Rooma 12

Nwannang ɓɔɔ ruu nwangnɛ, ruu palɛ Laa shonang ɓɛɛ

1Rɛɛ manzung, ka ruu tɔ̃ɔ palɛnang Laa, ɓɔɔ Laa tusu ruu dɔɔli ɓɛɛ, n gaa nɔɔ katɔ gbãng gbãng. Nɔɔ a Laa yuu manɛ, naa vuu ɓɔɔ zang dɔɔ wu ɓɛɛ. Nɔɔ nɛɛ a wu yuu manɛ tɔ naa vuu vaa ɓɔɔ zang dɔɔ wu ɓɛɛ, a nɔɔ kaa doo ningkãari ɓɛɛ. Nɔɔ shing yuu manɛ kaa gbãng gbãng nɔɔ pàlɛ́ wu shonang ɓɔɔ shing wu, wu tãa tĩnang manɛ ɓɛɛ. Wee gbalang ɓɔɔ Laa kàsɛ̀ nɛɛ nɔɔ báng wu ɓɛɛ kɔ. 2Nɔ́ɔ yi tĩng nɛɛ vuu ɓɔɔ zang koo keɓe kasɛ palɛnang ɓɛɛ kpang. Nɔɔ yaa Laa wu kɔ̃sɔ nɔɔ yeti manɛ, wu a nɔɔ rɛ̃rɛnang ɓɔɔ shɔɔ. Tɔ̀ɔ, nɔ́ɔ zi vuu ɓɔɔ Laa kasɛ ɓɛɛ kati. Vuu ɓɔɔ tɔ̃ɔ, a ti shing wu tãa tĩnang, nɛɛ vuu ɓɔɔ daa naa katɔ ɓɛɛ. 3A ka ruu tɔ̃ɔ ɓɔɔ Laa pàlɛ̀ m ɓɛɛ, n kɔɔ nɔɔ nandon. Zang ɓu wu rɛ̃rɛ nɛɛ wu ɓa zang piti katɔ kpang. Wu rɛ̃rɛ teetee kɔ jong, wu gãsɛ yuu ɓiɓɛ nɛɛ danggn ɓɔɔ wu shing ka bii Laa ɓɛɛ. 4Bii ɓi gbete, a takɛ vuu kagn kaa zɔ̃ng zɔ̃ng. Vuu ɓu palɛ shonang ɓiɓɛ náabm̀. 5Ruu doo nɔngkɔ. Ruu dɔɔli, a ruu nwang kaa naa bii gbete kɔ nwani, ka ruu ɓɔɔ, ruu ɓakɛ bii gbete nɛɛ Kirisi ɓɛɛ. Zang ɓu yi zɔɔ naa ka bii. 6Ka ruu nɔngkɔ, zang ɓu wu palɛ shonang nɛɛ vuu ɓɔɔ Laa a wu ka gbalang ɓɔɔ Laa a wu ɓɛɛ. Naa Laa a ruu naa nɛɛ ruu kɔɔ zang ruu ɓiɓɛ, ruu kɔɔyi ka doo danggn ɓɔɔ ruu shing ɓɛɛ. 7Nɛɛ tɔɔ, ruu palɛ zɔɔ shonang, ruu palɛ shonang. Zang ɓɔɔ nɛɛ tusu zang vuu, ka vuu ɓɔɔ wu tusu ɓɛɛ. 8Zang ɓɔɔ nɛɛ mã zang danggn, ka danggn ɓɔɔ wu mã zang ɓɛɛ. Zang ɓɔɔ nɛɛ tɔɔ wu basɛ vuu ɓiɓɛ nɛɛ zang ɓɔɔ, wu bàsɛ̀ nɛɛ yeti gbete. Zang ɓɔɔ wukɔ nɛɛ zang bang, wu palɛ shonang nɛɛ kaka ɓiɓɛ ning. Zang ɓɔɔ nɛɛ palɛ zang tɔ̃ɔ, wu mã nyaa tĩng katɔ kpang.

9Mɔ́ɔ kasɛ ruu zang nɛɛ sèé kpang. Vuu ɓɔɔ nɛɛ shi kpang, bɛ̃ɛ katɔ, mɔ́ɔ yiti ɓaa vuu ɓɔɔ tɔ̃ɔ gbãng gbãng ka yeti ɓaaɓɛ. 10Nɔɔ kasɛ ruu zɔɔ gbãng gbãng, ka ruu ɓɔɔ, nɔɔ kaa gbete ka gbalang Kirisi ɓɛɛ. Nɔ́ɔ zarɛ bii ka nɔng ɓɔɔ nɔɔ a zɔɔ bannang kpang. 11Nɔɔ pálɛ́ shonang nɛɛ kaka, nɔɔ si rang kpang. Nɔɔ pàlɛ́ Laa shonang nɛɛ yeti gbete. 12Gn ɓɔɔ nɔɔ shing ka vuu ɓɔɔ a ɓɛɛ, wu shing nɔɔ, nɔ́ɔ tãa tĩnang. Zang nɛɛ dang nɔɔ jĩng, nɔɔ mã danggn. Nɔɔ gaa Laa diki diki. 13Basɛ vuu naa ɓaaɓɛ nɛɛ ɓaazung ɓɔɔ ri dũng doo Laa kɔ, ɓɔɔ vuu ka naa ɓarɛ kpang ɓɛɛ. Ta zang zanti katɔ ka yeti gãa ɓaaɓɛ. 14Gàa Laa, wu palɛ zang ɓɔɔ ri dang nɔɔ jĩng tɔ̃ɔ. Gàa wu, wu palɛ ri tɔ̃ɔ, nɔɔ gàa wu, wu ku ri nyaa ka bii kpang. 15Nɔɔ tãa tĩnang nɛɛ zang ɓɔɔ ri tãa tĩnang, zang ɓɔɔ ri nɛɛ kaa nyavɔ nɔɔ ka nɛɛ ri. 16Nɔɔ gãng jĩng ka zang ɓɔɔ, naa ɓɔɔ nɔɔ gãng jĩng ka yuu manɛ ɓɛɛ. Nɔ́ɔ tuu yuu manɛ kpang. Nɔɔ ɓakɛ̀ yuu manɛ nɛɛ zang ɓɔɔ ri zang bang bang kpang. Nɔɔ rɛ̃̀rɛ̀ kpang nɛɛ nɔɔ zũng manɛ katɔ kpang.

17Zang ɓɔɔ nɛɛ pàlɛ̀ nɔɔ shi kpang, nɔɔ wàa pãng doo nɛɛ vuu shi kpang kɔ kpang. Nɔɔ gãng jĩng kagn nɔ́ɔ pálɛ́ vuu ɓɔɔ zang piti ri zirɛ nɛɛ vuu tɔ̃ɔ ɓɛɛ. 18Palɛ vuu piti ɓɔɔ mɔɔ zunung katɔ ɓɛɛ, mɔɔ nwang ka nyaa zɔɔ nɛɛ zang piti. 19Manzung, nɔɔ wàa pãng kpang, nɔɔ yàa Laa kɔ jong, wu wàa nɔɔ pãng. Laa kɔɔ ka yeti labeenang ɓiɓɛ tɔɔ, “Nkɔ waa pãng, n shing ri, ri dang jĩng jong.” 20Labeenang Laa kɔɔyi tɔɔ, “Nyɔkɔ nɛɛ nyɔ zang ɓɔɔ shing jĩng nɛɛ mɔɔ kpang, a wu ɓaa vuu shaanang kɔ jong. Sutu nɛɛ mãa wu, a wu mii wu ɓooyi. Mɔɔ nɛɛ palɛ tɔ nɔngkɔ, yusɛ̃ɛ tuu wu dɔɔli, kɔng wu naa ɓɔɔ zang tɛ̃̀ɛ wu sheleng waa ka yuu ɓɛɛ”. 21Nɔɔ yaa vuu shi kpang wu ɓa kaka manɛ kpang. Nɔɔ ɓa kaka vuu shi kpang katɔ kɔ jong nɛɛ tɔ̃ɔ palɛnang.

Currently Selected:

Rooma 12: mzmNT

Highlight

Copy