Madiu 3
3
Baboraya biaga Yonehanda bi mana lamialu henego ogo
(Maga 1.1-8; Lugu 3.1-18; Yone 1.19-28)
1Ani binidangi baboraya biaga Yonehanda Yudiani dindi ko yobi wali agali nahaga wiagoria howa ibalu mana lamialu hene.#Mg 1.4; 1.15; Lg 3.2-3; Yo 1.28 2Ibugua lamialu lalu, Ngode Datagaliwabenaga Handame Holene kaware ngagonigo tágua ko birimigonaga mini beregedalimu.#Md 4.17; Mg 1.15 3Ngode Datagaliwabe mana latagi haga Aisaiahanda ala mbiwia halu lalu,#Ais 40.3; Mg 1.3; Lg 1.76; Yo 1.23
Dindi ko yobi wali agali nahaga ngagoria howa mbiralime ga̱lalu,
Anduane Homogo ibilo hariga ba hole manda bialu halimu.
Hariga ogoni tigabiore ba halimu, lenego
lalu bi ogoni Yone mitangi bialu lenego gilibu nga.
4Yone ibu nogo kamele irinime aga wabinigo karulowa nogo dongoneme mandibu wuwa hene. Ibugua pagayabi mone taranaga ibanebi naga hene.#1 Sml 14.25-26; Seg 13.4; Mg 1.6 5Wali agali Yarusaleme howabi Yudia dindi bibahende winigo uruniha howabi Iba Yodana peagoria dindi bibahende wiagoha howabi Yone hearia ábu ngoai haga bini. 6Ibuwa tigua ko biyaru la pani hayagola Yonehanda Iba Yodanaha ti baboraya bini.
7 Perisi agalirubi Sadiusi agalirubi dewali Yonehanda ti baboraya bilo ibalu hearia de hondowa Yone ibugua tihondo lalu, Tá ko nogombi ale kamigo Ngode Datagaliwabehanda pani áyuore wia holebirago nane yo poleberami lalu tá aiwa langiyabe.#Md 12.34; 23.33; Lg 3.7; Lm 5.9; 1 Te 1.10 8Tágua ko bialu harimigo wahalu mini beregedai kamigonaga irane walia hole lowa mana bayale bialu halimu. 9Tágua, Inanaga mamali Abarahama hene, laramiligome pani nolene ngagoria nane yo pialu poleberama, lo mitangi nabilimu. I̱na bi mbira langerogo hale hadaba. Ngode Datagaliwabehanda ege to̱le̱ o ngaruni mo yuwa Abarahamanaga aguanene bu hinu helabehe kagoni laro.#Yo 8.33; Ab 13.26; Lm 2.28-29; 4.1; 4.11-12; 4.16 10Ira karu teneha dibule ayu mo yu ábu nga. Ira lini bayale nadaga karu bibahende dibai howa ira dedagoria dolebira.#Md 7.19; Lg 13.6-9; Yo 15.6 11Tágua ko birimigonaga mini beregedarimigo walia hole i̱na tá ibame baboraya biruli. Maha mbirali ibulebirago ibugua Ngode Datagaliwabe Dininimebi ira hungu ale biragomebi tá baboraya bia holebira. Ibu i̱ emene ko̱ kogobi ndo ibu daliga timbuniore kago i̱na ibunaga ge habe gamu mo ya holene nakarulape kogoni.#Ais 4.4; Mal 3.2; Yo 1.26-27; 1.33; Ab 1.5; 2.3-4; 1 Ko 12.13 12Ibugua ladi ale mini widinaga lini aeanela dambialu mo tale bilo mbirale baraga hagane nama taboli ale yu ka. Tale biai howa ibugua widi lini do hagane andaha do hole wuwa aeane biaru ira hundia nabiaga daabo kagoria delolebira, lalu Yonehanda lamini.#Mal 3.3; 4.1; Md 13.30
Yonehanda Yasu baboraya bia henego ogo
(Maga 1.9-11; Lugu 3.21-22)
13Horo uruningi Yasu ibu Galili howa Iba Yodana peagoha ibalu ibu Yonehanda baboraya bilo lowa Yone hearia ibini. 14Ibiyagola Yonehanda Yasu mini wia dai buwa baboraya nabule lelo ibuhondo lalu, Í̱na i̱ baboraya bia holene ngago áyu ani ndo i̱na í̱ baboraya bia holiya i̱ kogoria ibirida, lene.
15Ani layagola Yasuhanda ladai bialu lalu, áyu aniore bibelo. Mana ogoni bialu howa Ngode Datagaliwabehanda ani bulene nga ledago biaiore holeberaba, lene. Ani layagola Yonehanda, Anidago baboraya bia haro, lene.
16Yonehanda Yasu baboraya bia hayagola Yasu ibaha howa heyiyagola hari daliga buduwa Ngode Datagaliwabe Dinini ega malibu ale dalipe halu Yasuni ábu birayagola de hendene.#Ais 11.2; Mg 1.10; Lg 3.22; Yo 1.32-33 17Ani biyagola dahuliya andagaha howa bi mbira ladali halu lalu, I̱ Igini i̱ gubaliniore ho kogo ogoni. Ibuhondo turu timbuni ho kogoni, lene.#Pig 22.2; Iba 2.7; Ais 42.1; Md 12.18; 17.5; Mg 1.11; Lg 9.35; Yo 12.28; 2 Pi 1.17
Currently Selected:
Madiu 3: HUI
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Huli Bible © Bible Society of Papua New Guinea, 2002.