aFilimon 1
1
Ashou
1Mi, aBulus, aya a tin te nitso̱m kamok aYeso Kiristi ne aronyining yir aTimoti ne i ta zibir wan kufumung na aFilimon, agbang aferime̱ yir ne i bun i nye aferime̱ itomong yir. 2Kufumung'e nye kufe yin mak be ángasnyining yir Afiya ne Akipus áya a ta nye asozha aKiristi be ribir áfikuus áya a ta nyiis kari wan.
3Ritek be kameneng riye̱ Adakunom a ta nye Ada yir ne Agwo̱m Ágwo̱m yir aYeso Kiristi se mak be yin.
Riye̱ rikan kamok kuno̱o̱k katsak aFilimon
4Mi tonong Adakunom riye̱ rikan ye̱r ye̱r ke mi sen nye aduwa ne i yiring be wan. 5Mi fos kuri kuno̱o̱k katsak wan ta be natoon Agwo̱m Ágwo̱m yir aYeso ne kuri kushim wan tá shim ázhe̱l'e cei. 6Aduwa mi se ye wan tin barang ifeng ni itaas itak natoon kuno̱o̱k katsak wan, nong ase̱ wan ta ren koakye kuri ike̱ng itek yir ta be yir kaye̱e̱r aYeso Kiristi. 7Kushim wan ta be ti kare̱p riye̱ dide̱ng ne kuni tsesek dide̱ng kamok wan aroneng, wan sak aye̱ ázhe̱l'e ta men.
aBulus nye izong kamok aOnesimus
8Kamok kuri kushim afe wan ta shim áfikuus ne mi kyem i ros riye̱ kaye̱e̱r aKiristi nong tá fe̱ be wan ye wan ri nye ike̱ng iya i ta tas ke wan nye. 9Amma kamok mi ta ka shim, mi shim ta ka nye akusuk, mi aBulus, mi tá nye asho̱n ne i bun i se nitso̱m kyo̱o̱rna kamok aYeso Kiristi. 10Mi ta nye izong kamok igon'i aOnesimus, aya a tá shan aKiristi nizen iya mi ta se nitso̱m. 11Gbugbang a tsang a be itomong nufuan baꞌ, amma kyo̱o̱rna a be itomong nufuan be nunaan dide̱ng.
12Mi bun i sen ku tom nufuan, wu aya a ta nye itsam riye̱ mi. 13Mi shim ke wan ku yiir nong a ta sor mak be mi nong ase̱ a ta ka shishing ne a ni se̱ mo ne i nye ike̱re̱ ne mi se nurosom kamok kutaas Rife̱ Ritek Adakunom. 14Amma mi shim ta nye ike̱ng ikak dar kushim wan baꞌ, nong ase̱ koakye kuri ritek wan tanin nye'me ta se be kushim riye̱ wan sang kyo̱ndi a ta te mo agap baꞌ. 15Kashim ike̱ng i ta sak wu ta kam be wan kaye̱e̱r kaban izen cie̱k nye nong ase̱ wan ta bun i ku se̱ nong ta sor yin mak ma izen izen. 16Sang kyo̱ndi asam baba baꞌ, amma áner aya a ta nar ásam, kyo̱ndi aronyining wan aya wan tá shim dide̱ng. Mi ren wan ku shim dide̱ng ne i ni nar kyo̱ndi anerawe be aronyining kaye̱e̱r Agwo̱m Ágwo̱m yir.
17Kamok anong ke wan ti sok ye mi nye afudang itomong wan, to̱, kushan ibo̱k ifa kyo̱ndi wan tanin shan mi. 18Ke a mak ka nye ike̱ng ikak wan tá fok kusas'e baꞌ, ka wan tu be kuta ike̱ng ikak ayi ne wan ni won'e. 19Mi, aBulus, ne i sen ka zibir kufumung na be kubo̱k'i, ye mi ta ka karang. Sang tu fe̱ i tak kutser kufas wan tá se̱ kamok mi baꞌ. 20Aroneng, mi mok ye mi ta se̱ ritek nufuan kamok Agwo̱m Ágwo̱m. Kusuk, ni tsesek. 21Mi ti no̱o̱k katsak ye wan tà kuus ike̱ng iya mi ta fe̱. Mi ta ka zibir kufumung na ne mi ren tse̱ng tse̱ng ye, wan ta nye ike̱ng ife i ta nar iya mi ta fe̱ be wan ye wan ra nye.
22Ike̱ng ikak izining mi ta shim ke wan ren gbak nye, nye kutu átsen kamok mi, kamok mi n te riye̱ kube̱ nufe yin ke Adakunom fok aduwa yin a tin won.
23Abafaras afudang'i, i ta se yir nitso̱m mak kamok aYeso Kiristi, ta nye yin ashou. 24Anong ne áfudang itomong'i, aMarkus be Aristakus ne aDemas be aLuka ta nye yin ashou gip.
25Ritek Agwo̱m Ágwo̱m yir aYeso Kiristi se mak be kabik yin.
Currently Selected:
aFilimon 1: izrNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc
