Psalmyn 148
148
PSAL. 148.
Laudate Dominum.
1O moylley-jee Chiarn niau:
moylley-jee eh ayns yn yrjid.
2Moylley-jee eh, ooilley shiuish e ainleyn:
moylley-jee eh shiuish e heshaghtyn-caggee.
3Moylley-jee eh, ghrian as eayst:
moylley-jee eh, ooilley shiuish rollaagyn as soilshey.
4Moylley-jee eh, ooilley shiuish niaughyn:
as shiuish ushtaghyn ta er-skyn yn aer.
5Lhig daue Ennym y Chiarn y voylley:
son loayr eh yn fockle, as v’ad jeant; doardee eh, as v’ad er nyn groo.
6T’eh er n’yannoo ad shickyr son dy-bragh as dy-bragh:
t’eh er choyrt daue leigh nagh bee er ny vrishey.
7Moylley-jee yn Chiarn er y thalloo:
shiuish whaleyn, as ooilley ny ynnydyn dowin.
8Aile as sniaghtey garroo, sniaghtey meen as keay:
geay as sterrym, cooilleeney e ghoo;
9Sleïtyn as dy-chooilley chronk:
biljyn messoil, as dy-chooilley villey cedar;
10Beïyn as maase jeh dy-chooilley cheint:
cretooryn snaauee as eeanlee skainagh;
11Reeaghyn y thallooin, as dy-chooilley phobble:
prinsyn as ooilley briwnyn y theihll;
12Deiney aegey as moidynyn, shenn gheiney as paitchyn, moylley-jee Ennym y Chiarn:
son ta’n Ennym echeysyn ny-lomarcan ooasle, as e ghloyr er-skyn niau as thalloo.
13Troggee eshyn seose dy ard niart e phobble; nee ooilley e nooghyn eshyn y voylley:
dy-feer cloan Israel, dy-jarroo yn pobble ta dy hirveish eh.
Currently Selected:
Psalmyn 148: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society