aLuka 10

aYeso tom áner iso̱k kanataar be afa

1Nama anong, aYeso kasa áner iso̱k kanataar be afa nong a tú ku tom ba afufa afufa nasho̱o̱n wu ye á ru tseng kaye̱e̱r koakye kuwo̱p be ni naro̱ wu tana tseng cice̱r. 2A fe̱ be ba ye, “Ishamang kuse dide̱ng, amma áfe itomong'e se hiir. Kamok anong nye yin aduwa nong atek riko̱'me tin barang áfe a tana ku nye itomong ishamang'e. 3Tseng yin! Mi sen ka tos yin kyo̱ndi ítsamang ta se kaye̱e̱r ágabu katse. 4Sang tu be yin ishika itso̱m ka ishika ares ka ákpatak akak ze̱e̱r baꞌ, tu nye yin ashou aso̱p niren baꞌ.

5“Koakye kasa ne yin no̱ yin fe̱ yin ye, ‘Maleku yin, áfekari.’ 6Ke aner a ta shim kameneng riye̱ tuse azong, a ta se̱ nufe yin, ke anong baꞌ, a tà se̱ baꞌ. 7Sor yin nasa kayong, ne i ya ne i so̱ yin koakye ne á ta ka no̱o̱k yin, kamok i se gye̱r ke aner a ta nye itomong ta se̱ ishorong wu. Sang tu yiir shishing yin nasa baꞌ.

8“Koakye kuwo̱p ne yin tseng yin ke á ta shan yin be riye̱ rikan, ne i ya yin koakye ne á ta ka no̱o̱k yin. 9Sak yin áfe iro̱k á ta se azong ta te atser, ne i tak yin áfe kuwo̱p'e ye, ‘Rigwo̱m Adakunom m be̱ bubarak.’ 10Amma kuwo̱p kuya ne yin no̱ yin ke á ta shan yin be riye̱ rikan baꞌ, ne i tseng yin nanu iren kaye̱e̱r kuwo̱p'e ta se fe̱ yin ye, 11‘Iwur kuwo̱p yin iya i tin ngarak natak yir gip, yir ta waar yin'e. Amma ren yin ye, rigwo̱m Adakunom m be̱ bubarak.’ 12Won ta ka tak yin, i ta ra kuse be kuwo̱p aSodom katuk amok'ong be kuwo̱p kuyong.

13“Awo̱ be kuwo̱p aKorasi! Awo̱ be kuwo̱p aBatseda! Ke a fa fe̱ ye a nye kuri ike̱re̱ azhing a tá nye nufe yin na aTaya be na aSidon ke á shishing kuse ba gbugbang, ne á sosok be agye̱e̱r ares ne á korok itong nace. 14Amok Adakunom tana to̱ aTaya be aSidon'e ta ra kuse ne a nar afe yin katuk amok'e. 15Wan, aKapanum, wan di ye a tà ka tiyiik ne a nar ribir'e a? Wayo, a tà ka barak tsik kaye̱e̱r karo̱ kaya áfe a tá kus tú ku se.

16“Aner aya a ta ka fok yin kuto, i nye ye a ti fok. Aner aya a ta ranyin, i nye ye a ti ramin. Aya a ti ramin, i nye ye a rawu aner aya a tin tom.”

17Áner iso̱k kanataar be afa'me tú bun be riye̱ rikan nong á tá se fe̱ be aYeso ye, “Atekasa, ítseng gip i ti fok yir kuto ke yir yis yir riyerek wan.”

18Ayong aYeso fe̱ be ba ye, “Mi di Ishetan ta samang a ta kpa ni itsik wu kyo̱ndi iza ta tarang karo̱. 19Mi ma ka no̱o̱k yin kukyem nong ta tseng yin natoon íwhen be ínye̱ng, ne i ya yin agap amudo̱n yin, Ishetan. Ka ike̱ng ikak imaan'e ta ka man yin baꞌ. 20Gip be anong, tu nye yin riye̱ rikan kamok ítseng tá ka fok yin kuto baꞌ, nye yin riye̱ rikan kamok an zibir ayerek yin kaye̱e̱r kaza.”

aYeso nye riye̱ rikan

(aMat 11.25-27; 13.16-17)

21Nizen iyong aYeso n shining be Kabik Kazhe̱l'e yong a fe̱ ye, “Mi be riye̱ rikan be wan, Ada agbang, Agwo̱m Ágwo̱m, wan afe i tá nye kaza be kaben, kamok wan ne̱r áya a tá be kukyem ne áya a tá ren ike̱ng natoon ike̱re̱ na nong i ta tonong áya a ta se kyo̱ndi inoon zhizhe̱k. I se gye̱r anong, Ada, kamok iyong ne i nye kushim riye̱ wan.

22“Ada, mi n won koakye nubo̱k wan. Akak ren Igon'e baꞌ, ma Ada'me tsek. Akak ren Ada'me baꞌ, ma Igon'e be áya Igon'e ta shim a tu ku ren ba.”

23Ayong aYeso kirik nufe álimazhiri wu nong a ta fe̱ be ba kyo̱o̱n nukim ye, “Áner riye̱ rikan nye áya a ta di ike̱re̱ ife yin ta sen ye̱re̱k yin'e na. 24Won ta ka tak yin, áner kuzarap Adakunom be ágwo̱m whe̱re̱ shim ke á ye̱re̱k ike̱re̱ yin ta sen ye̱re̱k yin'e na, amma á kyem á di baꞌ, ne á shim ke á foos ike̱re̱ yin ta sen foos yin'e na, amma á kyem á foos baꞌ.”

Kumaas natoon aner aSamariya akak

25Katuk kakak, aner akak a tá ren Itsi aMusa dide̱ng dorok nong a tá bo̱mo̱ng aYeso be kurip ye, “Aner Kubo̱so̱p, akye̱ ne mi ta nye nong ta se̱ kutser kufe izen izen e̱?”

26Ayong aYeso fe̱ be wu ye, “Akye̱ ne i se ni izibir kaye̱e̱r Itsi aMusa e̱? Itsi'me fe̱ ane̱ e̱?”

27Ne aner ame fe̱ ye, “Shim Agwo̱m Ágwo̱m wan Adakunom wan be riye̱ wan cei, be kutser wan cei, be agap wan cei, ne kuto̱ro̱ng wan cei, ne i shim afegbak wan kyo̱ndi wan ta shim rice wan.”

28Ne aYeso fe̱ be wu ye, “Ike̱ng wan tá fe̱ se gye̱r. Ke wan nye anong, wan ta se̱ kutser.”

29A shim ke a tonong ye wu se gye̱r nasho̱o̱n Adakunom, ayong a rip aYeso ye, “To̱, angan ne a nye afegbak'i e̱?”

30Ayong aYeso tú tak kumaas na ye, “Aner akak dorok na aUshalima, a dorok a tisik a be na aZheriko. Ayong a gor a nyim be ágbang ákpatang ákak, á turung ares wu ne á mu ku nye amaan atsor, nong á tá ma ku won azong kyo̱ndi kukom. 31Nizen iyong atsi akak sen tisik iren iyong gip, a tá fa di aner ame ne a faas a tá tseng ako̱o̱n wu. 32Anong ne aner aLawi akak gip, a tá fa be̱ naro̱'me, a tú ku di ne a faas a tá tseng ako̱o̱n wu. 33Amma aner aSamariya akak a tá se be kutseng wu, a tá be̱ naro̱ aner ame tú ku se. A tá fa ku di ne a ro̱ riye̱ wu. 34A tseng nufe aner ame nong a tú ku kusu ifor'e be ashi kakon a ta yis ye anap, ne a ni te name nong a tá rosom. Ne a sok aner ame natoon azhaki wu nong a tá tseng'e naro̱ átsen tu ku ko̱s, ne a ni sak riye̱ ni wu. 35Naya katson'e, a sok ica itso̱m a ta yis ye adinari ifa a tá no̱o̱k aner a tin sak riye̱ naro̱ ame nong a tá fe̱ be wu ye, ‘Inga, ni sak riye̱ ni wu. Koakye ne wan ti fe̱r ni wu, nizen iya mi be̱ ne i ni tak, mi tá ka karang.’ ”

36Ayong aYeso tú rip ye, “Kaye̱e̱r áner ataar na, wan di ye angan ne a nye afegbak atek nufe aner ágbang ákpatang tu ku tsor na e̱?”

37Ayong aner a ta ren Itsi ame fe̱ be aYeso ye, “Aner a tá ro̱ riye̱ aner'e.” Ne aYeso fe̱ be wu ye, “To̱, tseng ta se nye anong gip.”

aYeso gor numa áMarta

38Nizen aYeso be álimazhiri wu tá se be kutseng, á gor nuwo̱p kukak yong abining akak a tú ku yis ye aMarta be̱ a tú ku shan niren nong a tá no̱ kari wu. 39aMarta ame be angasnyining akak a tú ku yis ye aMarya, a sonong nasho̱o̱n aYeso nong a tá foos ike̱re̱ aYeso tá se be kutaas'e. 40Amma aMarta se̱ kudaam kamok riye̱ wu se ninye kanye̱k ike̱re̱ i ta se nasho̱o̱n wu. Ayong a be̱ nufe aYeso nong a tá fe̱ be wu ye, “Agwo̱m Ágwo̱m, wan di angasnyining'i tá min won nong mi ta nye itomong mi ze̱r aꞌa? Fe̱ be wu nong a tin se̱ mo.”

41Ayong aYeso fe̱ be wu ye, “aMarta! aMarta! Wan min te riye̱ wan nike̱re̱ dide̱ng ma i no̱ nudaam. 42Ike̱ng izining ne i nye igbang'e nusor wan. aMarya n kasa iya i ta se gye̱r, ka akak tin shan baꞌ.”

Currently Selected:

aLuka 10: izrNT

Highlight

Copy