Psalmyn 33
33
PSAL. 33.
Exultate, justi.
1Gow-jee boggey ayns y Chiarn, O shiuish sleih cairagh:
son te feer chooie da’n sleih ynrick dy ve booisal.
2Moylley-jee yn Chiarn lesh y chlaasagh:
gow-jee arraneyn-moyllee da lesh y lute, as y ghreïe-chiaull dy yheih strengyn.
3Gow-jee arrane noa gys y Chiarn:
trogg-jee seose nyn ghoraa huggeysyn ayns bingys dy-jeean as lesh cree gennal.
4Son ta goo yn Chiarn firrinagh:
as ooilley e obbraghyn ynrick.
5T’eh graihagh er cairys as briwnys:
ta’n seihll laane jeh mieys y Chiarn.
6Liorish goo yn Chiarn va ny niaughyn er nyn groo:
as ooilley ny pooaraghyn oc liorish ennal e veeal.
7T’eh chaglym ushtaghyn ny marrey cooidjagh, myr carnane:
as freayll fo yn diunid vooar myr ayns thie-tashtee.
8Lhig da’n seihll ooilley aggle ’ghoaill roish y Chiarn:
bee-jee er-creau roïshyn, ooilley shiuish cummaltee yn thallooin.
9Son loayr eh, as ve jeant:
hug eh saarey, as hass eh shickyr.
10Ta’n Chiarn coyrt bun-ry-skyn coyrle ny ashoonyn:
as cur er saaseyn croutagh y phobble dy ve gyn-ymmyd, as cur shaghrynys er coyrleyn ny prinsyn.
11Nee coyrle y Chiarn farraghtyn son dy-bragh:
as smooinaghtyn e chree veih sheeloghe gys sheeloghe.
12Bannit yn pobble ta’n Jee oc yn Chiarn Jehovah:
as bannit ta’n sleih t’eh er reih son e eiraght.
13Yeeagh y Chiarn neose veih niau, as chur eh my-ner ooilley cloan gheiney:
veih stoyl-reeoil e ynnyd-vaghee ta sooill echey er cummaltee yn theihll.
14T’eh cummey ooilley ny creeaghyn oc:
as toiggal ooilley nyn obbraghyn.
15Cha vel Ree erbee oddys v’er ny hauail liorish niart e heshaght-chaggee:
cha-moo ta dooinney lajer erbee er ny livrey liorish mooarane niart.
16Cha vel cabbyl coontit agh red fardalagh dy hauail dooinney:
cha-moo oddys eh livrey dooinney erbee liorish mooad's e niart.
17Cur-my-ner ta sooill y Chiarn orroosyn ta goaill aggle roïsh:
as orroosyn ta coyrt nyn dreishteil ayns e vyghin;
18Dy livrey yn annym oc veih baase:
as dy veaghey ad ayns earish dy ghenney.
19Ta’n annym ain dy-meen er ny ve farkiaght er y Chiarn:
she eshyn nyn gooney as nyn vendeilagh.
20Son gowee nyn gree boggey aynsyn:
er-yn-oyr dy vel shin er hreishteil ayns e Ennym casherick.
21Lhig da dty chenjallys vyghinagh, O Hiarn, ve orrin:
’naght myr ta shin cur nyn dreishteil ayn-yd.
Currently Selected:
Psalmyn 33: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
