Rooma 13

Nɔɔ a zang ɓɔɔ ri zang bang, bannang

1Zang ɓu wu ɓaa shoo ka nyaa zang ɓɔɔ ri zang bang ɓarɛ ɓɛɛ. Ka ruu ɓɔɔ, ɓi Laa kɔ gbete a zang naa bannang nwannang ɓɛɛ. A zang kɔ ri nwáng zang bang ɓee, ɓi Laa shingnɛ ri nwàngnɛ. 2Ka ruu nɔngkɔ, zang ɓɔɔ nɛɛ shii bàng nɛɛ zang bang, bɛ̃ɛ ɓi vuu ɓɔɔ Laa palɛ ɓɛɛ. Zang ɓɔɔ nɛɛ palɛ nɔngkɔ, shingnɛ, zang wu dɔng wu ruu. 3Zang ɓɔɔ ri nɛɛ palɛ vuu tɔ̃ɔ, ri kaa vɔrɔ zang bang kpang. Zang ɓɔɔ ri pálɛ̀ vuu shi kpang kɔ, ri kaa vɔrɔ. Mɔɔ kasɛ nɛɛ mɔɔ kaa vɔrɔ zang bang kpang ya? Palɛ vuu ɓɔɔ tɔ̃ɔ, zang bang dɔ̀ɔ́ mɔɔ ditɔ. 4Ka ruu ɓɔɔ, zang bang ɓi jaafoo Laa ɓɛɛ. Pálɛ̀ shonang, nɛɛ tɔ̀ɔ wu yi mɔɔ naa kaa bii. Mɔɔ nɛɛ pálɛ̀ vuu shi kpang, mɔɔ ka vɔrɔ ɓiɓɛ katɔ, ka ruu ɓɔɔ, zang a wu bannang ka dalɛ waati kpang ɓɛɛ. Ɓi zang shonang Laa, jɛ̃ɛ zang ruu ka nung ɓɔɔ Laa nɛ̀ɛ́ jɛ̃ɛ zang ɓɛɛ. Wu dàng zang ɓɔɔ ri palɛ vuu shi kpang jĩng. 5Ka ruu nɔngkɔ, ɓaa shoo ka nyaa rɛɛ zang bang. Wu ka ruu ɓɔɔ mɔɔ kaa vɔrɔ, Laa dang mɔɔ jĩng ɓɛɛ kɔ shɛ̃ɛning kpang. Ka ruu ɓɔɔ, mɔɔ zi tɔ ka yeti ɓaaɓɛ nɛɛ, mɔɔ nɛ̀ɛ́ pálɛ̀ nɔngkɔ ɓɛɛ. 6Wee doo vuu ɓɔɔ shingnɛ nɔɔ shu saka tipi ɓɛɛ kɔ. Ka ruu ɓɔɔ, zang bang ri ɓarɛ zang shonang Laa ɓɔɔ ri a yuu ɓarɛ nɛɛ ri palɛ shonang keɓe ɓɛɛ. 7Vuu ɓɔɔ ri nɛɛ dṹng nɔɔ, nɔɔ shu ri ta. Nɔɔ shù zang ɓɔɔ ta saka tipi, saka tipi. Nɔɔ a zang ɓɔɔ ri ta saka ka yuu vuu ɓɔɔ nɔɔ mãlɛ́ ɓɛɛ, saka ɓiɓɛ. Zang ɓɔɔ nɛɛ daa naa sennang katɔ, nɔɔ seng wu. Nɔɔ a zang ɓɔɔ daa naa bannang katɔ, bannang.

Nɔɔ kasɛ zɔɔ katɔ

8Zang ɓɔɔ wu dũ̀ng nɔɔ nyaa kɔ́pɔ́ vuu ɓɔɔ kpang. Zang ɓɔɔ wu dũng nɔɔ nyaa kɔ́pɔ́ ruu zang kasɛnang kɔ shɛ̃ɛning. Ka ruu ɓɔɔ, zang piti ɓɔɔ nɛɛ kasɛ ruu shɔnzang katɔ, dṹng vuu ɓɔɔ nyaa dannang Laa kɔɔ ɓɛɛ tɔ. 9Nyaa ɓɔɔ Laa dangnɛ nɛɛ, “Mɔɔ palɛ dũndũng kpang, mɔɔ nyɔ zang vɔrɔ kpang, mɔɔ ɓɔ̀ɔ shɔngɓɔ kpang, mɔɔ shing jĩng ka vuu zang kpang.” Nyaa ɓɔɔ Laa dangnɛ kɛɓɛ, nɛɛ ɓɔɔ yaa ɓɛɛ piti, ri kɔɔ ɓi doo vuu gbete kɔ nɛɛ ɓɔɔ tɔɔ, “Nɔɔ kasɛ ruu shɔnzang naa ɓɔɔ nɔɔ kasɛ yuu manɛ ɓɛɛ.” 10Zang ɓɔɔ nɛɛ kasɛ ruu shɔnzang katɔ, pàlɛ̀ wu vuu shi kpang, kpàng. Naa mɔɔ kasɛ ruu shɔnzang, mɔɔ dũng nyaa ɓɔɔ Laa dangnɛ tɔ nandon.

11Nɔɔ palɛ vuu keɓe, ka ruu ɓɔɔ nɔɔ zi diki keɓe tɔ ɓɛɛ. Laa ɓɔɔ nɔɔ hìngsí jĩng nɛɛ hingro a tɔ. Ka ruu ɓɔɔ, diki ɓɔɔ zang ta yuu ɓuru kagn, a naabm tɔ, ɓa ɓɔ̀ɔ́ diki ɓɔɔ ruu gaayu danggn shinnang ka bii Yeesɔ Kirisi kagn tɔ. 12Nwàng kaa naa ɓɔɔ nɔng gãntɛ kana, nɔng laagɛ̃ a kaa tɔ ɓɛɛ. Ruu yaa vuu shi kpang ɓɔɔ zang ri palɛ ka nɔng ɓɔɔ tɔ̀ɔ katɔ ɓɛɛ ta. Ruu palɛ vuu ɓɔɔ zang ɓɔɔ ri nwàng ka nɔng ɓɔɔ yakɛ katɔ ri palɛ ɓɛɛ. 13Rúu gaayu nwannang waasɛ̃, naa zang ɓɔɔ ri nwang ka nɔng ɓɔɔ yakɛ katɔ ɓɛɛ. Wu ka ɓɔɔ nɔɔ gaarɛ zɔɔ, nɔɔ ɓooro saa ɓɛɛ kpang, nɔɔ palɛ dũndũng kpang, nɔɔ ti pálɛ̀ shi kpang, kpang, nɔɔ hàa nyaa kpang, nɔɔ ti kaa sũnyaa kpang. 14Nɔɔ yaa Kpanti Yeesɔ Kirisi wu ta rɛ̃rɛnang manɛ. Nɔ́ɔ ràa shoo tɔ̀ɔ́ vuu ɓɔɔ bii manɛ ɓɔɔ palɛ vuu shi kpang kasɛ ɓɛɛ kpang.

Currently Selected:

Rooma 13: mzmNT

Highlight

Copy