aMarkus 9

1A bun a fe̱ be ba ye, “Katsak'e ne mi ta ka tak yin, ákak afe a ta se aze tà tsang á kus baꞌ, ma á di rigwo̱m Adakunom be̱ be kukyem nizham.”

Kanyisi aYeso shishing

(aMat 17.1-13; aLuk 9.28-36)

2Nama inom igataar aYeso sok aBitrus ne aYakub be aYohana nong a tá tseng'e natoon agbang rifan, naro̱ á ta se awan ba. Azong ne kanyisi aYeso shishing nasho̱o̱n ba. 3Ares wu te akan pes ma a gye̱se̱m. A te akan ne a nar kuri ku kusu ares akak tana kyem kaye̱e̱r kazatse na. 4Iyong Iliya be aMusa ti wuruk nasho̱o̱n ba azong, a ta se be fe̱ kanu be aYeso.

5Ne aBitrus fe̱ be aYeso ye, “Aner kubo̱so̱p, i se gye̱r i ta se yir aze. Won yir ta nye yir abur ataar. Kuzining nye kufuan, ne kuzining nye kufe aMusa, kuzining kufe Iliya.” 6A ren ike̱ng iya a tana fe̱ baꞌ, inyim tú ro̱ ba dide̱ng.

7Iyong kune̱n kukak wuruk ku tú ku kis ba ne á fok kuto̱ kukak kaye̱e̱r kune̱n'e ye, “Ayu ne a nye igon'i kaya mi ta shim. Ku fok yin kuto.”

8Zizirik á kirik ne á ye̱re̱k, amma á ba di aner akak ze̱e̱r be aYeso baꞌ.

9Nizen ba ta sen tiik rifan ame, yong aYeso fe̱ be ba be agbang kuto̱ ye, sang á tu tak akak ike̱ng iya ba tá di baꞌ, ma izen iya Igon Anerawe dorok nure̱k. 10Á won rife̱'me kaye̱e̱r aye̱ ba, ne á tsang a naka risim ye ko akye̱ ne aYeso nife̱ natoon “kudorok ikom'e”.

11Ni igang'e ne á rip aYeso ye, “Akye̱ sak áner kubo̱so̱p itsi tá fe̱ ye, Iliya ne a tà be̱ nizham aKiristi ta ra be̱ e̱?”

12Ne aYeso fe̱ be ba ye, “Katsak'e, Iliya ne a ta san kube̱ ni ime̱se̱ng'e nong a ta sak ike̱re̱ cei tu ku bun kyo̱ndi i ta se nizham, akye̱ sak a ta zibir ye Igon Anerawe ta so̱ iriri risam dide̱ng dim ne anerawe ku rawu e̱? 13Amma won ta tak yin ye, Iliya m be̱. A tu nye ike̱re̱ ife ba ta shim cei kyo̱ndi a ta zibir natoon wu.”

aYeso sak igon kakak ka ta be amaan kabik te katser

(aMat 17.14-21; aLuk 9.37-43)

14Nizen iya ba ta be̱ nufe ribir álimazhiri'me, á di rigwo̱m ánerawe whe̱re̱ ta mu ku gorok ba ne áner kubo̱so̱p Itsi ákak sen ya nanaan be ba. 15Kum nizen ánerawe'me cei ta di aYeso azhing ta yiir ba dide̱ng ne á teng nong a ta su ku nye ashou.

16aYeso tu rip ba ye, “Natoon akye̱ ne yin sen ne nye yin nanaan be ba e̱?”

17Aner akak kaye̱e̱r rigwo̱m ánerawe ame fe̱ ye, “Aner kubo̱so̱p, Mi m be̱ nufuan be igon'i, kaya ka ta be amaan kabik. Amaan kabik'e tu te̱ne̱ng kufe̱ kanu. 18Nizen iya ne i tu dorok, i tu barak kaben ne a turung ace̱ nanu ne ya anyi ne ikap wu te tso̱ng. Mi rip álimazhiri Wan ye, á ru ku tun amaan kabik'e, amma á kyem a tun baꞌ.”

19Ayong aYeso fe̱ ye, “Kaꞌ. Yin ánerawe izam na, i ta won dar i no̱o̱k yin katsak, mi ta sor ma ane̱ nong tana ka tsesek be yin e̱? Be̱e̱n yin igon'e aze.”

20Ayong á tu be̱e̱n igon'e. Nizen amaan kabik ame ta di aYeso, a wor a sak ikap igon ame kpaan tiim. Ne igon'e kpa kaben a biring be ace̱ fuk fuk nanu wu.

21aYeso rip atek igon'e ye, “Kum na akye̱ izen ne a se na e̱?”

Atek'e fe̱ ye, “Kum ne a ruresek hiir. 22In me̱ ne i ku barak nuro̱ng be nashi nong i tu ku fe̱r. Ke wan ta kyem i nye ike̱ng ikak ne, fok kuro̱ riye̱ yir nong tin se̱ mo yir.”

23Ayong aYeso tú ku rip ye, “Wan di ane̱, wan ta fe̱ ye, ‘Ke wan ta kyem e̱?’ Koakye ike̱ng nye ife kunye nufe aner aya a ta no̱o̱k katsak.”

24Zirik atek igon ame fe̱ ye, “Mi no̱o̱k katsak, ni se̱ mo be kudun no̱o̱k katsak'i.”

25Nizen aYeso ta di rigwo̱m ánerawe be naro̱'me zizirik. Ayong a tigba amaan kabik'e ye, “Wan kabik rigbato be rigbanu, mi fe̱ be wan be agbang kuto̱ ye, ‘Wuruk kaye̱e̱r wu, tu ba no̱ kaye̱e̱r wu gbak baꞌ.’ ”

26Amaan kabik'e ta kukun a tu barak ne tiim nong a ta wuruk. Ne igon'e te di kukom ma anerawe whe̱r fe̱ ye, “A ku.” 27Amma aYeso ko̱ro̱k igon'e kubo̱k nong a tu ku se̱ mo, a ta dorok a nyeseng tsik.

28Nizen aYeso ta no̱ kari, álimazhiri wu tu rip kyo̱o̱n ye, “Akye̱ sak yir kyem i tun yir amaan kabik'e baꞌ e̱?”

29Ne aYeso fe̱ be ba ye, “Ike̱re̱ kuri iyu na ta wuruk be aduwa tsek.”

aYeso bun a nye kuzarap natoon kuri riku wu

(aMat 17.22-23; aLuk 9.43-45)

30A won karo̱ kayong nong á ta gor kaye̱e̱r iben aGalili. aYeso shim akak tu ren karo̱ ba tu kuse baꞌ, 31kamok a sen bo̱so̱p álimazhiri wu'me. Ayong a fe̱ be ba ye, “A ta sok Igon Anerawe a ta re̱p ákak'e. A tu ku fe̱r, nama inom itaar a ta dorok.”

32Amma ba kyem á ren ike̱ng iya rife̱'me tá sor baꞌ, ákak kyem á tu ku rip baꞌ, kamok inyim tu ku ro̱ ba.

Angan ne a nar yiik e̱?

(aMat 18.1-5; aLuk 9.46-48)

33Nizen iya á tá be̱ na aKapanum, aYeso ta no̱ kaye̱e̱r kari, aYeso rip álimazhiri wu ye, “Yin se be ya yin nanan natoon akye̱ niren e̱?”

34Amma ba te gbik kamok ba sen ya nanan niren ye, angan ne a nye ayiik ne a nar e̱?

35Ayong aYeso sonong nong a ta yis álimazhiri wu kuso̱k be afa nong, a ta fe̱ be ba ye, “Ke akak shim a ta te afe ime̱se̱ng'e, ma a te afe igang'e dim, ne a sor asam a koangan.”

36aYeso sok igon kakak kahiir'e nong a tú ku sak a tá nyeseng natite ba. Ne a sok igon'e nubo̱k, ne a fe̱ be ba ye, 37“Koangan ne a shan igon kahiir'e kyo̱ndi kayu kaye̱e̱r riyerek'i, i nye ye a ti shan. Ne koangan afe a ti shan, i nye ye sang a ti shan tsek baꞌ, amma aya a tin tom.”

Aner a tin rayir baꞌ se mak be yir

(aLuk 9.49-50)

38aYohana fe̱ be wu ye, “Aner kubo̱so̱p, yir di yir aner akak, a ta sen turung amaan nabik kaye̱e̱r riyerek wan yong yir fe̱ yir be wu ye a ra won kamok wu nye azining kaye̱e̱r yir baꞌ.”

39Amma aYeso fe̱ be ba ye, “Sang tu ku ro̱n yin'e baꞌ. Kamok aner akak kuse a tana nye ike̱ng azhing kaye̱e̱r riyerek'i ne a bun a fe̱ ike̱ng ikak imaan'e natoon mi baꞌ. 40Kamok aner aya a ta ka ra yin baꞌ, se mak be yin. 41Katsak'e ne mi ta ka tak yin, aner aya ne a ta no̱o̱k yin ashi kuso̱ na ako̱p kaye̱e̱r riyerek'i ye, kamok yin nye yin anaan, a ta dun ishorong wu baꞌ.”

Ike̱ng i tana sak aner ta nye rine̱n

(aMat 18.7-9; aLuk 17.1-2)

42“Koangan ne a sak azining kaye̱e̱r inoon nazhizhe̱k'e na, naya na tin no̱o̱k katsak natoon'i, ta nye rine̱n. I ta nar ke a tu rosom kuta ako̱ nuto̱ nong a tu ku barak kaye̱e̱r agbang kudung. 43Ke kubo̱k wan ta sak wan ta nye rine̱n ne i te̱n. I ta ka nar ta no̱ kaye̱e̱r kasa kutser be kubo̱k kuzining be tana no̱ kaye̱e̱r kasa kuro̱ng be ibo̱k ifa. Naro̱ kuro̱ng'e ta ku nigaan'e baꞌ. [ 44Azong azhizhi'me kus baꞌ, a ta kyem a riming kuro̱ng'e baꞌ.] 45Ke kutak wan ta sak wan ta nye rine̱n ne i te̱n. I ta ka nar ta no̱ kaye̱e̱r kasa kutser be kutak kuzining be tana no̱ kaye̱e̱r kasa kuro̱ng be atak wan afa. [ 46Azhizhi'me ta kus baꞌ, a kyem a riming kuro̱ng azong baꞌ.] 47Ke rinyisi wan ta sak wan ta nye rine̱n, ne i tun. I ta ka nar tana no̱ kaye̱e̱r rigwo̱m Adakunom be rinyisi rizining be a tana ka barak kaye̱e̱r kuro̱ng be anyisi afa, 48naro̱

“ ‘azhizhi'me ta kus baꞌ,

ne a kyem a riming kuro̱ng'e baꞌ.’

49“A ta gor be koangan kaye̱e̱r kuro̱ng nong a ta te zhe̱l.

50“Ito̱k nye ike̱ng itek, amma ke kurereng ito̱k'e gang, wan ta nye ane̱ nong i tà bun i rereng e̱? Sor yin kyo̱ndi ito̱k naye̱ yin, ne i sor yin caang be koangan.”

Currently Selected:

aMarkus 9: izrNT

Highlight

Copy