aMarkus 7

Ike̱ng ife igo̱o̱n aner aYahuda tá fe̱

(aMat 15.1-9)

1Aner aFarisi ne áner kubo̱so̱p Itsi ákak aya a ta ne na aUshalima be̱, a gorok aYeso ne 2a di álimazhiri wu ákak á ta se be iya naya be “ibo̱k be narik” á kusu ba kyo̱ndi igo̱o̱n áner aYahuda ta fe̱ baꞌ. 3Áner aFarisi ne áner aYahuda cice̱r yas dar ku kusu ibo̱k baꞌ, ma á kusu ibo̱k zhe̱l, kamok ba kuus igo̱o̱n asho̱n ba. 4Ke á ne naro̱ rizhik á wor á yas baꞌ, ma á so. Ne á bun á kuus igo̱o̱n ikak whe̱re̱ kyo̱ndi kukusu ako̱p ne agbang akpano̱ ne nafeneng atso̱m.

5Ayong, áner aFarisi ne áner kubo̱so̱p itsi ame rip aYeso ye, “Akye̱ sak álimazhiri wan kuus igo̱o̱n áko̱k kasho̱o̱n yir baꞌ e̱? A ta yas sang a kusu ibo̱k baꞌ e̱?”

6Ne aYeso fe̱ be ba ye, “Ishaya fe̱ gye̱r nizen iya a tá nye kuzarap natoon yin ákardak áner kyo̱ndi i ta se ni izibir ye,

“ ‘Áner na tin tiyiik be nanu ba tsek,

amma aye̱ ba se gugo̱k be mi.

7Ku ya iben ba sor ike̱ng ikak baꞌ, ike̱ng ba ta bo̱so̱p ánerawe'me nye igo̱o̱n ánerawe tsek.’

8“Yin won yin Itsi Adakunom nong i ta kuus yin igo̱o̱n anerawe.”

9Ne aYeso fe̱ be ba ye, “Yin won yin Itsi Adakunom nong i ta kuus yin igo̱o̱n yin.” 10Kamok aMusa fe̱ ye, “Tiyiik ada be ango̱ wan. Koangan ne a kas ada ka ango̱ wu, a tu ku fe̱r dim. 11Amma yin won yin aner aya afe sang a tin sak riye̱ na atek be anyining wu nizen iya átek'e ta se nutser ba', ne aner'e fe̱ ye, ‘Ike̱ng iya i tase ye mi tá ka tobok mo yin mi n no̱o̱k Adakunom.’ #7.11: Akak te aze ye, “aKorban” 12Be anong yin tú ku te̱ne̱ng yin kutobok atek be anyining. 13Natoon anong ne yin ti sak yin rife̱ Adakunom tin te kpe̱de̱ng, be kuri igo̱o̱n yin ta bo̱so̱p yin inoon yin'e. Ne yin nye yin ike̱re̱ dide̱ng kyo̱ndi iyu na.”

Ike̱re̱ i ta sak anerawe tana se zhe̱l baꞌ

(aMat 15.10-20)

14Ayong aYeso bun a yis rigwo̱m ánerawe'me nong a tá fe̱ be ba ye, “Wesek yin kuto tin fok yin gye̱r. 15Sang ike̱ng iya i ta ne nufang, i ta no̱ nanu anerawe ne i tù ku sak a tà won dar a se zhe̱l baꞌ, amma iya i ta wuruk nanu wu ne i tù ku sak a tà won dar a se zhe̱l. 16Aya ne a be ato kufok a ra fok.”

17Nama a tá won rigwo̱m anerawe ame, a tá no̱ nasa kakak, álimazhiri wu tú nye ku rip natoon kumaas kuyong. 18aYeso fe̱ be ba ye, “Aser, yin gip, yin ren yin ike̱ng iya mi tin fe̱ a'a? Yin ren yin ye, ike̱ng iya i ta no̱ nafa anerawe i tà ne nufang ikyem i tà sak anerawe ta won dar a se zhe̱l baꞌ a? 19Kamok i no̱ kaye̱e̱r riye̱ wu baꞌ amma kaye̱e̱r kafa wu, ne i bun i wuruk nama'me.” (Rife̱ aYeso na tonong ye a ta kyem a ya koakye kuri naya.)

20Ne a ya kasho̱o̱n ye, “Ike̱ng iya i ta wuruk nanu anerawe ne i tù sak a ta won dar a se zhe̱l. 21Kamok Kaye̱e̱r riye̱ anerawe ne amaan kuto̱ro̱ng nes; kyo̱ndi kunye kye̱re̱ ne itsang be kufe̱s anerawe be rikuna, 22ne kuye̱re̱k, be anyas ne kuwo̱ro̱k anerawe, ne rinyisi rikan, ne rishishim, be naborok, ne kuka be rifunam. 23Cice̱r amaan kunye na nes kaye̱e̱r riye̱ anerawe ne i ku sak a ta won dar a se zhe̱l.”

Kuno̱o̱k katsak abining akak

(aMat 15.21-28)

24aYeso won karo̱ kayong nong a ta be niben aTaya be aSidon. A no̱ nasa kakak a shim akak Sang tu ren baꞌ, gip be anong a kyem a ne̱r rice wu baꞌ. 25Abining akak, angas wu ta be amaan kabik, a fok itak aYeso yong a wor a be̱ nong a ta be kpa natak wu. 26Abining'e nye abafe aHeleni'me a tu tes na aFoneshiya, a nye aYeso akusuk ye, a ra tun amaan kabik na angas wu.

27aYeso fe̱ be wu ye, “Won inoon ta ya ike̱ng ba ta shim cei nizham kamok i se gye̱r nong a ta sok naya inoon a ta no̱o̱k ágabu baꞌ.” #7.27: Koangan afe sang a ta nye aner aYahuda baꞌ, aner aYahuda tu sok kyo̱ndi agabu.

28Abining'e fe̱ be wu ye, “Ei, anong gye̱r, Atekasa, amma agabu gip a ya ribir naya inoon.”

29Ayong aYeso fe̱ be wu ye, “Kamok rife̱ wan na, ku bun kari, amaan kabik'e n kam be angas wan.”

30A tseng kari nong a ta se se̱ angas wu nameneng. Amaan kabik ame n kam be wu.

aYeso sak agbanu ne agbato akak tà te atser

31Ayong aYeso won iben aTaya nong a ta gor nabas aSidon ne a be nudung aGalili, naro̱ a ta yis ye, kaben iwo̱p kuso̱k. 32Azong áner ákak tu be̱e̱n aner akak a ta nye agbato ne kufe̱ kanu ku ro̱. Aner'e ne a nye aYeso kusuk ye a rin sak kubo̱k ni wu.

33Nama aYeso tá ko̱ro̱k aner ame nabas azining, yong a ti te kabanbo̱k wu nuto aner ame, ne a ni ta ace̱, na a ra irem'e. 34Ne aYeso sok anyisi naza ne a ko̱ro̱k isong, nong a ta fe̱ ye, “Ifata!” I ta sor “Karak!”

35Nama iyu, ato aner ame wor akarak ne irem wu te ne a kpaan kufe̱ kanu gye̱r.

36aYeso fe̱ be ba be agbang kuto̱ ye, Sang a tu tak akak baꞌ, amma a ta fa bun a fe̱ anong'e ne ba yiir kutaas itak'e. 37Anerawe wor á te zhing ne á fe̱ ye, “A nye koakye gye̱r. A kyem a sak agbato ta fok ne a sak agbanu ta fe̱ kanu.”

Currently Selected:

aMarkus 7: izrNT

Highlight

Copy