aLuka 3
3
aYohana aner abatisma ne a nye iren
(aMat 3.1-12; aMar 1.1-8; aYoh 1.19-28)
1Nizen aKaisar aTibariya ta se kaye̱e̱r riye̱ rife̱ kuso̱k be atoon be rigwo̱m wu, aBuntus Bilatus nye agwo̱mna iben aYahuda, ne aHiridus nye agwo̱m iben aGalili ne aronyining wu aFilibus nye agwo̱m iben Ituriya be aTarakunitus, ne aLisaniya nye agwo̱m iben Abiliya. 2Nizen iya aHanana be aKayafas tá nye ágbang átsi, rife̱ Adakunom be̱ nufe aYohana igon aZakariya kaye̱e̱r katse. 3A tsang a tseng niben aUrdun cei ne a fe̱ rife̱ natoon abatisma kushishing kuse nong a tà ku re̱ng ba rine̱n. 4Kyo̱ndi i ta se ni izibir kaye̱e̱r kufumung Ishaya aner kuzarap ye,
“Kuto̱ aner akak yis kaye̱e̱r katse ye,
‘Nye yin Agwo̱m Ágwo̱m iren,
ku nye yin iren'e cop.
5Naro̱ na ta se surung a tà shining be iben,
Koakye kawhanang be agung a tà yirik.
Iren i ta se gordok, i tà te riyong,
Iren i ta risik i tà te itek.
6Ánerawe cei tà di kashesh Adakunom.’ ”
7aYohana fe̱ be rigwo̱m ánerawe a tá be̱s nufu nong a tu ku nye ba abatisma #3.7: aBatisma: fa: Akanang Ike̱re̱ Ikak, kaye̱e̱r nafarap'e nakak. ye, “Yin naban afomong! Angan tá tees yin ye i ra teng yin amok Adakunom a tà saase e̱? 8Nye yin kunye kuya ku tana tonong ye yin n shishing yin kuse yin, sang tu wo̱k yin rice yin ye Ibrahim ne a nye ada yin baꞌ. Mi ta tak yin, Adakunom ta kyem a sok ata na, a tin nye Ibrahim inoon. 9Kanu kate̱m se ritin kakon'e kyo̱o̱rna, koakye kakon ka ta tes kutes kutek baꞌ, a tà te̱me̱ng a tà te nuro̱ng.”
10Ne rigwo̱m ánerawe'me ku rip ye, “To̱, akye̱ ne yir ta nye yir e̱?”
11Ayong aYohana fe̱ ye, “Aner aya a ta be akpiin afa a ra kabak be afe a ta be baꞌ, afe a ta be naya ra nye anong gip.”
12Áfe kushashang itso̱m iben be̱s nong á tà ka nye ba abatisma gip, ne á rip ye, “Aner kubo̱so̱p, akye̱ ne yir ta nye yir e̱?”
13Ayong a fe̱ be ba ye, “Sang tu ba shan yin ike̱ng i ta gor iya a tá fe̱ ye i ri shashang yin baꞌ.”
14Ne ásozha ákak ku rip ye, “Akye̱ ne yir tà nye yir e̱?”
Ne a fe̱ be ba ye, “Tin shashang yin itso̱m nufe akak be agap ka tin bo̱s yin naborok na ánerawe baꞌ, nifan yin nitso̱m a ta ka karang yin.”
15Ánerawe se be kutor kube̱ aKiristi, ne á nibo̱ro̱ng kaye̱e̱r aye̱ ba ye ka aYohana ne a nye aKiristi'me e̱? 16aYohana fe̱ be ba ye, “Mi ta nye yin abatisma be ashi, akak afe a ta be kukyem ne a ni nar, tà be̱, afe mi tana kyem i bis idun akpatak wu baꞌ. A tà ka nye yin abatisma be Kabik Kazhe̱l'e ne kuro̱ng. 17Kube wu se nubo̱k wu, a tanin tas alikama a tan she̱sh, ne a tusung iwe̱ng'e kaye̱e̱r ingme̱, ne a shosh áwhe̱'me be kuro̱ng kuya sang a tana riming baꞌ.” 18aYohana no̱o̱k ánerawe iriri itabak be agap ne a ku nye ba awazi.
19aYohana tigba aHiridus a tá nye agwo̱m, kamok aHiridus'e sok aHirudiya a ta nye abining aronyining wu ne ike̱re̱ imaan'e ikak wu tan nye. 20aHiridus ti barang amaan kunye ne a te aYohana nitso̱m.
A nye aYeso abatisma
(aMat 3.13-17; aMar 1.9-11)
21Nizen iya a tá nye ánerawe'me abatisma cei, a nye aYeso'me gip. aYeso ta se be i nye aduwa, kaza karak, 22ne Kabik Kazhe̱l'e kyo̱ndi abo̱p ni tiik ni wu. Ne kuto̱ ne naza ye, “Wan ne i nye Igon'i kaya mi ta shim. Mi fok kusas wan dide̱ng.”
Izo̱ro̱k aYeso tu ku ne
(aMat 1.1-17)
23Nizen iyong aYeso se aye̱ iso̱k itaar a tá san itomong wu. A nye igon aYusufu, nuto̱ro̱ng rinerawe, aYusufu nye igon aHeli.
24aHeli nye igon aMatat, aMatat nye igon aLawi,
ne aLawi nye igon aMelki. aMelki nye igon aYana,
ne aYana nye igon aYusufu. 25aYusufu nye igon aMatatiya,
ne aMatatiya nye igon Amos. Amos nye igon aNahum,
ne aNahum nye igon Azaliya. Azaliya nye igon aNaya,
26ne aNaya nye igon aMaat. aMaat nye igon aMatatiya,
ne aMatatiya nye igon aShimeya. aShimeya nye igon aZhose,
ne aZhose nye igon aZhod. 27ne aZhod nye igon aZhowanan. aZhowanan nye igon aRafaya, ne
aRafaya nye igon aZarubabel. aZarubabel nye igon aSheltiyel,
ne aSheltiyel nye igon aNeri. 28aNeri nye igon aMelki,
ne aMaki nye igon Adi. Adi nye igon aKosam,
ne aKosam nye igon Almadam. Almadam nye igon Ar,
29ne Ar nye igon aZhoshuwa. aZhoshuwa nye igon Aliyeze,
ne Aliyeze nye igon aZhorim. aZhorim nye igon aMatat,
ne aMatat nye igon aLawi. 30aLawi nye igon aSaminu,
ne aSaminu nye igon aYahuza. aYahuza nye igon aYusufu,
ne aYusufu nye igon aZhonam. aZhonam nye igon Aliyakim,
31ne Aliyakim nye igon aMaleya. aMaleya nye igon aManana,
ne aManana nye igon aMatata. aMatata nye igon aNatan,
ne aNatan nye igon aDauda. 32aDauda nye igon aZhese,
ne aZhese nye igon aObida. aObida nye igon aBowas.
aBowas nye igon aSalmon, ne aSalmon nye igon aNashon.
33aNashon nye igon Aminadap, ne Aminadap nye igon Aram.
Aram nye igon aHeruna, ne aHeruna nye igon aPeres.
aPeres nye igon aYahuda, ne 34aYahuda nye igon aYakub.
aYakub nye igon Ishaku, ne Ishaku nye igon Ibrahim.
Ibrahim nye igon aTera, ne aTera nye igon aNahor.
35aNahor nye igon aSeruk, ne aSeruk nye igon aReyu.
aReyu nye igon aPelek, ne aPelek nye igon Aber.
Aber nye igon aShela, ne 36aShela nye igon aKana.
aKenan nye igon Afazad, ne Afazad nye igon aShem.
aShem nye igon aNuhu, ne aNuhu nye igon aLamek.
37aLamek nye igon aMetusela, ne aMetusela nye igon aEnok, aEnok nye igon aYarek ne aYarek nye igon aMahalale,
ne aMahalale nye igon aKenan. 38aKenan nye igon Anosh,
ne Anosh nye igon aShitu. aShitu nye igon Adamu,
ne Adamu ma nye igon Adakunom.
Currently Selected:
aLuka 3: izrNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc
