Ko fɔlɔfɔlɛ 34

Dina la maluya

1Lun do, Yaguba la den musereŋɛ Dina, Leya ka min sɔtɔ a ye, a bɔɔta a tagata Kanana den musereŋɛnu kɔntɔn. 2Hiwi kaanu la dugu mansa Hamori la den kayireŋɛ Sisɛmu to ka Dina yen, a ka a doni, a sata a fɛ, a ka a lamalu. 3Sisɛmu kitita Yaguba la den museren Dina la, a la ko diyata a nɛ ye. A kumata a ye diyaɲɔgɔya butɔ. 4Wo kɔma, Sisɛmu ka a fɔ a baaba Hamori ye: «Kɛ den musereŋɛ futu n ɲɛ, a ni ma n na muse la.» 5Wo tɛmuɛ, Yaguba bata a mɔɛ, Sisɛmu bata a la den musereŋɛ Dina manɔgɔ. Wo ka a taran a la deŋɛnu be kolofeŋɛnu fɛ ɲagama butɔ. A ma fenfen fɔ han wonu nata.

6Awa, Sisɛmu baaba Hamori tagata Yaguba bata, a ni taga kuma a ye. 7A ka a taran Yaguba la deŋɛnu bata na bɔɔla ɲagama butɔ, anu ka wo koe mɔɛ, min be tanbiren, anu ka anu la yonmaya yen, anu juse yɛlɛta koola, Sisɛmu la sa koe Yaguba la den musereŋɛ fɛ. A ma bɛn min ni ma Isirayila duge tɔ, bayi anu tana le wo la. 8Hamori ka a fɔ anu ye, a ko: «Wo la den musereŋɛ la ko be diyaren de n na den Sisɛmu ye a mɔɔle bɛ la. Yandi wo a dii a ma a ni ma a la muse la. 9Wo mɔ ni futuɲɔgɔya lakoti ɲɔgɔn tɛma, wo ni wo la den musereŋɛnu dii mɔ ma, mɔ ni anu sigi. Wole tugun ni mɔ tɛŋɛnu jigan muse la. 10Wo si sabati mɔ kɛnna, duge si lakɛnɛ wo ye. Wo si nɔ tola yan, wo ni wo la koenu bɛ latagaman, wo ni duge sɔtɔ.»

11Sisɛmu ka a fɔ Dina baaba nun a kɔtɔnu ye, a ko: «Wo diɲa n ɲɛ, wo ni hanige ɲinmaya ma n ɲɛ. Wo be diren fenfen ye, wo ni a fɔ n ɲɛ n ni a dii wo ma. 12Wo si nɔ ko belebele maɲininkala n ma, min si nɔ mala koto sigifeŋɛ la, sa fondo daulareŋɛnu tugun kunma. Wo ka fenfen maɲininka n ma n si a bɛ dii wo ma, alako wo ni kɛ den musereŋɛ dii n ma n ni a sigi.» 13Yaguba la deŋɛnu ka kuma buma fɔ Sisɛmu nun a baaba Hamori ye, bayi Sisɛmu bata anu baren muse Dina manɔgɔ. 14Anu ka a fɔ anu ye, anu ko: «Mɔ te nɔ mɔ baren muse diila mɔgɔ ma, min bele sunnaren, a si ma le mɔ ye maluya la. 15Mɔ te nɔ mɔ kulɛ donna wo bolo, fɔ wo mɔ ni bɛn ko dɔndɔ ma. Kaye min bɛ be wo bata, a bɛ ni sunna iko mɔle. 16Wo tɛmuɛ mɔ si nɔ mɔ la den musereŋɛnu diila wo ma, wo ni anu sigi. Mɔle tugun ni wo tɛŋɛnu sigi. Mɔ si sabati wo kɛnna, wo mɔ bɛ si ma jama dɔndɔ la. 17Kɔnɔ ka wo ma sɔn wo sunnala, mɔ si mɔ baren muse labita le, mɔ ni naa bɔɔ yan.» 18Hamori nun a la den Sisɛmu sɔnta anu la wo kuma la. 19Wo kamareŋɛ ma mɛ wo koe ma koe la, bayi Yaguba la den musereŋɛ la ko bata diya a ye. Biliya fisa sala ale ma, a baaba la denbayanu tɛma.

20Hamori nun a la den Sisɛmu tagata anu la mamadɛndula tɔ, saa dondula. Anu kumata anu la jama ye, anu ko: 21«Mɔ la ko be kɛ mɔgɛnu ye, anu ka to kɛ duge tɔ, anu ni anu la koenu latagaman, bayi mɔ la duge sɔngɔ fila bɛ yajɛta mɔ nun anu ye. Mɔ si nɔ anu la den musereŋɛnu sigila le, mɔle tugun ni mɔ tɛŋɛnu dii anu ma, anu ni anu sigi. 22Kɔnɔ kɛ mɔgɛnu te sabati yan mɔ ni ma jama dɔndɔ la fɔ mɔ ni ko dɔndɔ le ma. Kaye min bɛ be mɔ bata yan, a bɛ ni sunna iko ande. 23Ka mɔ bata sɔn anu la kuma la, wo tɛmuɛ anu si sabati mɔ bata. Anu la kolofeŋɛnu nun anu bolofeŋɛ bɛ si ma le mɔ tɛŋɛ la.» 24Min bɛ bɔɔta tagala mamadɛŋɛ tɔ saa dondula, anu bɛ sɔnta Hamori nun a la den Sisɛmu la kuma la wo lun. Saa kaye bɛ sunnata.

25Awa, anu la sunna tele saba luŋɛ, anu be tɔɔrɛ tɔ. Yaguba la den kayiren fila, Simeyɔn nun Lewi, Dina kɔtɔnu, a bɛ ka a tɛn fanda fila jigan, anu donta saa butɔ mɔgɔ yo ma sogi anu la ko ma, anu ka kaye bɛ faga. 26Anu ka Hamori nun a la den Sisɛmu tugun faga faŋɛ la, anu ka Dina jigan Sisɛmu la boŋɛ tɔ, anu bɔɔta. 27Wo kɔma, Yaguba la den kayireŋɛnu ka feŋɛnu bɛ jigan furenu kunma, anu ka saa feŋɛnu bɛ jigan, bayi anu bata anu baren muse manɔgɔ. 28Anu ka anu la saakanu jigan, anun baanu, anun ningenu, anun sofalenu anun feŋɛnu min bɛ be saa butɔ anun ɲagama butɔ. 29Feŋɛ min bɛ be ɲɔ, sa musenu anun dendeŋɛnu kunma anu ka a bɛ doni, anu ka boŋɛ butɔ feŋɛnu bɛ jigan.

30Wo kɔma, Yaguba ka a fɔ a la den mɔgɔ fila Simeyɔn nun Lewi ye, a ko: «Wo bata n sɔ kɔntɔfile ma. Wo bata n nasɛɛya kɛ jamanɛ mɔgɛnu ye, min be tabɛnden Kanana kaanu anun Feresi kaanu ma. Mɔgɔ siyama bele n bolo. Anu si naa bɛn de n kunma anu ni n kɛlɛ, n na denbaya bɛ ni halagi.» 31Simeyɔn nun Lewi ka a jaabi, anu ko: «A ma bɛn kɛ mɔgɛ ni mɔ baren muse ma langbe la.»

Currently Selected:

Ko fɔlɔfɔlɛ 34: MOG

Highlight

Copy