Psalmyn 147
147
EVENING PRAYER.
PSAL. 147.
Laudate Dominum.
1O moylley-jee yn Chiarn; son s’mie te dy ghoaill arraneyn-moyllee gys y Jee ain:
dy-jarroo, s’eunyssagh as gerjoilagh te dy ve booisal.
2Ta’n Chiarn troggal seose Jerusalem:
as chaglym cooidjagh kynneeyn skeaylt Israel.
3T’eh dy lheihys adsyn ta brisht ayns cree:
as coyrt medshin dy laanaghey ny doghanyn oc.
4T’eh coontey earroo ny rollaagyn:
as ta ennym echey er dagh unnane oc.
5S’mooar ta’n Chiarn ainyn, as s’mooar ta e phooar:
dy-jarroo, ta e chreenaght er-skyn earroo.
6Ta’n Chiarn soiaghey seose yn vooinjer imlee:
as coyrt sheese ny mee-chrauee kiart rish y thalloo.
7O gow-jee arraneyn-moyllee gys y Chiarn lesh toyrt-booise:
gow-jee arraneyn-moyllee er y chlaasagh gys y Jee ain;
8Ta coodaghey yn aer lesh bodjallyn, as jannoo aarloo yn fliaghey son y thalloo:
ta coyrt er y faiyr dy aase er ny sleïtyn, as lossyreeyn son ymmyd deiney;
9Ta coyrt foddyr da’n maase:
as beaghey ny fee aegey ta geamagh huggey.
10Cha vel eshyn soiaghey jeh troshid cabbyl:
cha-moo ta geill echey da cassyn y choshee bieau;
11Agh ta taitnys ec y Chiarn ayndoosyn ta goaill aggle roïsh:
as ta coyrt nyn dreishteil ayns e vyghin.
12Cur moylley da’n Chiarn, O Yerusalem:
cur moylley da dty Yee, O Sion;
13Son t’eh er n’yannoo shickyr boltyn dty yiattyn:
as er vannaghey dty chloan er cheu-sthie jeed.
14T’eh jannoo shee ayns dty ardjyn:
as dy dty yannoo magh lesh floor curnaght.
15T’eh coyrt magh e haarey er y thalloo:
as ta e ghoo roih feer leah.
16T’eh tilgey sniaghtey myr ollan:
as skeayley yn lieh-rio myr leoaie.
17T’eh ceau magh e rio ayns sheebaneyn:
quoi ta abyl dy hurranse y feayraght echey?
18T’eh coyrt magh e ghoo, as dy hennue ad:
t’eh sheidey lesh e gheay, as ta ny hushtaghyn roih.
19Hoilshee eh e ghoo da Jacob:
e ’lattyssyn as e oardaghyn da Israel.
20Cha vel eh er ghellal myr shoh rish ashoon erbee elley:
cha-moo t’ec ny ashoonee tushtey jeh e leighyn.
Currently Selected:
Psalmyn 147: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society