aMarkus 8

aYeso no̱o̱k ánerawe izungu inaas naya

(aMat 15.32-39)

1Kaye̱e̱r inom iyong rigwo̱m ánerawe rikak na tusung. Á be ike̱ng ikak nong á ta ya baꞌ, yong aYeso yis alimazhiri wu nong a ta fe̱ be ba ye, 2“Mi fok kuro̱ riye̱ ánerawe na, án sor be mi inom itaar, amma á be ike̱ng ikak nong á ta ya baꞌ. 3Ke Mi tu won ba nong á ta be kari be izong. A ta te gbe̱re̱k niren, kamok ákak nes gugo̱k.”

4Alimazhiri wu fe̱ be wu ye, “Akye̱ ne yir ta se̱ yir naya aze katse na nong na tu ku kyem ba e̱?”

5aYeso tú ku rip ba ye, “Agbang abiredi amang ne yin be yin e̱?” Ne ba fe̱ ye, “Kanataar.”

6Ayong aYeso fe̱ be ánerawe ame ye á ra sosok kaben. Ne a sok ágbang abiredi kanataar ame, ne a tá tonong riye̱ rikan be Adakunom ne a te̱se̱ng nong a ta no̱o̱k alimazhiri wu, nong a ta kasap rigwo̱m ánerawe ame. Álimazhiri'me nye anong. 7Ba be izos cie̱k gip. aYeso tonong riye̱ rikan wu be Adakunom ne bun a fe̱ be álimazhiri wu ye, á tu kasap ánerawe'me. 8Ánerawe'me ya ma á whas. Nizen iya á tá gang kuya'me álimazhiri wu tusung íkpis'e. I tu ku tuk ma i shining iderse kanataar. 9Atek kyo̱ndi izungu inaas ne a kuse azong. Ne a ku te ba niren. 10Ne a no̱ nukpara ashi mak be alimazhiri wu nong a ta be niben aDamanuta.

Áner aFarisi fe̱ ye ba shim a ta di itomong azhing

(aMat 16.1-4; aLuk 12.54-56)

11aFarisi akak be̱ nufe aYeso, nong a tu ku bo̱mo̱ng, yong á fe̱ be wu ye, a ra nye ike̱ng ikak ife azhing iya i tana tonong ye wu ne naza. 12aYeso ko̱ro̱k isong ne a fe̱ ye, “Akye̱ sak anerawe izam iyu tse̱r ku di ike̱re̱ azhing e̱? Katsak'e ne Mi ta tak yin, a ta ka nye yin ike̱ng azhing baꞌ.”

13Ayong aYeso tu won ba. A ta no̱ kaye̱e̱r kukpara ashi ame nong a ta tar kunyi kukak.

Ayisti aFarisi ne afe aHiridus

(aMat 16.5-12)

14Álimazhiri'me tiburum a kyem a be̱e̱n abiredi baꞌ, amma á be agbang'e azining kaye̱e̱r kukpara ashi'me. 15aYeso tu ko̱ro̱k ba kuto ye, “Nye yin tatan be ayisti áner aFarisi ne aHiridus.” #8.15: Ikpi ike̱ng ikak a tin ten a abiredi nong a ta dorok.

16A san kufe̱ be rice ba ye, “A fe̱ anong, kamok yir ta be yir abiredi baꞌ.”

17aYeso tá ren ike̱ng ba ta sen ninye ibo̱ro̱ng natoon'e, yong a fe̱ be ba ye, “Akye̱ sak yin ta sen fe̱ yin natoon kudun abiredi e̱? Yin bun i di yin ka i ren yin aꞌa? Aye̱ yin rusek nurosom a? 18Yin be yin anyisi amma i di yin aꞌa? I be yin ato, i fok yin aꞌa? Yin yiring aꞌa? 19Nizen mi ta ku te̱se̱ng ágbang abiredi atoon ame kamok anerawe izungu itoon, iderse imang ne yin ku tusung yin e̱?”

Alimazhiri'me fe̱ be aYeso ye, “Kuso̱k be afa.”

20“Be izen afe mi ta ku te̱se̱ng ágbang'e kanataar ame kamok anerawe izungu inaas, iderse imang ne yin ku tusung yin ribir e̱?”

Ne á fe̱ be aYeso ye, “Kanataar.”

21aYeso fe̱ be ba ye, “Yin ba ru ren yin aꞌa?”

aYeso sak akpato̱o̱n akak na aBatseda te atser

22A be̱ na aBatseda, ne áner akak be̱ be akpato̱o̱n ne á nye aYeso akusuk ye, a ra ra aner'e nong a ta te atser. 23aYeso ko̱k kubo̱k aner ame nong a ta tseng'e nama kuwo̱p. A tin ta ace̱ nanyisi aner ame ne a ni sak ibo̱k natoon wu, ne a ku rip ye, “Wan di ike̱ng ikak aꞌa?”

24Akpato̱o̱n ame sok rice naza ne a fe̱ ye, “Mi di anerawe; amma a se di nakon sen tseng.”

25aYeso bun a ti sak kubo̱k wu natoon anyisi aner ame. Ayong anyisi aner ame karak ne a se̱ kudi karo̱, ne a di koakye gye̱r. 26aYeso tu sak a ta be kari ne a fe̱ be wu ye, “Sang tu tseng kaye̱e̱r kuwo̱p'e baꞌ.”

aBitrus fe̱ ye aYeso nye aKiristi

(aMat 16.13-20; aLuk 9.18-21)

27aYeso be alimazhiri wu tseng ni iwo̱p izhizhe̱k'e nabas aKaisariya aFilipi. A tu rip ba niren ye, “Ánerawe fe̱ ye Mi nye angan e̱?”

28Iyong álimazhiri'me fe̱ ye, “Ákak fe̱ ye wan nye aYohana aner abatisma, ne ákak fe̱ ye wan nye Iliya, ne ákak bun á fe̱ ye wan nye akak kaye̱e̱r áner kuzarap Adakunom ágbugbang'e.”

29Ayong aYeso tú rip ba ye, “To̱, yin ne e̱? Yin di yin ye, mi nye angan e̱?”

Ayong aBitrus fe̱ ye, “Wan ne i nye aKiristi.”

30aYeso tú kpam ba ye sang á tú tak akak ye wu nye angan'e baꞌ.

aYeso zarap kuri riku wu

(aMat 16.21-28; aLuk 9.22-27)

31Ayong aYeso san ku kubo̱so̱p ba'me ye, Igon Anerawe ta so̱ iriri risam, ne áko̱k kasho̱o̱n be ágbang átsi ne áner kubo̱so̱p Itsi ku rawu, a tu ku fe̱r, nama inom itaar a ta bun a dorok be kutser. 32A fe̱ natoon iyu kanang yong aBitrus tu yis nukim nong a tu ku zhe̱e̱r. 33Amma aYeso kirik a tá ye̱re̱k álimazhiri'me, ne a zhe̱e̱r aBitrus ye, “Kam be mi, wan Ishetan, wan to̱ kyo̱ndi ánerawe sang kyo̱ndi Adakunom baꞌ.”

34Ayong aYeso yis rigwo̱m anerawe ame be alimazhiri wu nong a ta fe̱ ye, “Koangan afe a ta shim a tin kuus, a ra rawu rice wu nong a ta sok kukon a tana ku tigak mo nong a tin kuus. 35Koangan afe a ta shim a ta shesh kutser wu, a tin wei. Afe a tin wei nutser wu kamok mi be Rife̱ Ritek, a ta shesh kutser wu. 36Akye̱ kuri ike̱ng itek ne anerawe ta se̱, ke a se̱ kazatse na cei, amma ne a rin wei nutser wu e̱? 37Ka akye̱ ne anerawe ta no̱o̱k nong a tin shishing be kutser wu e̱? 38Koangan afe a ta fok isum mi be rife̱ mi, nizen iyu ife sang a ta be katsak baꞌ, be kunye rine̱n dide̱ng, Igon Anerawe ta fok isum wu nizen iya a tana be̱ kaye̱e̱r kuyiik Ada wu ne kufe ámaleka Azhe̱l'e.”

Currently Selected:

aMarkus 8: izrNT

Highlight

Copy