1 Koranti 2

Ruu vɔrɔ ɓɔɔ Yeesɔ vɔ ka yuu laa ɓɛɛ

1Rɛɛ manzung, ɓɔɔ n á ka nɔng manɛ tĩng shɔɔnang, n kɔ̀ɔ nɔɔ vuu ɓɔɔ Laa waasɛ katɔ ɓɔɔ wu nwangsɛ ruu ɓɛɛ. N a wu nɛɛ nyaa naa tãa, a ɓɔɔ zinang ɓɔɔ ɓa ɓɔɔ manɛ katɔ kpang. 2N kɔɔ ka yeti mɛɛ, n tɔɔ, wee n doo nɛɛ nɔɔ ɓee, n rɛ̃rɛ ruu Yeesɔ Kirisi kɔ shɛ̃ɛning. Naa ɓɔɔ zang ɓaa wu ka laa a vɔ ɓɛɛ. 3N a naa zang ɓɔɔ lakɛ naa ka bii kpang ɓɛɛ. N kaa vɔrɔ, bii zàa m kagn. 4Ka ɓɔɔ n rang nɔɔ yee Laa kaɓa, n ɓakɛ nɔɔ nɛɛ zũnang shɔnzang ɓɔɔ ri ka koo keɓe kpang. Ɓi Suru Laa nɛɛ naa vuu palɛnang Laa kɔ tusu nɔɔ nɛɛ, vuu keɓe niizang kɔ nwani. 5Ka ruu nɔngkɔ, dĩiri danggn shinnang manɛ ka bii Yeesɔ Kirisi, ɓi vuu zũnang shɔnzang kpang, ɓi naa vuu palɛnang Laa shingnɛ.

Bulu kɔɔ ruu ka yuu zũnang Laa

6Ruu zi tɔ nɔngkɔ, a ruu kɔɔrɔ zang ɓɔɔ ri zũng danggn tɔ, ruu zũnang Laa doo nɛɛ mani. A zɔ̃̌ng zũnang kaɓa ɓi kaa tɔ̀ɔ́ ɓɔɔ koo jaa knti keɓe kpang. À ɓi ti nɛɛ bìí zang ɓɔɔ ri roo kpanti ka koo keɓe, ɓɔɔ ri shàarɛ́ ɓarɛ katɔ ɓɛɛ kpang. 7Zũnang kɔ ruu rang yee ka yuu ɓiɓɛ ɓee, ɓi zũnang Laa ɓɔɔ bɛ̀ɛ́ Laa waasɛ katɔ, shɔnzang ri zi kpang ɓɛɛ. Laa pálɛ́ vuu keɓe doo ka tĩng bɛ̀ɛ́ zang mãa koo keɓe gn kpang, nɛɛ tɔ̀ɔ, ruu naa nwang nɛɛ wu ka nɔng bannang ɓiɓɛ. 8Zang ɓɔɔ kagn gbete, ka teteng zang ɓɔɔ ri roo kpanti ka koo keɓe ɓɔɔ zi zũnang keɓe kagn ɓɛɛ kpang. Naa ri nɛɛ zi katɔ, ri nɛɛ ɓáa Kpanti Yeesɔ Kirisi ɓɔɔ wukɔ ɓa zang bannang piti, naa ka laa kpang. 9Vuu keɓe nwàng kaa naa ɓɔɔ zang bèe ka yeti labeenang Laa ɓɛɛ nɛɛ:

“Vuu ɓɔɔ shɔnzang ri zi gngn kpang, a zang ɓɔɔ ti

tãa gngn kpang, a zang ɓɔɔ ti rɛ̃rɛ gngn

ka yuu ɓiɓɛ kpang, Laa shĩili rɛɛ vuu keɓe kɔ,

ka ruu zang ɓɔɔ ri kasɛ wu katɔ ɓɛɛ.”

10Laa nwangsɛ rukɔ vuu keɓe nɛɛ naa Suru ɓiɓɛ. Suru Laa zi yeti vuu tɔ nandon dɔ̃ɔ gbete, ti zili rɛɛ vuu ɓɔɔ Laa mang ka yeti ɓiɓɛ tɔ. 11Zang ɓɔɔ kagn ɓɔɔ ri zi vuu ɓɔɔ zang ɓɔɔgn rɛ̃rɛ ɓɛɛ kpang, ɓi suru zang kaɓa kɔ zi shɛ̃ɛning. Laa doo nɔngkɔ, zang ɓɔɔ zi rɛ̃rɛnang Laa kpang, ɓi Suru ɓiɓɛ kɔ zi gbete. 12Suru ɓɔɔ Laa shìng ruu ka yeti ɓuru, ɓi Suru ɓiɓɛ, ɓi ɓɔɔ koo keɓe kpang. Suru keɓe kɔ shing ruu, ruu zi vuu piti ɓɔɔ Laa á ruu waati ɓɛɛ.

13Ka ruu nɔngkɔ, ruu nɛɛ kɔɔ nɔɔ ruu ka yuu vuu ɓɔɔ Laa a zang keɓe, ruu kɔ̀ɔ́ nɔɔ wu nɛɛ yee ɓɔɔ shɔnzang ri tùsù ruu nɛɛ zũnang ɓarɛ ɓɛɛ kpang. Ɓi Suru Laa tùsù ruu vuu keɓe. Ruu nwangsɛ ɓuru dĩiri vuu Suru Laa, ruu kɔ̀ɔ́ zang ɓɔɔ Suru Laa kagn ka yeti ɓarɛ ɓɛɛ. 14Zang ɓɔɔ Suru Laa nɛɛ kagn yeti ɓiɓɛ kpang, ta vuu ɓɔɔ Suru Laa alɛ zang ɓi kpang. Zang kaɓa zi vuu keɓe kpang, vuu bìí nwang wu ɓi naa vuu shoko, ka ruu ɓɔɔ, ɓi Suru Laa kɔ shɛ̃ɛning shing zang, zang zi vuu kaɓa ɓɛɛ. 15A zang ɓɔɔ Suru Laa ɓi kagn yeti ɓiɓɛ zi dĩiri vuu keɓe ɓi katɔ nandon, a zang ɓɔɔ ri ka koo keɓe ri zi vuu ɓɔɔ wu palɛ ɓɛɛ ɓi kaa takpang. 16Nwang ɓi kaa naa ɓɔɔ zang bèe ka yeti labeenang Laa ɓɛɛ nɛɛ,

“Zang ɓɔɔ zi rɛ̃rɛnang Kpanti Laa kagn ya?

Zang ɓɔɔgn tusu wu vuu ɓɔɔ wu palɛ ɓɛɛ ya?”

Ɓɔɔ ɓuru Suru Laa ɓi kagn bii ɓuru, rɛ̃rɛnang ɓuru ɓi gbete nɛɛ ɓɔɔ Kirisi.

Currently Selected:

1 Koranti 2: mzmNT

Highlight

Copy