Ko fɔlɔfɔlɛ 30

1Rakeli to bata a yen a bele den sɔtɔla Yaguba ye, a ka a kɔtɔ Leya bɛsɛnkɔnnɛya. Rakeli ka a fɔ Yaguba ye, a ko: «N kɔ den kayireŋɛnu la, ka wo ma n si faga le.» 2Yaguba dumɛnta Rakeli ma a la wo kuma la. A ka a fɔ a ko: «A be toren i ye nde le mu Ala la, min be i maren den sɔtɔ bale la ba?» 3Rakeli ka a fɔ, a ko: «Bila jigan n na jon den musereŋɛ, alako a ni deŋɛnu sɔtɔ anu ni ma n tɛŋɛ la. Ale la ko si a ma nde tugun ni den kayireŋɛnu sɔtɔ i ye.»

4A ka a la jon muse Bila jigan, a ka a dii Yaguba ma, a ni ma a la muse la. Yaguba nun Bila kita. 5Bila ka bue jigan, a ka den kayireŋɛ sɔtɔ Yaguba ye. 6Rakeli ka a fɔ, a ko: «Ala bata n na kiite sa, a ka n kulɛ tugun mɔɛ, a ka n kɔ den kayireŋɛ la.» Wolo mu a ka wo deŋɛ tɔgɔ sa Dan.

7Rakeli la jon muse Bila mɛn ka bue jigan, a ka den kayiren filaɲɔgɛ sɔtɔ Yaguba ye. 8Rakeli ka a fɔ a ko: «Ala ka a lɔn, n ka n kɔtɔ kɛlɛ le. Kɔnɔ n bata sɛnbɛ sɔtɔ a kunma.» A ka a la deŋɛ tɔgɔ sa Nafutali.

9Leya to ka a lɔn a bata den sɔtɛ dan, a ka a la jon muse Silipa jigan, a ka a don Yaguba bolo a ni a ma a la muse la. 10Leya la jon muse Silipa ka den kayiren dɔndɔ sɔtɔ Yaguba ye. 11Leya ka a fɔ, a ko: «Hɛra bata na.» A ka a la deŋɛ tɔgɔ sa Gadi. 12Silipa ka den kayiren filaɲɔgɛ sɔtɔ Yaguba ye. 13Leya ka a fɔ, a ko: «N bata ɲagalin, musenu bata a lɔn kɔtɛ n bata hɛra sɔtɔ.» A ka deŋɛ tɔgɔ sa Aseri.

14Kɔrɔ tɛgɛ tɛmuɛ to keta, Rubɛn tagata sɛnɛ tɔ. A ka lɔgɔ wolenu taran ɲɔ, min mu den sɔtɔ boore la. A ka anu doni a nɛɛnɛ Leya ye. Rakeli ka a fɔ Leya ye, a ko: «Yandi i la deŋɛ la den sɔtɔ boore do dii n ma.» 15Leya ka a jaabi, a ko: «I bata n na kaye bɔɔ n bolo wo ma i wasa. I mɛn be diren n na deŋɛ la den sɔtɔ boore le jiganna?» Rakeli ka a fɔ, a ko: «Awa, i nun Yaguba le be kila bi sue tɔ i la deŋɛ la den sɔtɔ boore faliŋɛ la.» 16Yaguba to be nala wura la ka bɔɔ sɛnɛ tɔ, Leya tagata a labɛndula, a ka a fɔ a ye, a ko: «I be kila nde le fɛ bi, bayi n bata bi sue falin n na deŋɛ la den sɔtɔ boore la.» Awa, a nun Yaguba kita wo sue tɔ. 17Ala ka Leya la Ala mataraŋɛ jigan a ye. A ka bue jigan, a ka den kayiren looluɲɔgɛ sɔtɔ Yaguba ye. 18Leya ka a fɔ, a ko: «Nde min ka n na jon muse jigan n ka a dii n na kaye ma, Ala bata n sɔŋɛ dii.» A ka wo deŋɛ tɔgɔ sa Isakari. 19A ka wo singi bɔɔ, a mɛn ka bue jigan tugun. A ka den kayiren wɔrɔɲɔgɛ sɔtɔ Yaguba ye. 20Leya ka a fɔ, a ko: «Ala bata n kɔ a ɲinma la. Kɛ biyase n na kaye si n biliya le, bayi n bata den kayiren wɔɔrɔ sɔtɔ a ye.» A ka wo deŋɛ tɔgɔ sa Sabulɔn. 21Wo kɔma, a ka den museren dɔndɔ sɔtɔ. A ka wo tɔgɔ sa Dina.

22Ala hinnɛta Rakeli la: a ka a la mamataraŋɛ yen, a ka a jigan, a ka a ma den sɔtɔlá la. 23Rakeli ka bue jigan, a ka den kayireŋɛ sɔtɔ. A ka a fɔ, a ko: «Ala bata maluya bɔɔ n ma.» 24A ka a tɔgɔ sa Yusufu. A ka a fɔ, a ko: «Alatala mu n kɔla den kayireŋɛ do tugun na.»

Yaguba la bannaya

25Bɔɔla Rakeli ka Yusufu sɔtɔ, Yaguba ka a fɔ Laban ye, a ko: «N boloka n ni saagi n bata duge tɔ. 26A to n nun n na musenu ni taga n walita i ye minnu la ko la, anun n na deŋɛnu, bayi ile yɛtɛ ka a lɔn n ka wale min bere ma i ye.» 27Laban ka a jaabi, a ko: «I ni sabari, i ni to yan. N bata a lɔn fɛrile malanu la kuma tɔ, Alatala be barikɛ saren n ma ile le la ko sabu la. 28N bɛnta i sɔŋɛ diila min na, a fɔ n ɲɛ ba; n si a don i bolo.» 29Yaguba ka a fɔ, a ko: «Ile yɛtɛ ka a lɔn n walita i ye ki min na, han i la wɔɔrɛ mata a la. Wo sabue fatanden nde le la. 30Yannun n ni na, donden de be i bolo nun. Kɔtɛ kolofeŋɛ siyama bata to i bolo. Bɔɔla n donta i bata, Alatala ka barikɛ sa i la ko tɔ. I te a to kɔtɛ ba n ni wale do tugun ma n na denbaya ye?» 31Laban ka a fɔ, a ko: «N bɛnta fen diila i ma?» Yaguba ka a jaabi, a ko: «I kana fenfen dii n ma betunna. N be naala min fɔla i ye i si wo dii n ma. Ka i sɔnta wo la, nde tugun si i la kolofeŋɛnu kanta, n mɛn ni anu daɲini iko fɔlɔ. 32N si taga le bi, i la kolofeŋɛnu bɛ fɛlɛdula. Tonbitonbe nun ɲɛgɛŋɛ, nun fiŋɛ be saaka beema min bale ma, anun tonbitonbe nun ɲɛgɛŋɛ nun a beema be baa finma min bale ma, a bɛ ni sɔ sɔngɔ dɔndɔ la. Wo ni ma n sɔŋɛ la. 33N na tɔɲa si naa makɛnɛn de sinan i tini na n na kolofeŋɛnu fɛlɛdula tɛmuɛ min tɔ. Ɲɛgɛŋɛ nun tonbitonbe bele saakanu min bale ma, anun fiŋɛ, awa wo bata ma n bolo kankaya la; baanu tugun ɲɔgɔnna.» 34Laban ka a fɔ, a ko: «I be min fɔren wo la, n bata sɔn. Mɔ bata bɛn wo ma.» 35Kɔnɔ, wo lun yati, kaarin kaariŋɛ anun tonbitonbe be sikulenu minnu ma, Laban ka wonu masubɛ. Tonbitonbe nun ɲɛgɛŋɛ be baanu minnu bale ma, a ka wonu tugun masubɛ, anun baanu minnu bɛ bale mabasanden a beema beema la, anun saakanu minnu bale finma mu. A ka wonu bɛ masubɛ, a ka anu don a la den kayireŋɛnu bolo. 36Wo kɔma, a ka tele saba tagamaŋɛ ma anu doni koe la kan do, alako a nun Yaguba ni fatan. Yaguba tota ɲɔ Laban na kolofen tɔɛnu daɲini koe la.

37Yaguba ka lɔgɔ kute mɔɔli saba boliŋɛ kati, anu bɛ kutan. A ka anu kan donu kobolenu lawuli a ma mamaɲɛgɛŋɛ la, alako wo kobolenu lawuli ba ni beeya a ni makɛnɛn. 38Wo kɔma, a ka lɔgɔ boliŋɛnu minnu kobolenu lawuli a ma, a tota anu sala kolofeŋɛnu la ji minfeŋɛ tɔ. Ka kolofeŋɛnu nata je mindula, kayenu ni yɛlɛ a musenu ma, wo lɔgɔ boliŋɛnu tabɛŋɛ tɔ. 39Ka kolofen kayenu yɛlɛta a musenu ma wo lɔgɔ boliŋɛnu tabɛŋɛ tɔ, wolo si a ma, kolofen musenu si deŋɛnu sɔtɔ, kaarin kaariŋɛ nun tonbitonbe anun ɲɛgɛŋɛ ni to saren wo deŋɛnu bale ma.

40Yaguba mɛn ka saaka musenu jigan, a ka anu sɔ Laban na kolofeŋɛnu tabɛŋɛ tɔ, kaarin kaariŋɛ nun fiŋɛ be minnu ma. Wonu ka deŋɛnu sɔtɔ, kaarin kaariŋɛ be wonu tugun ma, anu mata Yaguba tɛŋɛ la. A ma anu basan Laban na kolofeŋɛnu fɛ. 41Kolofen banbanu be yɛlɛla a musenu ma tɛmuɛ min tɔ, Yaguba ka lɔgɔ boliŋɛ sa kolofeŋɛnu ji min dula, alako anu ni yɛlɛ musenu ma lɔgɔ boliŋɛnu tabɛŋɛ tɔ. 42Yaguba bele wo mala kolofen lanmanu la. Wolo ka a ma, kolofen lanmanu mata Laban tɛŋɛ la. Yaguba tɛŋɛnu mata a banbanu la.

43Awa, Yaguba mata banná belebele la ɲɔgɔnna le. A ka kolofeŋɛ siyama sɔtɔ. Jon musenu anun jon kayenu tota a bolo, anun ɲɔgɔmɛnu anun sofalenu.

Currently Selected:

Ko fɔlɔfɔlɛ 30: MOG

Highlight

Copy