aLuka 2

Kutes aYeso

(aMat 1.18-25)

1Nizen iyong agbang agwo̱m a tú ku yis ye aKaisar Agusta no̱o̱k itsi ye a ra fa ánerawe niben aRom cice̱r. 2Iyu ne i nye ime̱se̱ng ifa ánerawe a tá nye nizen iya aKiriniyus tá nye agwo̱mna niben aSuriya. 3Koangan be nuwo̱p wu nong a tà su ku fa.

4Ayong aYusufu gip a dorok na aNazaret niben aGalili, a tá be niben aYahuda nuwo̱p aDauda, a ta yis ye aBetalami, kamok wu nye aner kasa aDauda. 5A tseng azong nong á tà su ku fa be aMarya, kanamang kusam wu ame, ne ka se be kafa. 6Nizen á tá se azong, izen kutes'e nye, 7yong a tes acam, igon ime̱se̱ng wu. A kunung be ítan ares nong a tá mees nukpara a tin korok itsamang naya, kamok ba se̱ kasa naro̱ átsen tú ku tisik baꞌ.

Ámaleka be̱ nufe áfek ítsamang

8Áfe kufek tuse á tá sor niwe̱ng bubarak azong ne á ye̱re̱k ítsamang ba natuk. 9Amaleka Adakunom ti wuruk niba ne akanang kuyiik Adakunom ku gorok ba ma inyim tú ro̱ ba dide̱ng. 10Amma amaleka'me fe̱ be ba ye, “Sang tu fok yin inyim baꞌ, mi ma ka be̱e̱n yin Rife̱ Ritek rife̱ riye̱ rikan dide̱ng, riya ri ta nye rife̱ ánerawe cice̱r. 11Katuur a ma ka tes yin aner kashesh nuwo̱p aDauda, wu ne a nye aKiristi, #2.11: aKiristi: fa: Akanang Ike̱re̱ Ikak, kaye̱e̱r nafarap'e nakak. aya a ta nye Agwo̱m Ágwo̱m. 12Ike̱ng iya yin tana san i di yin nye, igon a tan kunung be ítan ares nameneng kaye̱e̱r kukpara a tin tes itsamang naya.”

13Nizen izining rigwo̱m ámaleka áfe a ta se kaye̱e̱r kaza wuruk nong á tá kerek Adakunom mak be amaleka ame ye,

14“Kuyiik nye kufe Adakunom aza kaye̱e̱r kaza,

nazatse kameneng riye̱ kuse nufe áner áfe wu ta shim.”

15Nizen iya ámaleka'me tú ku won ba nong á tú ku bun naza, áfe kufek ame fe̱ ye, “I tseng yir na aBetalami nong ta se di yir ike̱ng Adakunom tá min tak yir na.”

16Iyong á tseng zizirik ne á se se̱ aMarya be aYusufu be igon ame an mees kaye̱e̱r kukpara a tin tes itsamang naya ame. 17Nizen áfek ame tá di igon'e yong á tsang á taas ike̱ng iya ba tá fok natoon igon'e. 18Ánerawe áya a tá fok itak cice̱r korok ibo̱k nafok ne á te zhing. 19aMarya sak ike̱re̱'me cei kaye̱e̱r riye̱ wu, ne a ni to̱ natoon'e. 20Áfek ame tú bun ne á tsang á tiyiik Adakunom ne á ku kerek kamok ike̱re̱ ba tá fok ne á di cei, kyo̱ndi a tú ku tak ba.

A tseng be aYeso na agbang kutu kuya Adakunom iben

21Nama inom ikara be kutes'e, izen a tana ku nye izhak tá fa nye, yong a tú ku te riyerek ye, aYeso, riyerek riya amaleka tá tsang a ku te'me kum ne an be kafa wu baꞌ. 22Izen a tana ku kusu ba nama kutes tá nye, kyo̱ndi Itsi aMusa ta fe̱, yong aYusufu be aMarya tseng be aYeso na aUshalima nong a tà no̱o̱k nasho̱o̱n Agwo̱m Ágwo̱m. 23Kyo̱ndi i tá se kaye̱e̱r izibir Itsi Agwo̱m Ágwo̱m ye, “Koakye igon kamitek'e kafe ime̱se̱ng'e tà sor Kazhe̱l'e kafe Agwo̱m Ágwo̱m.” 24Ne á nye asidaka ábo̱p afa ka ízip ifa ayi kyo̱ndi Itsi Agwo̱m Ágwo̱m tá fe̱ ye á ra nye.

25To̱, aner akak tuse na aUshalima a tú ku yis ye aSiman, afe a tá se gye̱r nasho̱o̱n Adakunom, ne a nye Adakunom itomong. A se be kutor afe a tana be̱ a tsesek Isarela. Kabik Kazhe̱l'e se mak be wu. 26Kabik Kazhe̱l'e tsang ka ku tonong ye sang wu tá tsang a ku baꞌ, ma a di aKiristi'me, aya Agwo̱m Ágwo̱m tá kasa. 27Kabik'e tú ku ra riye̱, yong a no̱ nubang agbang kutu kuya Adakunom iben, izen iya atek igon'e tá be̱ be igon ba aYeso ame, nong a tú ku nye ike̱ng iya Itsi ba tá fe̱. 28Ayong aSiman tú shan a tú ku kunung, ne a kerek Adakunom ne a fe̱ ye,

29“Agbang Agwo̱m Ágwo̱m, kyo̱ndi wan tá tsang i fe̱,

kyo̱o̱rna won asam wan tu tseng caang.

30Kamok mi n di kashesh wan be anyisi mi,

31Kaya wan tá nye kanye̱k'e nanyisi ánerawe cei.

32A ta nye akanang afe a tana tonong áner aya sang a ta nye áner aYahuda baꞌ,

katsak, ne a be̱e̱n ánerawe wan Isarela kuyiik.”

33Atek igon be anyining'e te zhing be ike̱ng iya a tá fe̱ natoon igon'e. 34Ne aSiman ku te ba kuce̱ a tá fe̱ be aMarya anyining igon'e ye, “Adakunom tsang a sak igon na tà sak ánerawe Isarela akak tu ku bun kama, ne a sak ákak ta ya kasho̱o̱n. A tà sor ike̱ng ánerawe tanin fe̱ imaan'e natoon wu, 35nong a se̱ a tà te̱s kuto̱ro̱ng ánerawe whe̱r, ne ike̱ng'e tà ya riye̱ dide̱ng gip.”

36Abining akak a tá nye kuzarap tuse azong gip, riyerek wu nye aHanatu angas aPanuwel irem Ashiru. A tsang a kop dide̱ng, a te aye̱ kanataar be amitek wu 37ne amitek'e ku. A sor akumung ma aye̱ iso̱k ikara be anaas, a kam be agbang kutu kuya Adakunom iben ze̱e̱r baꞌ. A yiir ya Adakunom iben katuk be kunom ne a nye azumi be aduwa. 38A be̱ nufuba nizen iyong, a tá kerek Adakunom, ne a fe̱ rife̱ natoon igon'e nufe áya a tá sor ne á tor á tà di aya a tana sheshek aUshalima.

39Nizen aYusufu be aMarya tá fa gang i nye ike̱re̱ Itsi Adakunom tá shim cei, á tú bun na aGalili á tá be nuwo̱p ba na aNazaret. 40Igon'e rasak ne ka kpa agap a tú shining be kukyem ne ritek Adakunom se mak be wu.

Igon aYeso na agbang kutu kuya Adakunom iben

41Koakye riye̱ átek aYeso tseng na aUshalima kamok riye̱ rikan izen aPasova. #2.41: aPasova: fa: Akanang Ike̱re̱ Ikak, kaye̱e̱r nafarap'e nakak. 42Nizen aYeso tá se aye̱ kuso̱k be afa, atek wu tseng be wu naro̱ riye̱ rikan kyo̱ndi igo̱o̱n ba tá fe̱. 43Nama á tá gang riye̱ rikan'e, átek aYeso'me tá sen kubun kari, aYeso tu fan na aUshalima, ba ren baꞌ. 44Á sor ye a se mak be ba, ma á woso kutseng ne á san i ku tse̱r kaye̱e̱r áfe iri be áferime̱ ba. 45Á tá fa ku di baꞌ, ne á kubun na aUshalima nong á tá su ku tse̱r. 46Nama inom itaar á tú se̱ kaye̱e̱r agbang kutu kuya Adakunom iben nusonong natite áner kubo̱so̱p, ne a ka foos ba ne a ku risim ba. 47Koangan afe á tú ku fok, te zhing kamok kuren ike̱ng wu be kuri kushiish wu tá shiish. 48Atek wu tá fa ku di ne a te zhing, ne ango̱ wu fe̱ be wu ye, “Igon'i, akye̱ sak wan ti nye yir'e ana e̱? Yir be ada wan i kun daam yir be ku ka tse̱r yir makiyi.”

49Ayong a tú ku rip ba ye, “Akye̱ sak yin tsang i ni tse̱r yin e̱? Yin ren yin ye gye̱r ke mi se nasa Ada mi aꞌa?” 50Amma ba ren ike̱ng wu tin fe̱ natoon'e baꞌ.

51Ayong a tseng na aNazaret mak be ba ne a kuus ike̱ng iya ba tá fe̱. Ango̱ wu saas ike̱re̱'me kaye̱e̱r riye̱ wu cei. 52Ayong aYeso ti barang kurasak ne kukyem, ne a kpa kati kaseng nasho̱o̱n ánerawe ne Adakunom.

Currently Selected:

aLuka 2: izrNT

Highlight

Copy