aTitus 3
3
Kusor afikuus
1Yiir yiring ánerawe wan'e ye á ra fok áko̱k kasho̱o̱n ne áfe ágwo̱m kaben ba kuto, á ra kuus ike̱ng iya ba ta fe̱ ne á sor be kanye̱k kunye koakye i ta se gye̱r. 2Bun i fe̱ be ba ye sang a tu fe̱ amaan rife̱ baꞌ, á ra shim kusor caang ne á se whiwhe̱ be ánerawe ne á mees rice ba nasho̱o̱n koangan.
3Yir gip gbugbang i tsang i nye yir áfunam'e ne i shonong yir, a tsang a ni wo̱ro̱k yir, ma i te yir ásam áfe kushim kunye amaan ike̱re̱ iya aye̱ yir ta shim be kushim kufok kusas kusor. Kusor yir tsang kunye kunye ike̱re̱ imaan'e ne rishishim. Ánerawe ti rayir ne yir ma ka rayir ba. 4Amma nizen iya a tin tonong yir ritek ne kushim Adakunom Aner Kashesh yir, 5a ti shesh yir. A nye anong sang kamok i nye yir ike̱ng ikak itek baꞌ, amma kamok kuro̱ riye̱ wu. A ti shesh yir, a tá kusu rine̱n yir be Kabik Kazhe̱l'e kaya a tin no̱o̱k yir kutes kufas ne iren kusor kufas. 6Kabik Kazhe̱l yong ne a ti korok natoon yir ne̱k kamok ike̱ng iya aYeso Kiristi Aner Kashesh yir tá nye. 7A nye anong, nong ase̱ kamok ritek wu yir ta se̱ yir ku te zhe̱l nasho̱o̱n Adakunom ne i te yir áya a tana ya kutse kutser kufe izen izen kuya yir ta min te yir riye̱. 8Rife̱'me nye katsak. Kamok anong mi shim wan ta fe̱ rife̱'me ne i bun i toos'e, nong áya a ta min no̱o̱k katsak na Adakunom tà ya kasho̱o̱n be kuno̱o̱k rice ba nong á ta nye ike̱ng iya i ta nye itek. Ike̱re̱ na nye itek ne i se gye̱r be koangan.
9Amma kam be akikar afe rifunam ne aduk atin ne kafa iriri ízam atukop atukop be kuya nanan ne kuren natoon Itsi kamok ike̱re̱ kuri iyong nye ikpe̱de̱ng'e, i tin barang ike̱ng ikak baꞌ. 10Aner aya a ta shim ku naka kaas, ke wan tu ko̱ro̱k kuto kutak kuzining, kutak kufe afa, ke a fok baꞌ, ne wan kam be wu. 11Wan tà ren ye aner kuri ayong nye aruruk'e ne a nye aner rine̱n. A naka to̱ amok.
Itabak igang'e
12Nizen iya mi tana tom Atemis ka aTikikus ayi nufuan. Nye ike̱ng iya wan tana kyem i nye nong ta be̱ nunaan na aNikapolis, kamok mi shim ta se sor azong nizen kuwun. 13Nye koakye wan tana kyem i nye nong ta tobok aZinas a ta nye aloya, ne Apolos nizen á tana shan iren. Sang á tu dun ike̱ng ikak iya ba ta tse̱r baꞌ. 14Áner yir ra bo̱so̱p kuno̱o̱k ace ba dim nong á ta nye ike̱ng iya i ta nye itek, ne á ren iren kutobok ánerawe na agbang ike̱re̱ ba tà tse̱r. Á tu sor a kpe̱de̱ng kusor baꞌ.
15Áfe á ta se aze mak be mi cice̱r ta nye ashou. Nye shou áya a tin shim yir, áya i ta se yir mak kaye̱e̱r kuno̱o̱k katsak kuzining.
Ritek Adakunom se mak be yin cice̱r.
Currently Selected:
aTitus 3: izrNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc
