Psalmyn 34
34
PSAL. 34.
Benedicam Domino.
1Ver-yms dy-kinjagh booise da’n Chiarn:
bee e voylley dy-bragh ayns my veeall.
2Bee m’annym boggyssagh ayns y Chiarn:
nee’n sleih imlee clashtyn jeh shen, as bee ad gennal.
3O moylley-jee yn Chiarn mârym:
as lhig dooin ard-voylley ’choyrt da’n Ennym echey ry-cheïley.
4Hirr mee yn Chiarn ayns padjer, as cheayll eh mee:
as ren eh m'y livrey veih ooilley my aggle.
5Yeeagh ad seose huggey, as hooar ad soilshey:
as cha row ny eddinyn oc naaragh.
6Cur-my-ner, ta’n boght geamagh, as ta’n Chiarn clashtyn eh:
dy-jarroo, as t’eh sauail eh ass ooilley e heaghyn.
7Ta ainle y Chiarn freayll arrey mygeayrt-y-moosyn ta goaill aggle roïsh:
as dy livrey ad.
8O blasht-jee, as jeeagh-jee, cre cha graysoil ta’n Chiarn:
bannit yn dooinney ta coyrt e varrant ersyn.
9O gow-jee aggle roish y Chiarn, shiuish e nooghyn:
son adsyn ta goaill aggle roïsh cha bee nhee dy laccal orroo.
10Ta ny lionyn ayns feme, as gennaghtyn accyrys:
agh adsyn ta shirrey yn Chiarn, cha bee ad laccal nhee erbee dy vel mie.
11Tarr-jee, shiuish chloan, as eaisht-jee rhym:
ynsee-yms diu aggle y Chiarn.
12Quoi’n dooinney eh ta aignagh dy ve beayn:
as ballish laghyn mie y akin?
13Smaght dty hengey veih olk:
as dty veillyn, nagh loayr ad foalsaght erbee.
14Shaghyn dagh olk, as jean dy-mie:
shirr lurg shee, as cur eh er y hoshiaght.
15Ta sooillyn y Chiarn harrish y sleih cairal:
as ta ny cleayshyn echey foshlit gys nyn badjeryn.
16Ta eddin y Chiarn noi ocsyn ta jannoo olk:
dy chur ass ny fraueyn yn chooinaghtyn oc veih eaghtyr y thallooin.
17Ta’n sleih cairagh jannoo aghin, as ta’n Chiarn cur clashtyn daue:
as dy livrey ad ass ooilley nyn seaghyn.
18Ta’n Chiarn er-gerrey dauesyn ta jeh cree brisht:
as sauee eh nyn lheid as ta jeh spyrryd imlee.
19S’mooar ta seaghyn y fer-cairal:
agh ta’n Chiarn cur feaysley da assdoo ooilley.
20T’eh coadey ooilley e chraueyn:
myr shen cha vel unnane jeu er ny vrishey.
21Agh nee lag-haghyrt stroie ny mee-chrauee:
as adsyn ta cur dwoaie da’n sleih ynrick, hig y chraagh orroo.
22Ta’n Chiarn cur feaysley da anmeenyn e harvaantyn:
as adsyn ooilley ta cur nyn marrant ersyn, cha bee ad er nyn dreigeil.
Currently Selected:
Psalmyn 34: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
