Ibrani 1
1
aYeso nar ámaleka yiik
1Gbugbang, Adakunom fe̱ kanu be átukop yir ni iren ze̱r ze̱r ne nizen ze̱r ze̱r be aner kuzarap. 2Amma kaye̱e̱r inom igang'e na, a fe̱ kanu be yir be Igon wu, aya a tú ku sak a ta te a ya kutse ike̱re̱ cice̱r. Mak be wu ne a nye koakye. 3Igon'e ne ka nye akanang kuyiik Adakunom, a tas Adakunom kyo̱o̱n. A yiir koakye ike̱ng be kukyem rife̱ wu. Nama a tá sak yir ta te yir zhe̱l kaye̱e̱r rine̱n yir, yong a sonong nubo̱k riya Aya a ta nye a yiik'e kaye̱e̱r kaza.
4Kamok anong ne wu nar ámaleka be kuyiik kyo̱ndi riyerek a tu ku te'me ta nar rifuba. 5Kamok amaleka akak kuse Adakunom tá kun fe̱ be wu ye,
“Wan nye Igon'i,
katuur mi n te Ada wan” baꞌ.
Ka ye,
“Mi tà te Ada wu,
ne wu ma te Igon'i” baꞌ.
6Nizen iya Adakunom tá tom igon wu kafe ime̱se̱ng'e kaye̱e̱r kazatse, a bun a fe̱ ye,
“Won ámaleka cice̱r tu ku ya iben.”
7Natoon ámaleka, Adakunom fe̱ ye,
“Adakunom sak ámaleka sor kyo̱ndi kuwun
ne a sak ásam wu tá sor kyo̱ndi rigyem kuro̱ng.”
8A fe̱ natoon Igon'e ye,
“Itsik rigwo̱m wan, Adakunom, tà sor ma izen izen.
Katsak ne ka ta nye ishe̱n rigwo̱m wan.
9Wan shim katsak ne i rawan amaan kuse
kamok anong Adakunom, a ta nye Adakunom wan, tá kasa a ta ka korok name rice.
A tá sak wan ta se̱ kuyiik ku ta nar kufe áfudang wan.”
10A bun a fe̱ ye,
“Kum ni ime̱se̱ng'e, Agwo̱m Ágwo̱m, wan ne i barak ribor kazatse,
kaza nye itomong ibo̱k wan.
11Ike̱re̱'ong cice̱r tà gor, amma wan tà sor ma izen izen.
Ike̱re̱'ong tà kop kyo̱ndi ares.
12Wan tà ka kunung ba kyo̱ndi ares,
a tà yiir ku shishing kyo̱ndi ares.
Amma wan shishing baꞌ,
aye̱ wan be igak baꞌ.”
13Ámaleka anyaka ne Adakunom kun fe̱ be wu ye,
“Sonong nubo̱k riya mi, ma mi sak ámudo̱n wan
te ike̱ng kusak atak wan e̱?”
14Ámaleka cice̱r nye nabik naya na ta nye áner á ta se̱ kashesh itomong.
Currently Selected:
Ibrani 1: izrNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc
