Madiu 4
4
Dama Heyolabeme Yasu ko mo bia habehedabe hondole ba hendenego ogo
(Maga 1.12-13; Lugu 4.1-13)
1Ani biyagola howa dama Heyolabeme Yasu ko mo bia habehedabe hondole Ngode Datagaliwabe Dinini ibugua Yasu dindi ko yobi wali agali nahaga wiagoria haru pu helene.#Mg 1.12-13; Lg 4.1-13; Hi 2.18; 4.15 2Ani haru pu helearia Yasu ibu horo pira maria (40) mbiraga horombebi heba tomo nane dege howa garibi lo hene.#Har 34.28; 1 Kin 19.8 3Ibu ani garibi lo hearia dama Heyolabe ibuwa lalu, Í̱ Ngode Datagaliwabe Iginiore keyagua nde ege to̱le̱ o ngaru mo mberedi bu hina, lene.#Yo 6.30-31
4Ani layagola Yasuhanda ladai bialu lalu, Anduane Homogonaga mbugani lo ngagome lalu, Wali agalime mberedi hangu nowa habe nahego Ngode Datagaliwabehanda bi bibahende ledaruoreme holene nga, lalu gilibu nga, lene.#Man 8.3
5Ani ladai biyagola dama Heyolabeme Yasu haru pialu Yarusaleme anda Ngode Datagaliwabehondo loma bia ho helenegoha puwa daligaoreni helowa 6ibuhondo lalu, Í̱ Ngode Datagaliwabe Iginiore keyagua nde ogoriani howa í̱nime pora bupe harene. Ogoninaga Anduane Homogonaga mbugani bi mbira lo ngagome lalu,#Iba 91.11-12; Yo 7.3-4
Ngode Datagaliwabehanda ibunaga dahuliyaliruhondo í̱ haru holenenaga
ege to̱le̱me í̱naga ge nanelo
tigua tinaga gini í̱ minu yaraga ho helo lamulebira,
lalu gilibu nga, lene.
7Ani layagola Yasuhanda ladai bialu lalu, Anduane Homogonaga mbugani bi mende lo ngagome lalu, Anduane Homogo í̱naga Ngode Datagaliwabe kago ba hondolene nawi, lalu gilibu nga, lene.#Man 6.16
8Ani ladai biyagola dama Heyolabeme hari timbuni weagoha Yasu haru iraga halu wali agali bibahende dindi tara tarani bu hearubi tinaga mbirale baya gibiore bu wiarubi walia hai hene. 9Walia hai halu lalu, Í̱na i̱ buha ge duli hanga ho biruwa i̱hondo bi pupu wiriyagua nde uruni bibahende de hendederu karulai habelo í̱hondo ngiai holebero, lene.#Yo 6.14-15
10Ani layagola Yasuhanda ladai bialu lalu, Heyolabe í̱ wahalu puabo ha. Anduane Homogonaga mbugani bi lo ngagome lalu, Anduane Homogo í̱naga Ngode Datagaliwabe kago í̱na ibuni hangunaga mini yaraga holenebi ibuni hangunaga biabe bulenebi nga, lalu gilibu nga, lene.#Man 6.13; 10.20; Yos 24.14
11Ani ladai biyagola dama Heyolabeme Yasu helalu pene. Piyagola dahuliyalirume Yasu biamogo bule ibu hearia ibini.#Hi 1.6; 1.14
Yasuhanda Galilini biabe pigane tenialu bialu henego ogo
(Maga 1.14-15; Lugu 4.14-15)
12Baboraya biaga Yone garabaya andaha ka layago hale howa Yasu ibu Galili pene.#Md 14.3; Mg 1.14; 6.17; Lg 3.19-20; Yo 4.43 13Puwa ibugua Nasareteni hondo nahe pu wahalu Galili iba timbuniore bereagoha Kabaniama tanoni hole pene. Dindi ogoni Sebulunu Nabadalila libunaga dindini wini.#Yo 2.12 14Ani biyagola Ngode Datagaliwabe bi mana latagi haga Aisaiahanda mbiwia henego lola hene. 15Ibugua mbiwia henego ogo,#Ais 9.1-2
Sebulunu dindibi Nabadali dindibi
hariga iba solowara bereagoha polene Iba Yodana ange edehayagi ngago
Yualinaga ndo wali agali tara taranaga dindi mini Galili nga.
16Wali agali arumaha karume wá holene timbuniore de hondolebira.#Ais 42.7; Lg 2.32
Homaganenaga dindi arumaha karu kagoriani wá ha dali holebira,
lalu gilibu nga.
17Horo uruningi Yasuhanda ibunaga bi mana tenuwa lamialu lalu, Ngode Datagaliwabenaga Handame Ho Holene kaware ngago tágua ko birimigonaga mini beregedalimu, lalu lamini.#Md 3.2; 10.7; Mg 1.14-15
Yasuhanda agali maria wena minagaru olenego ogo
(Maga 1.16-20; Lugu 5.1-11)
18Yasu ibu Galili iba timbuniore bereago angeni pialu howa ibugua wena minaga agali kirali Saimonobi ibunaga mini mende Pida ibu hamene Andurubi de hendene. Ogoni labome libu iba timbuni ogoniha howa wena nume wena minalu hene. 19Ani hondowa Yasuhanda libuhondo lalu, Libugua agali minalibulo i̱na minawai holiya i̱ porodagua talima ibidaba, lene.#Md 13.47; Lg 5.1-11 20Ani layagola libugua libunaga wena nu ngelalu ibu talima pene.#Md 19.27; Mg 10.28; Lg 18.28
21Yasu ibu pialu howa ibugua agali kirali libu hamenela dege Sebedi igini Yamese Yonela libu hearia de hendene. De hondowa Yasuhanda libu olayagola 22libugua libu aba hela iba talu ngela bialu Yasu talima pene.
Yasuhanda mana lawai ha warago bo wiaru mo dabi ha bialu henego ogo
(Lugu 6.17-19)
23Yasu ibu Galilini ibaga bialu pialu ngoai hagane andaruha bi mana lawai halu Ngode Datagaliwabehanda Handame Ho Kagonaga Bi Mana Debene lamialubi wali agali dewa warago tara tara bo wiaru mo dabi halubi hene.#Md 9.35; Mg 1.39; Lg 4.15; 4.44; Ab 10.38 24Ani bialu heago wali agali Siriani haame hearume hale hai howa tigua wali agali warago tara tara bo wiarubi tandaga halu wiarubi dama daragahe wiarubi biango bibi biaga wiarubi kuduguhe wiarubi mo yalu ibu hearia ibiyagola ibugua ti bibahende mo dabi hai hene.#Mg 6.55 25Wali agali dewaore Galilini howabi Tano Piraha howabi Yarusalemeha howabi Yudiaha howabi Iba Yodana ange abene edehayagi howabi ibai halu ibu haruru pialu hene.#Mg 3.7-8
Currently Selected:
Madiu 4: HUI
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Huli Bible © Bible Society of Papua New Guinea, 2002.