Ko fɔlɔfɔlɛ 35

Yaguba la Betɛli biyase

1Wo tɛmuɛ le, Ala ka a fɔ Yaguba ye, a ko: «Wuli, i ni taga Betɛli, i ni to ɲɔ. I ni sarika bintandula ɲiɲa nde Ala ye ɲɔ, n ka n yɛtɛ labɔɔ i ma ka min na, i be borila i kɔtɔ Esayu la tɛmuɛ min tɔ.» 2Yaguba ka a fɔ a la denbayanu ye anun minnu bɛ be a bolo, a ko: «Wo bɔɔ kuye koe kɔma minnu be wo bolo. Wonu mu luntaŋɛ le la wole ye! Wo ni wo yɛtɛ saniyan, wo ni wo la donfeŋɛnu tugun mafalin. 3Wo tabɛn wo mɔ ni ma Betɛli. N ni taga sarika bintandula ɲiɲa Ala ye ɲɔ. N be kɔntɔfile tɔ tɛmuɛ min tɔ, Ala ka n kulɛ mɔɛ. N tagamanta dula min bɛ tɔ, Ala tota n fɛ.» 4Kuyenu minnu bɛ be anu bolo, anu ka a bɛ don Yaguba bolo, anun anu la tololadeŋɛnu. Yaguba ka anu bɛ biri lɔgɔ banba kɔtɔ, min be Sisɛmu saa kɛnna. 5Wo kɔma anu tagata. Ala ka a la kilaŋɛ to saa fɛfɛ mɔgɛnu juse tɔ, mɔgɔ yo ma suusɛ Yaguba la denbayanu jokkila.

6Yaguba nun a la mɔgɛnu bɛ tagata Lusi, ɲɔ mu Betɛli le la, Kanana duge tɔ. 7A ka sarika bintandula ɲiɲa ɲɔ, a ka wo dula tɔgɔ sa «Ala min ka a fan nabɔɔ Betɛli», bayi Ala ka a fan nabɔɔ a ma ɲɔ le, a be borila a kɔtɔ la tɛmuɛ min tɔ. 8Debora min ka Rebeka kolo, a fagata, anu ka a baadɛ lɔgɔ banba kɔtɔ, Betɛli mafanna. Yaguba ka wo lɔgɔ banba tɔgɔ sa «Diri dula».

9Ala mɛn ka a yɛtɛ labɔɔ Yaguba ma a la nareŋɛ kabɔɔ Padan-Arami, a ka barikɛ sa a la ko tɔ, 10a ko:

«I tɔgɛ be fɔla le nun Yaguba.

Kɔnɔ wo Yaguba tɔgɛ te fɔ i kunma bitugun.

I tɔgɛ si naa fɔ Isirayila.»

Wo kɔma Ala ka Isirayila tɔgɛ fɔ a kunma.

11Ala mɛn ka a fɔ a ye, a ko:

«Nde le mu Ala sɛnbɛ tige la.

I ni jiidi, i ni siya,

alako i ni ma jama banba tige la,

i mɛn si ma le see siyama benba la.

Mansanu si naa bɔɔ le i bɔnsɛ tɔ.

12N ka duge min dii Iburahima nun Isiyaka ma,

n si a dii le i ma.

Ile tanbi kɔma n si naa a dii i bɔnsɛ tugun ma.»

13Ala bɔɔta a kunma a kumata a ye ka min na. 14Yaguba ka kure sigi ɲɔ, Ala kumata a ye ka min na. A ka tule nun beere bɔn a ma sarika la, alako a ni ma kuru manditɛreŋɛ la. 15Awa, a ka wo dula tɔgɔ fɔ Betɛli, Ala kumata a ye ka min na.

Bunyamin na sɔtɛ nun Rakeli la faga

16Yaguba nun a la denbaya bɔɔta Betɛli, tagala Efarata. Anu ma yanfa ɲɔ la, Rakeli den sɔtɔ bue wulita a la. Yannun a ni deŋɛ sɔtɔ, a la den sɔtɔ koe bɛlɛyata a ma. 17Rakeli be wo deŋɛ sɔtɔla tɛmuɛ min tɔ bɛlɛya butɔ, den nabitala muse ka a fɔ a ye, a ko: «Hali i ma kilan, kɛ biyase i mɛn be kaye le sɔtɔla.» 18Rakeli bata a lɔn a be fagala le, a be a nɛ makɛlɛla tɛmuɛ min tɔ, a ka a la deŋɛ tɔgɔ sa Bɛn Oni, wo be a fɔren de «Ɲagankata deŋɛ». Kɔnɔ a baaba kan ka a kele Bunyamin «Bolo ɲinma deŋɛ». 19Rakeli fagata ɲɔgɔnna le, anu ka a baadɛ Efarata kila dala, ka min tɔgɛ be fɔla kɔtɛ Betilɛmu. 20Yaguba ka manditɛ kure sigi a gabure kunma. Han kɔtɛ ɲɔ tɔgɔ be fɔla Rakeli la gaburu kure.

21Yaguba bɔɔta ɲɔ, a tagata a la tanta sɔ Migidala Edɛri kɔma. 22A to sabatita ɲɔ duge tɔ, Rubɛn tagata ki a baaba la jon muse Bila fɛ. Kɔnɔ Yaguba ka wo koe mɔɛ.

Yaguba la den kayireŋɛnu

Yaguba ka den kayiren mɔgɔ tan nun fila le sɔtɔ. 23Yaguba la musu Leya ka Rubɛn sɔtɔ a ye, a la den fɔlɛ le wo la, a bɔɔta ɲɔ a ka Simeyɔn sɔtɔ, a ka Lewi sɔtɔ, a ka Juda sɔtɔ, a ka Isakari nun Sabulɔn sɔtɔ. 24A la musu Rakeli ka Yusufu nun Bunyamin sɔtɔ a ye. 25Rakeli la jon muse Bila ka Dan anun Nafutali sɔtɔ a ye. 26Leya tugun na jon muse Silipa ka Gadi nun Aseri sɔtɔ a ye. Awa, Yaguba ka kɛ den kayireŋɛnu le sɔtɔ Padan-Arami.

Isiyaka la faga

27Yaguba saagita a baaba Isiyaka bata Mamire, Kiriyati Araba mafanna. Ɲɔ be tɔgɔ fɔla le kɔtɛ Heburɔn. Iburahima nun Isiyaka ka wagate do ma ɲɔ le. 28Isiyaka la simaya bata taga han a bata ke san kɛmɛ san bisagin. 29Yannun a nɛ ni bɔɔ, a ka simaya yanfama sɔtɔ le anun kunnawule, a ka a benbanu jokki minnu fɔlɛ fagata nun. A la den mɔgɔ fila, Esayu nun Yaguba ka a mandi.

Currently Selected:

Ko fɔlɔfɔlɛ 35: MOG

Highlight

Copy