Luki 4

Sentanɛ la malatantaŋɛ

1Isa bɔɔta Yurudɛn kɔɛɛ dala, Ala Hakkili saniyandeŋɛ be jigiren Isa ma. Ala Hakkili saniyandeŋɛ be Isa kun sɔren janfue butɔ la. 2A ka tele bi naani ma janfue butɔ ɲɔ, wo bɛ Sentanɛ be katala a ni a latantan. Wo toe bɛ butɔ, a ma fenfen dɔmɔ. Wo tele bi naani la kamalireŋɛ kɔnkɛ ka a bita. 3Wo kɔma, Sentanɛ nata a ka a fɔ a ye: «Ka Ala la den kayireŋɛ yati le mu i la, kɛ kure yamɔri, a ni ma dɔmɛ la.» 4Isa ka a jaabi, a ko: «A be sɛbɛren Ala la kitabue tɔ:

Mɔgɛ te balu dɔmɛ pɛti la.»#4:4 Taureta Musa, kitabu looluɲɔgɛ, sora 8 haaya 3 fɛlɛ.

5Wo kɔma, Sentanɛ ka a doni kan toireŋɛ tɔ, a ka dunuya jamanɛ bɛ yita a la kisanna. 6A ka a fɔ a ye: «N si kɛ jamanɛnu nun a mansaya nun a harige bɛ dii i ma. A bɛ be donden nde le bolo, ka n dita a diila min yo ma, n be a diila wolo ma. 7Wo butɔ, ka i sujuduta n ɲɛ, i ka n batu, a bɛ si ma i tɛŋɛ la.» 8Isa ka a jaabi, a ko: «A be sɛbɛren de kitabue tɔ:

I ni sujudu i Marige Alatala le ye,

i ni ale dɔrɔn de batu.»#4:8 Taureta Musa, kitabu looluɲɔgɛ, sora 6 haaya 13.

9Wo kɔma, Sentanɛ ka a doni Darisalamu, a ka a lasɔ Ala batu bon banba kun tɛma, a ka a fɔ a ye: «Ka Ala la den kayireŋɛ le mu i la, tun yan i ni sɔrɔn duge tɔ. 10Kaa Ala la kitabue bele a fɔren de:

‹A si a la malekanu yamɔri le i la ko la,

alako anu ni i kanta.›

11Anun:

‹Anu si i tanbɛ le anu bole tɔ,

alako i kana i kɛn natugu kure la.›»#4:11 Jaburu, sora 91 haaya 11 han 12.

12Isa ka a jaabi, a ko: «Kitabue ko: I kana i Marige Alatala laɲini.#4:12 Taureta Musa, kitabu looluɲɔgɛ, sora 6, haaya 16 fɛlɛ.»

13Sentanɛ to bata ban korila Isa latantan fɛrɛ ma, a bɔɔta a kɛnna han tɛmu do.

Isa la wali fɔlɛ Galile duge tɔ

14Isa saagita Galile duge tɔ, Ala Hakkili saniyandeŋɛ barikɛ la. A la ko tuguta wo duge fɛfɛ bɛ la. 15A tota mɔgɛnu karanna Yahudenu la kawandi ma boŋɛnu tɔ. Bɛ tota a matɔgɔla.

16Wo butɔ, Isa tagata ke Nasarɛti saa tɔ, a koloyata ka min na. Sulen lɔ́gɛ́, a donta kawandi ma boŋɛ tɔ, iko a darita a mala ki min na. A wulita kitabu karan koe la. 17Anu ka annabi Esayi la kitabue don a bolo. A ka wo kitabue laka, a ka kandula do yen a be sɛbɛren ka min na, a ko:

18 Marige Alatala Hakkili saniyandeŋɛ be n fɛ,

bayi a ka n masubɛ

kibaru ɲinma lake koe la tɔɔrɔbaganu ma.

A bata n sɔ kiilaya la,

n ni a fɔ bolo tɔ mɔgɛnu ye anu si kunka.

N ni a fɔ ɲabɔnɛnu ye anu ɲa si laka.

Nɔɛ be saren minnu ma n ni a fɔ wonu ye anu si hɔrɔya.

19 Wo butɔ, n ni kibaru ɲinma lake anu ma, ka a fɔla Marige Alatala la Hɔrɔya Saŋɛ bata ke. # 4:19 Annabi Esayi la kitabue, sora 61, haaya 1 nun 2 fɛlɛ.

20Isa ka kitabue tagun, a ka a don a mandila bolo, a sigita ɲɔ. Minnu be kawande ma boŋɛ butɔ, wonu bɛ be anu ɲa banbanden a ma. 21A fɔlɔta kumala anu ye, a ko: «Wo be bɔɔren Ala la kɛ kitabu kuma min mɔɛren, wo bata ma tɔɲa la bi.»

22Awa, mɔgɛ bɛ tota a tɔgɔ ɲinma fɔla, anu kaabɛta a la kuma diyama ma, min be bɔɔla a da tɔ. Anu tota a fɔla: «Bɔ, Yusufu la den kayireŋɛ ma kɛ la ba?» 23Isa ka a fɔ anu ye, a ko: «Sikkɛ bele a tɔ, wo si kɛ sanda sa le n ɲɛ: ‹Booribɔla, i ni i yɛtɛ lakendeya betunna.› Wo mɛn si a fɔ n ɲɛ tugun, aa n ka koenu min bɛ ma Kapɛrinamu saa tɔ, wo bata wonu mɔɛ, fɔ n ni wonu ɲɔgɔn tugun ma n bata saa tɔ yan.»

24A mɛn ka a fɔ anu ye, a ko: «Tɔɲa le mu, n ni a fɔ wo ye, nabiyonmɛ yo te biliya sɔtɔ a sɔtɔ saa tɔ. 25N be tɔɲa le fɔla wo ye: annabi Eliya tɛmuɛ, san saba kari wɔɔrɔ kamalita le sange ma na Isirayila jamanɛ tɔ. Wolo ka a ma, kɔnkɔ banba donta jamanɛ bɛ la. Wo ka a taran, furuɲa muse siyama be Isirayila jamanɛ tɔ. 26Kɔnɔ Ala ma annabi Eliya lasanba wo furuɲa musu hali dɔndɔ ma, fɔ furuɲa musu do min be jamanɛ do tɔ ka min tɔgɔ Sidɔn, Sarapita saa tɔ. 27Baliwulentɔɛ siyama tugun be bani Isirayila mɔgɛnu tɛma, annabi Eliyasa tɛmuɛ, kɔnɔ hali dɔndɔ ma saniyan wonu tɛma, fɔ Naaman pɛti min bɔɔta Siri jamanɛ tɔ.»

28Min bɛ be sigiren kawandi ma boŋɛ tɔ, bɔɔla anu ka wo kumanu mɔɛ, anu mɔnɛta. 29Anu wulita, anu ka Isa latuntun, anu ka a labɔɔ saa kɔma, anu ka a doni kɔnkɛ kun tɛma, anu la saa be sɔren kɔnkɛ min kunma, alako anu ni a latuntun a ni boe kɔnkɛ kɔtɔ. 30Kɔnɔ a bɔɔta anu tɛma, a tagata.

Jinna koroŋɛ bee koe

31Awa, Isa jigita Kapɛrinamu, saa min be Galile duge tɔ. A tota mɔgɛnu kawandila sulen lɔ́gɛ́ tɔ. 32Anu kaabɛta a la karaŋɛ ma, bayi a be kumala yamɔre le la. 33Lun do, kaye do be kawandi ma boŋɛ tɔ, jinna koroŋɛ be a kɔma. A belebeleta sɛnbɛ la, a ko: 34«He! Isa Nasarɛti kaa, i be naren fenna? I be naren mɔ halagidula le ba? N ka a lɔn, i mu min na. Ala la mɔgɔ masubɛreŋɛ le mu i la.» 35Isa ka jinna yamɔri sɛnbɛ la, a ko: «I mɔdɛ, i ni bɔɔ a kɔma.» Jinna ka kaye laboe jama bɛ tɛma, a bɔɔta a kɔma, a ma fenfen koron ma a la. 36Anu bɛ kilanta, anu tota a fɔla ɲɔgɔn ye, anu ko: «Kuma mɔle miniman de mu kɛ la? A to be jinna koroŋɛnu yamɔrila nɔɛ nun sɛnbɛ la, anu be bɔɔla.»

37Isa la ko kibare fɔta wo dula la miliŋɛ bɛ tɔ.

Mɔgɔ siyama lakendeya koe

38Isa bɔɔta kawandi ma boŋɛ tɔ, a tagata don Simɔn do bata boŋɛ tɔ, a taranta bandi bɛlɛŋɛ be gbaaren Simɔn bitan muse la, a bale be bandiren han. Anu ka Isa madiya a ni a dɛman. 39A ka a kunsin muse kunma, a ka bandiya yamɔri, bandiya ka a boloka. Muse wulita kisanna, a be walila anu ye.

40Tele la dulareŋɛ, bandibaga mɔɔle yo be min bolo, anu ka anu nati Isa dula. A ka a bole sa anu bɛ kuŋɛ tɔ dɔndɔ dɔndɔ, a ka anu bɛ lakendeya. 41Jinna koroŋɛnu tugun bɔɔta mɔgɔ siyama kɔma. Anu bɔɔ tɛmuɛ, anu be belebelela, anu ko: «I mu Ala la den kayireŋɛ le la.» Kɔnɔ Isa ka anu yamɔri anu ni anu mɔdɛ. Hali anu to ka a lɔn, a mu Ala la mɔgɔ masubɛreŋɛ le la, a ma sɔn anu ni kuma.

Isa la taga koe kawandi madula

42Ɲɔ la kɛnɛreŋɛ, Isa bɔɔta a tagata janfue butɔ. Jama tota a ɲinila han anu tagata ke a ma. Anu kitita a la, alako a kana bɔɔ anu kɛnna. 43Kɔnɔ a ka a fɔ anu ye, a ko: «A fɛrɛ bele fɔ n ni Ala la mansabaya kibaru ɲinma lake saa donu tugun tɔ. Ala be n nasanbaren wolo la.» 44Awa, a tota Ala la kibaru ɲinma lakela kawandi ma boŋɛnu tɔ Juda duge dula bɛ tɔ.

Currently Selected:

Luki 4: MOG

Highlight

Copy