Kucangtsi 27

Yakubu Kyaefa Ishaku u Mbe ra Itinyang

1Kiye ti Ishaku kyáen tag pu wu, ama ku sae ben-wu iken nyinyang cwucwo be, awu kunn Esuwa umbae kucang-wu, u ri te wu baa, “Umbae-m.” Esuwa cwe ira baa, “Eén.”

2Ishaku ri baa, “Fxen, ame kyáen tag pu m, ame nung-m usir ti ame u cwu be. 3Tine pu isu kutur-fu ru ka sha ibye ba na m. 4Nde itso wuci ti nyangtug, ti nyang uwae-m timambe ba na m ti m ci u wae ira na fu titawe ti ame u cwu.”

5Rebeka ama tsi ku fxen ira ti Ishaku ku ri te umbae-wu Esuwa. Ti Esuwa nwunn ru pu wu yi kutur ti wu u kaa sha ibye ba, 6Rebeka ri te umbae-wu Yakubu baa, “Nung, ame fxen itse-fu, ku ri te inja-fu Esuwa baa, 7awu na ka sha ibye na ba nde na wu wuci titinyang, ti awu na u wae na wu ira uwe Yaweh titawe ti awu na u cwu. 8Tine umbae-m, fxen m nyinyang. Nde iken ti ame u ri te fu ne. 9Ru ka tsab iwenten titinyang ifaen uwae rukug ba na m ike. Ame u nde wuci titinyang, itso ti itse-fu ku sha, 10ti fu ye ru ka na itse-fu. Awu u ci ama u nde fu titinyang titawe ti awu u cwu.”

11Yakubu ri te iya-wu Rebeka baa, “Inja-m Esuwa si unde ti site asing, ame ama si-m te asing be. 12Asiti itse-m a sa kujwo ku bwo m re? Ayi u tso ma ame na ku kyaefa wu fa. Ayine u shir na m kufaen, ayi u si yi titinyang cwucwo be.”

13Rebeka ri te wu baa, “Umbae-m, kufaen yi ā si-yi risu-m! Nde iken ti ame ri te fu.” 14Ikyaen yine awu ru ka ye iwen yi ba na iya-wu, ama iya-wu nde wuci titinyang, itso ti Ishaku ku sha, 15u pu atupwa titinyang ana Esuwa umbae kucang-wu, ti awu site kusog, u pu si Yakubu. 16Awu pu apwa iwen yine, fxeb ajwo ti rukog Yakubu 17ama u ye wuci ti buredi ti awu nde, na Yakubu, umbae-wu.

18Yakubu ye wuci ru uwe itse-wu, u ka ri baa, “Itse-m.” Ishaku cwe baa, “Eén, umbae-m, afu si-fu aye?” 19Yakubu ri te itse-wu baa, “Ame si Esuwa, umbae kucang-fu. Ame nde pu m iken ti afu ri te m. Ibye yi ta re, nwunn ti fu kub, ti fu nde m itinyang tiri.”

20Ishaku rang wu baa, “Umbae-m, afu tu pu fu ibye yi tine a.” Awu ri baa, “Yaweh, Rimam-fu ti ndeya m, ame tu ibye yi ti kufe.”

21Ama Ishaku ri te Yakubu baa, “Ko ba, ti m bwo ijwe-fu umbae-m, ti m nung ko afu si Esuwa.” 22Yakubu ko ru ka tu itse-wu Ishaku, Ishaku bwo wu u ri baa, “Ujwin si ana Yakubu, amaa ajwo si ana Esuwa.” 23Ishaku nungye-wu Yakubu be, ikyaen ti, ajwo-wu kum asing-asing pangma ana inja-wu Esuwa. Ikyaen yine awu wae ira na wu. 24Ishaku rang kyi wu baa, “Afu si umbae-m Esuwa ara kubenti a.” Awu cwe baa, “Eēn, ame si umbae-fu Esuwa.”

25Ama Ishaku ri baa, “Umbae-m, ye ibye-fu yi ba ti fu to ba ti m kub, u wae ira na fu.” Yakubu ye wuci ti ambyi anam yi ba na wu, awu ci u ngwa. 26Ama Ishaku ri te kyi wu baa, “Ko ba, umbae-m, ti fu ye m bur utob.” 27Ama Yakubu ko ba u ye itse-wu bur utob. Ti Ishaku fxen ishing atupwa-wu, awu wae ira na wu u ri baa,

“Ishing umbae-m si ishing tatu

ti Yaweh wae fufa!

28Rimam ā sa upwen tsa

uwae risaen-fu.

Awu ā nda fu riben ti ajib,

ti ku nyang wuci timambe,

Awu ā nda ituku anam-fu

waen shag.

29Ande ā si apyi-fu,

ambukwen ande

ā ba ku riben na fu.

Afu u ta risu ameinja-fu,

anyisu iya-fu u ku riben na fu.

Meme ande ti a ri ndembeb fu,

a u tu itibi.

Ande ti a ri itinyang risu-fu,

a u tu itinyang.”

30Isim ti Ishaku wae na tag pu wu Yakubu ira, ti awu ru ku yiye uwe itse-wu, inja-wu Esuwa ru kutur ba sang pu wu. 31Awu ba to ibye yi ti awu wen u ye ba uwe itse-wu, u ri baa, “Itse-m, nwunn ti fu kub ibye yi ti ame to ba ne, ti fu wae na-fu ame ira tiri.”

32Itse-wu Ishaku rang wu baa, “Afu si-fu aye?” Awu cwe baa, “Ame si umbae kucang-fu Esuwa.”

33Ishaku fwer ndembeb, ijwe-wu ku kukunn, ama awu rang baa, “Aye ti wen ibye u nde wuci ba na m nee ame ci kucang? Ame ci tag, u wae na pu m awu ira, titawe afu sang ku ba ne. Kubenti, itinyang si kunn pu yi ana-wu.” 34Ti Esuwa fxen ira itse-wu ayine, awu jwub ira jwub jwub jwub, u ri baa, “Itse-m, wae na kang m ira ama bē ame u nde rimang?”

35Ishaku ri baa, “Inja-fu ba kyaefa pu wu ame, ama u mbe ra pu wu itinyang-fu.” 36Esuwa ri baa, “Ayine fa pu yi ti apu-ifaen ti awu nde kufúm te m! Nee iken ti nde rinyi-wu si Yakubu#27:36 Imbyi Yakubu si Kufur ira, ko Kukyaefa.. Awu fxae mbe ra ndufu-m, u ba fxae mbe ra kyi pu wu titinyang-m.” Ama Esuwa ri kyi te itse-wu baa, “Itinyang iki ta kyi-yi ti afu u nda m be a.”

37Ishaku ri te Esuwa baa, “Ame nda pu m Yakubu ti awu na si unde ti uwe-fu, fa ti ameinja-wu ti tsitsi meme. Ame wae na pu m awu ira baa, wuci-wu ti ituku anam-wu risaen afang na u nyang timambe. Ikyaen ayine, imi ti tsitsi kyi kujwo-m ti ame u nda fu, umbae-m?”

38Esuwa rang kyi itse-wu baa, “Afu site nyáng itinyang kinjo amam a, itse-m? Wae na m ira ama re, itse-m.” Isim ayine Esuwa mbub ukunn ricwu ta.

39Ishaku ri te wu baa,

Uwae usom ti som-fu utense ike,

afu u tu-fu riben ti ajib be,

upwen ama u tsa-wu nyinyang

uwae risaen-fu be.

40Uwae usom ti som-fu,

afu u ci ti ribom usu rika-fu,

ama u si upyi inja-fu.

Amaa, asiti afu a kukwab,

u ndub sha wu,

afu u nwaen ukwae-fu

ruye rijwaen-wu.

41Isim ayine, Esuwa sa Yakubu kuka ikyaen itinyang ti itse-wu wae na wu. Awu ri te ijwe-wu baa, “Iticwu itse-m fer ku pu yi. Isim ti ame a jwub mam pu m icwu itse-m, ame u wen inja-m, Yakubu.”

Yakubu Ter Ru yi Uwog Iye-wu Laban

42Ti Rebeka fxen kumyae Esuwa, awu kunn Yakubu u ri te wu baa, “Nung, inja-fu Esuwa ku myae ti awu u wen fu. 43Tine, uyin-m, nde ira ti ame u ri te fu. Nwunn ti kufe, ti fu ru uwog inja-m Laban yi uten Haran. 44Ru ka som ra atang te wu, se kiye ti rinae inja-fu a jim pu yi. 45Kiye ti inja-fu a munnji pu wu ti iken ti afu nde te wu, u si-wu ti rinae te fu cwucwo be, ame u tsa kutsa kaa kunn fu kafe ba. Ikyaen imi ti ame u shanum anyisu-m meme ifaen-ba ti usir kinjo?”

46Isim kiye iki, Rebeka ri te Ishaku baa, “Ame num pu m ijwe ti anda ti Hiti ba ti Esuwa mbe ne. Asiti Yakubu a mbe kyi unda Hiti iki, ayi nyangskeb ti ame u cwu-m.”

Currently Selected:

Kucangtsi 27: kubNT

Highlight

Copy