umbae-wu ti unda ti pu asinn itse-wu ku ba akwen ta ne.”

7Yakubu ri baa, “Usir ta ti utaen, kiye nde-yi ti asinn u funn tag khika be. Txi ambyi ta yi, ti ni pu yi kafe ru ti uwog irum ti kub.”

8Aba ri baa, “Ati ku nde-ti ahan be. Se meme asinn a funn tag pu yi titawe a u kaen kutxom wune ru unju ribung, ama ati u txi ambyi na asinn-ti.” 9Ti aba ta ti uwae akaen ti tsag, Rahel pu asinn itse-wu ba sang pu wu ikyaen ti, awu ti ku shi asinn yi. 10Ti Yakubu sae Rahel ku ba ti asinn uye-wu Laban, awu ka kaen ra kutxom wu ru unju ribung atang, u txi ambyi tā asinn uye-wu ayi, 11ama Yakubu ye Rahel bur utob, u jwub ira ikyaen utob titsen. 12Yakubu ri te wu baa, “Ame si mindab itse-fu, umbae Rebeka.” Rahel ter ka ri te itse-wu.

13Ti Laban fxen ira risu Yakubu, umbae mbiya-wu, awu nwunn ti kufe u ru ka tu wu. Awu ye wu bur utob u shwu pu wu ru kusog-wu. Ti aba ka sang, Yakubu tsag tag ira yine te uye-wu Laban. 14Ama, Laban ri te wu baa, “Kubenti, afu si anying ijwe-m.” Ama Yakubu som te uye-wu Laban ka ishaen kinjo.

Yakubu nde wande na Laban ikyaen Rahel ti Leyatu

15Laban ri te wu baa, “Ikyaen ti afu si mindab-m, afu u tsikunn ku nde na m wande ti ukaen a? Ri te m iken ti ame u pae na fu.” 16Laban site anyisu anda ifaen. Rinyi itindufu si Leyatu, itikiyib ama si Rahel. 17Leyatu si te ayib ti namtur, amaa, Rahel ama waen unda si-yi ti ti ri be.

18Yakubu site ure ti Rahel ama awu ri te uye-wu baa, “Ame u nde na fu wande asang itsongfaen ti fu pu unda-fu Rahel na m ti m mbe.” 19Laban cwe baa, “Ayi nyangskeb ti m u pu wu na fu ti ti m u pu wu na unde iki. Som te m ike.” 20Ikyaen yine Yakubu nde wande asang itsongfaen ti wu u mbe Rahel. Ikyaen ure ti Yakubu site te Rahel, awu sae ma asang yi na ko-yi ko uwog-wu be.

21Isim ti Yakubu nde tag pu wu wande uyeb yi, awu ri te Laban baa, “Ame nde tag pu m wande risu uwa-m. Pu wu na m ti m nae te wu tiri.” 22Ikyaen yine, Laban kunn funn ande u nde ukwab unda-ishe. 23Ama ti ayib byi pu yi, awu ka pu-wu Leyatu ba na Yakubu atang, ama Yakubu nae te wu. 24Ti uwe yi, Laban pu Zilipa, upyi-wu ti unda iki, na pu wu Leyatu ti awu na ndeya wu. 25Ti ucwefam kiskinn, Yakubu ba sae ye, si-yi Leyatu ti ba nae te wu. Awu rang Laban baa, “Ayine si imi ti afu nde te m ne! Ame nde wande na fu risu Rahel. Afu kyang rimang u ka pu Leyatu ba na-fu ame atang?”

26Laban ri baa, “Ayi si-yi icwe-ti ti ati u pu umbae ti unda ti kiyib baen uwe itindufu be. 27Tsi tum, ti kutsab ukwab na ribaen yine ā nyatsa titawe ame u pu Rahel na fu, asiti afu a cwe ti fu u nde na kyi m wande na asang itsongfaen cwucwo.”

28Yakubu cwe, ama isim ti kutsab ukwab unda ishe-wu ti Leyatu mamtag, Laban pu unda-wu Rahel ba na Yakubu ti wu na mbe. 29Laban pu Biliha, upyi-wu ti unda iki na Rahel, ti wu na ndeya wu. 30Yakubu nae te Rahel ama. Kubenti, awu site ure te Rahel skeb Leyatu. Ikyaen yine, awu nde na kyi Laban wande asang itsongfaen.

Awa Yakubu Mbae na Wu Anyisu

31Ti Yaweh nung baa, Yakubu na site-wu ure ti Leyatu be, awu mbubta na Leyatu rishwu umbae ti mbae, ama u nda Rahel kunn kutsob. 32Leyatu kyaen rishwu u mbae umbae ti urom. Awu fa rinyi-wu baa, Roben ikyaen ti, awu ri baa, “Yaweh nung pu wu rikaen-m. Ubaen-m u site kang ure te m tiri!” 33Awu kyaen kyi rishwu u mbae kyi umbae ti urom u ri baa, “Yaweh nung pu wu ti Yakubu site-wu ure te m be, amaa awu nda kyi m umbae ti urom.” Ikyaen yine, awu fa rinyi-wu baa, Simeyon. 34Cwucwo, awu kyaen rishwu u mbae umbae ti urom, awu ri baa, “Tine ubaen-m u ba bae fa te m tiri, ikyaen ti ame mbae na pu m awu anyisu arom ita.” Awu fa rinyi umbae wu baa, Lawi. 35Awu kyaen kyi rishwu, u mbae kyi umbae ti urom ama, u ri baa, “Kiye wune, ame u teb Yaweh.” Ikyaen yine, awu fa rinyi umbae wu baa, Yawuda. Tiri awu kunnkyi umbae ti mbae.

Currently Selected:

Kucangtsi 29: kubNT

Highlight

Copy