Ko fɔlɔfɔlɛ 29
29
Yaguba nun Rakeli
1Yaguba mɛn ka kila tabita tagala jamanɛ do tɔ tele yɛlɛ mafanna. 2A be tagala, a ka kɔlɔŋɛ do yen ɲagama butɔ. Kolofeŋɛ kurun saba be madɛnden kɔlɔŋɛ dala. Anu be kɛnɛ je diila anu ma wo kɔlɔŋɛ le tɔ. Kure min be saren wo kɔlɔŋɛ da la, wo kolo koola. 3Ka kolofeŋɛnu madɛnta ɲɔ, kolofen kantala si kure latallɛ le, min be kɔlɔŋɛ da tagunden. Kolofeŋɛnu tini ji miŋɛ ban, anu mɛn si kure talasaagi kɔlɔŋɛ da la. 4Yaguba ka kolofen kantalanu maɲininka, a ko: «N bareŋɛnu, wo be bɔɔren mina le?» Anu ko: «Mɔ be bɔɔren Haran de.» 5Yaguba ko: «Wo ka Nakɔri mamareŋɛ Laban lɔn ba?» Anu ko: «Mɔ ka a lɔn.» 6Yaguba ko: «Tana bele a ma?» Anu ko: «Tana yo bele a ma. I ma a yen? A la den musereŋɛ Rakeli nun a la kolofeŋɛnu be nala le ka.» 7Yaguba ko: «Wo ka a lɔn tele bande le mu ka, kolofeŋɛnu madɛn wagate ma ke betunna. Wo te je dii kolofeŋɛnu ma ba, wo ni anu doni anu daɲinidula?» 8Kolofen kantalanu ka a jaabi, anu ko: «Mɔ te nɔ wo mala, fɔ kolofeŋɛnu kuruŋɛ bɛ tini madɛn. Ka wo bata ma, mɔ si kure latallɛ mɔ ni a bɔɔ kɔlɔŋɛ da la, jɔnɔn mɔ ni je dii kolofeŋɛnu ma.»
9Yaguba nun kolofen kantalanu be kumala tɛmuɛ min tɔ, Rakeli nata a baaba la kolofeŋɛnu fɛ. Ale tugun mu kolofen kantalá le la. 10Yaguba ka a kau Laban na den musereŋɛ Rakeli yen tɛmuɛ min tɔ, anun Laban na kolofeŋɛnu, a tagata kure latallɛ a ka a bɔɔ kɔlɔŋɛ da la, a ka je dii a kau la kolofeŋɛnu ma. 11Yaguba milinta Rakeli ma, a dita koola. 12A ka a fɔ Rakeli ye, a ko: «I baaba bareŋɛ do le mu n na, a baren muse Rebeka la deŋɛ.» Rakeli borita, a tagata wo fɔ a baaba ye. 13Bɔɔla Laban ka a barenmuse la den Yaguba la ko mɔɛ, a borita a tagata a labɛn. A la kereŋɛ a ma, a ka a bolenu milimili a kaŋɛ la a ka a sunbu, a ka a doni a bata. Yaguba ka koe bɛ dantɛgɛ Laban ye. 14Laban ka a jaabi, a ko: «A be ɲɔgɔnna le, mɔ bɛ mu baren dɔndɔ le la.» Yaguba ka kari dɔndɔ ma Laban bata.
Leya nun Rakeli
15Lun do, Laban ka a fɔ Yaguba ye, a ko: «N bareŋɛ le mu i la, kɔnɔ i te nɔ walila n ɲɛ ɲɔgɔnna a ni to n ma i sɔŋɛ dii. I sɔŋɛ si bɛn min ma, i ni wo fɔ n ɲɛ.» 16Kɔnɔ wo ka a taran, den museren fila le be Laban bolo: a la den museren fɔlɛ tɔgɔ Leya, a filaɲɔgɛ tɔgɔ Rakeli. 17Leya ɲanu bɛnta, kɔnɔ Rakeli kan kɛɲa bɛnta koola. 18Rakeli le la ko di Yaguba ye. A ka a fɔ Laban ye, a ko: «N be san wɔrɔwila wale le mala Rakeli la ko la, i la den museren filaɲɔgɛ.» 19Laban ka a fɔ, a ko: «Rakeli dii koe ile ma, wolo di n ɲɛ yannun n ni a dii kayi do ma. To n bata yan.» 20Yaguba ka wo san wɔrɔwila wale ma Rakeli la ko la. Kɔnɔ wo san wɔrɔwila tota a ye iko lɔgɔkun dɔndɔ, bayi Rakeli la ko bata diya a nɛ ye.
21Wo kɔma, Yaguba ka a fɔ Laban ye, a ko: «Mɔ ka wagate min fɔ, a bata ke, n na muse don n bolo n ni a sigi.» 22Laban ka ɲɔ mɔgɛnu bɛ kele anu ni na anu daɲini, anu ni ɲagalin murade ma. 23A ka a la den museren fɔlɛ Leya le jigan a ka a doni Yaguba ye sue tɔ, a ka a ma a la muse la. 24Kɔnɔ, wo ka a taran, Laban ka a la jon den musereŋɛ Silipa dii a la den Leya ma, a ni ma a la joŋɛ la. 25Ɲɔ to kɛnɛta Yaguba ka a yen Leya le mu, a ka a fɔ Laban ye, a ko: «I be fen de maren n na ka? Kaa n ma wali i ye Rakeli le la ko la? I ka n janfa fenna?» 26Laban ka a fɔ, a ko: «Mɔle bata yan, mɔgɔ te den museren filaɲɔgɛ fɔlɔ dii kinama fɔlɔ ma sigi: mɔ la naamuŋɛ le mu wo la. 27Kɛ murade lɔgɔkuŋɛ ma betunna han a ni kamali wo nun Leya. Ka i mɛn ka san wɔrɔwila wale ma n ɲɛ mɔ si mɔ la den museren filaɲɔgɛ tugun dii i ma, a ni ma i la muse la.»
28Yaguba sɔnta wo la, a ka wo murade lɔgɔkuŋɛ ma anun Leya. Wo kɔma Laban ka a la den musereŋɛ Rakeli tugun dii a ma, a ni a ma a la muse la. 29Wo ka a taran, Laban ka a la jon den musereŋɛ Bila tugun dii a la den musereŋɛ Rakeli ma, a ni ma a la joŋɛ la. 30Yaguba ka Rakeli tugun ma a la muse la, a ka a kanu fisa Leya ko. A mɛn ka san wɔrɔwila wale ma Laban ye.
Yaguba la deŋɛnu
31Alatala to ka a yen Leya la ko bele banden diyala Yaguba ye iko Rakeli, a ka Leya ma den sɔtɔla la, Rakeli mata den sɔtɔ bale la. 32Leya ka bue jigan, a ka den kayireŋɛ sɔtɔ, a ka a tɔgɔ sa Rubɛn. A ka a fɔ, a ko: «Alatala to bata n na maluya yen, kɔtɛ n na kaye si n nadiya le.» 33A mɛn ka bue jigan tugun, a ka den kayireŋɛ sɔtɔ. A ka a fɔ, a ko: «Alatala ka a lɔn n bele diyaren n na kaye ye, a mɛn ka kɛ tugun dii n ma.» A ka a tɔgɔ sa Simeyɔn. 34A mɛn ka bue jigan, a ka den kayireŋɛ sɔtɔ. A ka a fɔ, a ko: «Kɔtɛ kɛ biyase, n na kaye te to a ma kiti n na ko la, bayi n bata den kayiren saba sɔtɔ a ye.» Wolo mu, Yaguba ka Lewi tɔgɛ sa wo deŋɛ kunma. 35A mɛn ka bue jigan, a ka den kayireŋɛ sɔtɔ. A ka a fɔ, a ko: «Kɔtɛ kan n si Alatala tantu le.» A ka wo deŋɛ tɔgɔ sa Juda. A ka den sɔtɔ koe dan betunna.
Currently Selected:
Ko fɔlɔfɔlɛ 29: MOG
Highlight
Share
Copy
Want to have your highlights saved across all your devices? Sign up or sign in
