aMarkus 6

Aner kuzarap be kuyiik nuwo̱p wu baꞌ

(aMat 13.53-58; aLuk 4.16-30)

1aYeso won karo̱ kayong nong a tú ku bun nuwo̱p wu mak be álimazhiri wu. 2Kunom Asabar tá fa nye ayong a san kubo̱so̱p ánerawe'me kaye̱e̱r kutu aduwa. Ánerawe whe̱re̱ be̱ nong a tú ku foos, azhing tú ku yiir ba ayong áfe ye, “Aner na se̱ ike̱re̱ iyu akye̱? Akye̱ kuri kuren ike̱ng ne a tu no̱o̱k, nong a tin nye ike̱re̱ azhing e̱? 3Ayu ne a nye akapinta a? Ayu ne a nye igon aMarya aꞌa? Aronyining aYakub be aYusufu ne aZhud be aSiman aꞌa? Ángasnyining se aze mak be yir aꞌa?”

Ayong riye̱ ba beseng be wu.

4Ayong aYeso fe̱ be ba ye, “Aner kuzarap be kuyiik koakye, amma kaye̱e̱r kasa wu ne kaye̱e̱r áfe iri wu be kaye̱e̱r kuwo̱p wu tsek ne a be kuyiik baꞌ.” 5aYeso kyem a nye ike̱ng azhing azong baꞌ, ma ke a tin saas ibo̱k natoon ánerawe cie̱k nong á tá te atser. 6A te zhing kamok kuwon dar kuno̱o̱k katsak ba.

aYeso tom kuso̱k be afa ame

(aMat 10.1-15; aLuk 9.1-6)

Ayong aYeso tsang a gorok ne a bo̱so̱p ánerawe'me kaye̱e̱r iwo̱p ikak izhizhe̱k'e.

7Ayong a yis álimazhiri wu kuso̱k be afa ame nong a tú ku tom ba afufa afufa ne a ku no̱o̱k ba kukyem kuturung amaan nabik.

8Ne a fe̱ be ba ye, “Sang tu sok yin ike̱ng ikak kamok kutseng yin'e baꞌ, tú be yin naya, ka ishika, ka itso̱m kaye̱e̱r ishika ares yin baꞌ. 9Tes yin akpatak amma sang tú be yin akpiin afa baꞌ. 10Izen iya ne yin no̱ yin nasa kakak, sor yin azong ma izen iya yin tana won yin kuwo̱p'e. 11Ke áner karo̱'me tá shan yin baꞌ, ka á tá fok yin kuto baꞌ, ne yin re̱ng yin iwur atak yin nizen afe yin tana won yin azong nong i ta sor asheda natoon ba.”

12Anong ne á dorok nong á tá se taas anerawe ye á ru shishing kuse ba. 13Á turung ámaan nabik dide̱ng ne á ni kon name na áfe iro̱k whe̱re̱ ne ka sak ba, á tá te atser.

Riku aYohana aner abatisma

(aMat 14.1-12; aLuk 9.7-9)

14Ayong aHiridus fok itak'e, kamok riyerek aYeso tsang ri tseng koake̱. Ma ákak fe̱ ye, “aYohana aner abatisma ne a bun an dorok be kutser. Iyong ne i sak kukyem kunye ike̱re̱ azhing ta se be itomong.”

15Ákak fe̱ ye, “Aner'e nye Iliya.” Ne ákak fe̱ ye, “Aner'e nye aner kuzarap akak ze̱e̱r kaye̱e̱r áner kuzarap agbugbang'e.”

16Amma nizen iya aHiridus tá fok anong, ayong a fe̱ ye, “Aner'e nye aYohana, aya mi tá te̱n rice wu, ne a mo ku dorok nure̱k!”

17aHiridus be rice wu tsang a no̱o̱k Itsi ye, a ra yiir aYohana nong a tú ku te ni itso̱m. A nye anong kamok aHiridus nye kuwe̱ne̱ng be aHirudiya, abining aronyining wu, aFilibus. 18Kamok aYohana tsang a yiir kufe̱ be aHiridus, ye, “I nye rine̱n, wan tana sok abining aronyining wan.” 19Ayong aHirudiya a yiir be aYohana riye̱, a shim nong a tú ku fe̱r. Amma a kyem baꞌ. 20Kamok aHiridus fok inyim aYohana, ne a ren ye a nye aner a tá be katsak ne a se zhe̱l. Ayong a tú fek, nizen aHiridus tá fok rife̱ aYohana ne a no̱ nudaam dide̱ng, gip be anong a shim a tá ku fok.

21Ni igang'e aHirudiya se̱ izen makong. Nizen kunye riye̱ rikan kutes aHiridus, a nye naya kamok ágbang áner ne áko̱k kasho̱o̱n ásozha, be áya a tá nye áritek kaye̱e̱r kuwo̱p aGalili. 22Nizen iya angas aHirudiya'me tá no̱ nong a tá to nato, a kare̱p aHiridus riye̱ be átsen wu ame. Ayong agwo̱m ame fe̱ be kanamang'e ye, “Ni rip koakye ike̱ng iya wan tá shim. Mi tà ka no̱o̱k.” 23Ne a shu ye, “Ike̱ng iya wan tá rip, mi tà ka no̱o̱k, ko ribir kaben'i.”

24Ayong a wuruk nufang nong a ta se rip anyining wu ye, “Akye̱ ne mi ta rip e̱?”

Anyining'e fe̱ be wu ye, “Rice aYohana aner abatisma.”

25Kanamang ame tseng nufe agwo̱m zizirik nong a ta se fe̱ ye, “Mi shim rice aYohana aner abatisma kyo̱o̱rna kaye̱e̱r kures.”

26Agwo̱m'me daam dide̱ng, amma kamok wu ta tsang a ya kushu nasho̱o̱n átsen'e, a shim a tu ku roon ne baꞌ. 27Ayong a tom áya a ta nye itomong azong zizirik nong á tá be̱ be rice aYohana. Áner ame tseng nong á ta se te̱n rice aYohana nitso̱m, 28nong á tá be̱e̱n'e nures. A no̱o̱k kanamang'e, ne kanamang'e no̱o̱k ango̱ wu. 29Nizen iya álimazhiri aYohana tá fok anong, yong á be̱ á tá be sok kubir kuro̱m'e nong á ta se ne̱r.

aYeso no̱o̱k ánerawe izungu itoon naya

(aMat 14.13-21; aLuk 9.10-17; aYoh 6.1-14)

30Ámanzo aYeso ame tú ku gorok nong á tú ku taas ike̱re̱ iya ba tá nye ne iya ba tá bo̱so̱p cice̱r. 31Kamok ánerawe tá mak whe̱re̱, á be̱s ne á bun á ku burung, ma ámanzo'me kyem á se̱ izen nong á tá yas baꞌ, yong aYeso fe̱ be ba ye, “Be̱ yin, a wan yin nong ta be yir naro̱ ka ta se yu nong ta song yir azong.”

32Ayong á no̱ kaye̱e̱r kukpara ashi nong á tá tseng naro̱ kakak wu ze̱r. 33Amma ánerawe whe̱re̱ áya a tá di ku dorok ba, á tu ren ba, yong á dorok be itsi nong á ta se tsang á ku kuus. 34Nizen aYeso tá wuruk kaye̱e̱r kukpara ashi'me, a di ánerawe whe̱re̱, yong a fok kuro̱ riye̱ ba, kamok a se kyo̱ndi itsamang dar afek. Ayong a san ku kabo̱so̱p ba ike̱re̱ whe̱re̱.

35Izen'e se nabas kawheshirim yong álimazhiri wu be̱ nufu nong á ta fe̱ be wu ye, “Yir se yir katse, izen m bo̱ karo̱. 36Kamok anong won ánerawe'me nong á ta se tse̱r naya kaye̱e̱r iwo̱p iya i ta se bubarak nong á ta shan ike̱ng ikak ife kuya.”

37Amma aYeso fe̱ be ba ye, “Ku no̱o̱k yin ba ike̱ng ikak nong á ta ya.” Ba fe̱ be wu ye, “Iyu ta sok itso̱m ife̱n ikara aner aya a ta nye itomong! Yir ta sok yir itso̱m anong, nong ta se fe̱r yir natoon abiredi nong tu ku no̱o̱k yir ba nong á ta ya a?”

38Ayong aYeso tú ku rip ba ye, “aBiredi amang ne yin be yin e̱? Tseng ta se ye̱re̱k yin.” Nizen ba tá di ayong á fe̱ ye, “Ágbang abiredi atoon be izos ifa.”

39aYeso fe̱ be álimazhiri wu ye, á ra sak ánerawe'me cei nong á tá sosok nagwo̱m iso̱k itutoon natoon agam ashirim. 40Ayong a sak ánerawe'me tá sosok nagwo̱m, ákak kuso̱k inyak ne ákak iso̱k itoon. 41aYeso sok ágbang abiredi atoon be ízos ifa ame. Ne a sok rice naza a tá tonong riye̱ rikan be Adakunom. A te̱se̱ng abiredi ame, a tá no̱o̱k álimazhiri wu nong á tá saas ánerawe'me. aYeso bun a tú kasap ba izos ifa ame. 42Cice̱r ba ya ma á whas, 43ne álimazhiri'me tusung ribir ribir'e cip ma íderse kuso̱k be ifa. 44Áner a tá kuya abiredi'me kuse atek izungu itoon.

aYeso tseng natoon ashi

(aMat 14.22-27; aYoh 6.16-21)

45Gbashak ne aYeso wor a sak álimazhiri wu tá no̱ kaye̱e̱r kukpara ashi nong á tá tseng na aBatseda nasho̱o̱n wu, nong wu tá ra ma kute ánerawe'me ni iren. 46Nama a tú ku te ba niren'e ne a ngarak natoon kawhanang nong a ta se nye aduwa.

47Kawheshirim tá fa nye ne kukpara ashi se natite kudung, aYeso rusek wu ze̱e̱r natoon rigung'e. 48aYeso tá fa di álimazhiri ta sen so̱ risam nong á ta gor be kukpara ashi ba'me, kamok kuwun tu zim ba. Nabas itso̱m itaar natuk, yong a ti wuruk niba natoon ashi. A tseng kyo̱ndi a tú ku gor ba. 49Amma izen á tú ku di a tá sen tseng natoon ashi'me, ba sor ye itseng, áyong a tang ikun, 50kamok cei ba tú di, inyim tú ro̱ ba.

Ayong aYeso fe̱ be ba gbashak ye, “Na ka tsesek yin. Sang tu fok yin inyim baꞌ. Aner'e nye mi.” 51Ne a no̱ nukpara ashi'me mak be ba ne kuwun ame nyeseng. Iyong á te ba azhing, 52kamok ba ren ike̱ng ife agbang abiredi ame tá sor baꞌ, kamok ike̱ng'e tu se ba whi kaye̱e̱r aye̱.

53aYeso be álimazhiri wu tá fa tar agbang kudung'e, á tiik ba niben aGenesaret, a rusom kukpara ashi ba ame azong. 54Kum be kuwuruk ba kaye̱e̱r kukpara ashi ame, ánerawe wor á ren ye aYeso'ong. 55Ayong ánerawe nes niben'e ze̱r ze̱r be itsi nong á tá be̱s'e be áfe iro̱k natoon ike̱re̱ kameneng ba, koakye karo̱ ba tá fok ye aYeso tú ku se. 56Koake̱ ne aYeso no̱, ni iwo̱p izhizhe̱k'e be igbang'e ne ife ikim'me, a se̱s áfe iro̱k ánerawe tan meres na naro̱ rizhik. Á tú nye izong ye, a ru ku won ba nong a ta ras kanu kukpiin wu, ne áya a ta ras cice̱r te atser.

Currently Selected:

aMarkus 6: izrNT

Highlight

Copy