ಮಾರ್ಕ 6
6
ಯೇಸುರ ಸ್ವಂತ ಊರ್‌ಕಾರ ಅಂವೊನ ತ್‍ಕ್ಕಾರ ಮಾಡ್‍ನದ್
(ಮತ್ತಾಯ 13.53–58; ಲೂಕ 4.16–30)
1ಯೇಸು ಈ ಪಟ್ಟಣ ಬುಟ್ಟಿತ್ ತಾಂಡ ಊರ್‌ಕ್ ಪೋಚಿ, ಅಂವೊಂಡ ಶಿಷ್ಯಂಗಳು ಅಂವೊಂಡ ಕೂಡೆ ಪೋಚಿ. 2ಸಬ್ಬತ್ ದಿನ ಬಪ್ಪಕ ಸಬಾಮಂದಿರತ್‍ಲ್ ಬೋದನೆ ಮಾಡ್‌ವಕ್ ಸುರು ಮಾಡ್‍ಚಿ. ದುಂಬ ಜನ ಕೂಡಿತ್ಂಜತ್. ಅಯಿಂಗಕ್ ಇಂವೊಂಡ ಉಪದೇಶತ್‍ನ ಕ್‍ೕಟಿತ್ ದುಂಬ ಆಶ್ಚರ್ಯ ಆಚಿ. ಇನ್ನತ ಉಪದೇಶವೆಲ್ಲ ಇಂವೊಂಗ್ ಎಲ್ಲಿಂಜ ಕ್‍ಟ್ಟ್‌ಚಿ? ಎಲ್ಲಿಂಜ ಈ ತರ ಜ್ಞಾನ ಕ್‍ಟ್ಟ್‌ಚಿ? ಇಂವೊ ಎನ್ನನೆ ಈ ತರ ಅದ್ಬುತ ಕಾರ್ಯ ಮಾಡಿಯಂಡುಂಡ್? 3ಇಂವೊ ಒರ್ ಆಚಾರಿಯಲ್ಲ? ಮರಿಯಂಡ ಮೋಂವೊನಲ್ಲಾ? ಇಂವೊ ಯಾಕೋಬ, ಯೋಸೆ, ಯೂದ ಪಿಂಞ ಸೀಮೋನ ಎಣ್ಣುವಯಿಂಗಡ ಅಣ್ಣನಲ್ಲಾ? ಅಂವೊಂಡ ತಂಗೆಯೆಲ್ಲ ಇಲ್ಲಿ ವಾಸಮಾಡಿಯಂಡುಂಡಲ್ಲಾಂದ್ ಎಣ್ಣಿಯಂಡ್ ಅಲ್ಲಿ ಉಳ್ಳಯಿಂಗ ಅಂವೊಂಡ ವಿಷಯತ್‍ಲ್ ಬೇಜಾರ್ ಮಾಡಿಯಂಡ್, ಅಂವೊ ಎಣ್ಣ್‌ವಾನ ಅಯಿಂಗಕ್ ನಂಬ್‍ವಕ್ ಕಯಿಂಜಿತ್‌ಲ್ಲೆ.
4ಅಕ್ಕ ಯೇಸು: ಒರ್ ಪ್ರವಾದಿಕ್ ತಾಂಡ ಊರ್ ಪಿಂಞ ಅಂವೊಂಡ ಮನೆಕಾರ ಬೆಂದ್‌ವಳ ಬುಟ್ಟಿತ್ ಬೋರೆ ಎಲ್ಲಾ ಜಾಗತ್‍ಲು ಮರ್ಯಾದಿ ಕ್‍ಟ್ಟ್‌ವಾಂದ್ ಎಣ್ಣ್‌ಚಿ. 5ಚೆನ್ನ ಕಾಯಿಲೆಸ್ತಂಗಡ ಮೇಲೆ ಕೈಯಿನ ಬೆಚ್ಚಿತ್ ವಾಸಿಮಾಡ್‌ನದಲ್ಲತೆ, ಬೋರೆ ಏದ್ ಅದ್ಬುತ ಕಾರ್ಯವು ಅಲ್ಲಿ ಅಂವೊಂಗ್ ಮಾಡ್‌ವಕ್ ಕಯಿಂಜಿತ್ತ್‌ಲ್ಲೆ. 6ಈ ಜನಕ್ ನಾಡ ಮೇಲೆ ನಂಬಿಕೆ ಬಂದಿತ್‌ಲ್ಲೇಂದ್ ಯೇಸುಕ್ ಆಶ್ಚರ್ಯ ಆಚಿ. ಪಿಂಞ ಯೇಸು ಪಕ್ಕತ್‍ರ ಊರ್‌ಕೆಲ್ಲಾ ಪೋಯಿತ್ ಜನಕ್ ಬೋದನೆ ಕೊಡ್‍ತತ್.
ಯೇಸು ಪನ್ನೆರಂಡ್ ಶಿಷ್ಯಂಗಳ ನಲ್ಲ ಸುದ್ದಿ ಎಣ್ಣ್‌ವಕ್ ತಾಂಡ ಮಿಂಞಕ್ ಅಯಿಚತ್
(ಮತ್ತಾಯ 10.5–15; ಲೂಕ 9.1–6)
7ಯೇಸು ಅಂವೊಂಡ ಪನ್ನೆರಂಡ್ ಶಿಷ್ಯಂಗಳ ಕಾಕುವಂಜಿ ದಂಡ್ ದಂಡಾಳಾಯಿತ್ ಅಯಿಂಗಳ ಅಯಿಚತ್. ನಿಂಗ ಊರ್‌ಕ್ ಪೋಯಿತ್ ನಿಂಗ ಕೂಳಿ ಪುಡ್‌ಚಯಿಂಗಳ ಬುಡ್‍ತಿ ಎಣ್ಣಿಯಂಡ್ ಶಕ್ತಿ ಕೊಡ್‍ತತ್. 8ನಿಂಗ ಪ್ರಯಾಣ ಪೋಪಕ ನಿಂಗಡ ಕೂಡೆ ಏದು ಎಡ್‍ತಂಡ್ ಪೋಕತಿ. ಬರಿ ಒರ್ ಕೋಲ್ ಎಡ್‌ತ ಪೋಯಿ. ಚೀಲ, ಒಟ್ಟಿ ಪಿಂಞ ನಿಂಗಡ ಜೋಬ್‌ಲ್ ದುಡ್ಡ್‌ಕಾಸ್ ಎಡ್‌ತ ಪೋಕತಿ. 9ಕಾಲ್‌ಕ್ ಎಕ್ಕಡ ಇಟ್ಟೊಳಿ ಆಚೇಂಗಿ ಒರ್ ಬಟ್ಟೇನು ಎಡ್‌ತ ಪೋಕತಿ. 10ನಿಂಗಳ ದಾರ್ ಮರ್ಯಾದೆಲ್ ಸತ್ಕಾರ ಮಾಡ್‌ವೋ ಅಲ್ಲಿಯೇ ಆ ಮನೆಲ್ ನಿಂಗ ಪೋಕಣೆಕ್ ಇರಿ. 11ನಿಂಗ ಒರ್ ಊರ್‌ಕ್ ಪೋನಕ ನಿಂಗಳ ಸ್ವಾಗತ ಮಾಡತ ಅಥವ ನಿಂಗ ಮಾಡ್‍ನ ಬೋದನೆನ ಕ್‍ೕಕತೆ ಪೋಚೇಂಗಿ, ನಿಂಗಡ ಕಾಲ್‌ಲ್ ಉಳ್ಳ ದೂಳ್‍ನ ಕೊಡ್‌ಕ್‌ವಂಜಿ ಬಾರಿ, ಅಯಿಂಗಕ್ ಅದ್ ಒರ್ ಎಚ್ಚರಿಕೆ ಕೊಡ್‍ತನೆಕೆ ಆಪ.#6.11 ನಿಂಗ ದೇವಡ ನಲ್ಲ ಸುದ್ದಿನ ತಿರಸ್ಕಾರ ಮಾಡ್‍ನಗುಂಡ್, ನಂಗಳು ನಿಂಗಳ ತಿರಸ್ಕಾರ ಮಾಡ್‌ವ. ನಂಗ ನಿಂಗಡ ಮೇಲೆ ಬಪ್ಪ ನ್ಯಾಯತೀರ್ಪ್‌ಕ್ ನಂಗ ನಿಂಗಡ ಆತ್ಮಕ್ ಜವಾಬ್ದಾರಂಗ ಅಲ್ಲಾಂದ್ ಎಣ್ಣ್‌ವಕುಳ್ಳ ಗುರ್‌ತ್
12ಆ ಶಿಷ್ಯಂಗ ಪೊರಮೆ ಪೋಪಂಜಿ ಜನಕ್: ನಿಂಗ ದೇವಡ ಪಕ್ಕ ನಿಂಗಡ ಪಾಪಕಾಯಿತ್ ಪಶ್ಚಾತಾಪ ಪಟ್ಟಿತ್ ಬಾರೀಂದ್ ಬೋದನೆ ಕೊಡ್‌ತಂಡ್ ಪೋಚಿ. 13ಅಯಿಂಗ ದುಂಬ ಜನಡ ಕೂಳಿನ ಬುಡ್‌ತಿಯಂಡ್, ಕಾಯಿಲೆ ಉಳ್ಳ ಜನಕ್ ಎಣ್ಣೇನ ತೇಚಿತ್ ಜನಳ ವಾಸಿ ಮಾಡ್‍ಚಿ.
ಯೋಹಾನಂಡ ಮರಣ
(ಮತ್ತಾಯ 14.1–12; ಲೂಕ 9.7–9)
14ಅಲ್ಲಿಯತ್‍ರ ರಾಜನಾನ ಹೆರೋದಂಗ್ ಇದೆಲ್ಲಾ ಗೊತ್ತಾಚಿ. ಎನ್ನನೆ ಎಣ್ಣ್‌ಚೇಂಗಿ ಯೇಸುರ ವಿಷಯ ಎಲ್ಲೆಲಿಯು ಕ್‍ೕಳಿಪಟ್ಟಡಿಂಜತ್. ಚೆನ್ನ ಜನ, ಇಂವೊ ಚತ್ತ್‌ಪೋನ ಯೋಹಾನ. ಇಂವೊ ಚಾವ್‍ಯಿಂಜ ಬದ್‌ಕಿತ್ ಬಂದಿತುಂಡ್. ಅದ್ಂಗೇ ಇಚ್ಚಕ್ ಬಲ್ಯ ಅದ್ಬುತ ಕಾರ್ಯತ್‍ನೆಲ್ಲಾ ಇಂವೊಂಗ್ ಮಾಡ್‌ವಕ್ ಕಯ್ಯೂಂದ್ ಎಣ್ಣ್‌ಚಿ.
15ಚೆನ್ನ ಜನ: ಇಂವೊ ಎಲೀಯ ಪ್ರವಾದಿ ಎಣ್ಣ್‌ವಂವೊನಾಯಿತಿಕ್ಕೂಂದ್ ಎಣ್ಣ್‌ಚಿ;
ಇಂಞು ಚೆನ್ನ ಜನ: ಇಂವೊ ಒರ್ ಪೂರ್ವ ಕಾಲತ್‍ರ ಪ್ರವಾದಿ ಆಯಿತಿಕ್ಕೂಂದ್ ತಕ್ಕ್ ಪರ್ಂದಂಡ್ ಇಂಜತ್.
16ಈ ವಿಷಯತ್‌ನೆಲ್ಲ ಹೆರೋದ ರಾಜ ಕ್‍ೕಟಿತ್: ನಾನ್ ಮಂಡೆನ ಕೆತ್ತ್‌ಚಿಟ್ಟ ಯೋಹಾನನೇ ಇಂವೊ; ಆಚೇಂಗಿ ಅಂವೊ ಎದ್ದಿತ್ ಬಾತ್‍ೕಂದ್ ಎಣ್ಣ್‌ಚಿ. 17ಈ ಹೆರೋದ ಅಂವೊಂಡ ಅಣ್ಣ ಫಿಲಿಪ್ಪಂಡ ಪೊಣ್ಣ್ ಹೆರೋದ್ಯನ ಮಂಗಲ ಕಯಿಚಗುಂಡ್, ನೀನ್ ನೀಡ ಅಣ್ಣಂಡ ಪೊಣ್ಣ್‌ನ ಮಂಗಲ ಮಾಡ್‍ನದ್ ನ್ಯಾಯವಲ್ಲಾಂದ್ ಯೋಹಾನ, ರಾಜ ಹೆರೋದಂಗ್ ಎಣ್ಣಿಯಂಡ್ ಇಂಜತ್. 18ಆನಗುಂಡ್ ಹೆರೋದ ಯೋಹಾನನ ಪುಡ್‌ಚಿತ್ ಕೈಕಾಲ್‌ಕ್ ಸರ್ಪಣಿ ಇಟ್ಟಿತ್ ಜೈಲ್‍ಲ್ ಇಟ್ಟತ್. 19ಅದ್ಂಗಾಯಿತ್ ಹೆರೋದ್ಯ ಯೋಹಾನಂಡ ಮೇಲೆ ಪಗೆ ಬೆಚ್ಚಂಡಿಂಜತ್. ಅಂವೊನ ಕೊಲ್ಲಂಡೂಂದ್ ಎಣ್ಣಿಯಂಡಿಂಜತ್, ಆಚೇಂಗಿ ಕಯಿಂಜಿತ್‌ಲ್ಲೆ. 20ಎನ್ನಂಗೆಣ್ಣ್‌ಚೇಂಗಿ ಯೋಹಾನ ನೀತಿವಂತಂವೊನಾಯಿತ್ ದೇವಡ ಬಕ್ತನಾಯಿತ್ ಉಳ್ಳದ್ ಹೆರೋದಂಗ್ ಗೊತ್ತಾನಗುಂಡ್ ಅಂವೊಂಗ್ ಬೊತ್ತಿಯಂಡ್ ಜೈಲ್‍ಲ್ ಚಾಯಿತೆ ಕಾಪಾಡಿಯಂಡ್ ಇಂಜತ್. ಹೆರೋದಂಗ್ ಯೋಹಾನ ಪರಿಯುವ ಉಪದೇಶತ್‍ನ ಕ್‍ೕಪಕ್ ದುಂಬ ಕುಶಿ ಇಂಜತ್, ಆಚೇಂಗಿ ಸಹ ಯೋಹಾನಂಡ ಎಚ್ಚರಿಕೆ ಕ್‍ೕಪಕ ಹೆರೋದಂಗ್ ಪೋಡಿ ಆಪಕಿಂಜತ್. 21ಒಮ್ಮ ಹೆರೋದ ತಾಂಡ ಪುಟ್ಟ್‌ನ ದಿವಸತ್‍ಲ್ ಬಲ್ಯ ಬಲ್ಯ ಅದಿಕಾರಿಯಳ, ಪಡೆಲುಳ್ಳ ಬಲ್ಯ ಸೇನಾದಿಪತಿಯಳ, ಗಲಿಲಾಯತ್‍ಲುಳ್ಳ ಮುಕ್ಯಪಟ್ಟ ಜನಳ ಕಾಕಿತ್ ಗದ್ದಾಳ ಮಾಡ್‍ಚಿ. ಅಕ್ಕ ಹೆರೋದ್ಯಕ್ ಸಂದರ್ಪ ಕ್‌ಟ್ಟಿಪೋಚಿ. 22ಉಂಡಿತ್ ಆನದು ಹೆರೋದ್ಯಡ ಮೋವ ಒಳ್‍ಕ್ ಬಂದಿತ್ ಅಯಿಂಗಡ ಎಲ್ಲಾಡ ಮಿಂಞತ್‍ಲ್ ಆಡ್‌ಚಿ. ಈ ಆಟತ್‌ನ ನೋಟ್‍ನಗುಂಡ್ ರಾಜನಾನ ಹೆರೋದಂಗೂ ಅಲ್ಲಿ ಇಂಜ ಎಲ್ಲಾರ್‌ಕು ಕುಶಿ ಆಯಿಪೋಚಿ. ಅಕ್ಕ ಹೆರೋದ ರಾಜ ಆ ಮೂಡಿನ ಕಾಕಿತ್, ನೀಕ್ ನನ್ನಗುಂಡ್ ಎಂತ ಆಂಡು, ಎಂತ ಬೋಂಡು? ನೀಕ್ ಎಂತ ಬೋಂಡ್‍ಚೇಂಗಿಯು ನಾನ್ ತಪ್ಪೀಂದ್ ಎಲ್ಲಾಡ ಮಿಂಞತ್‍ಲ್ ಸತ್ಯ ಮಾಡ್‍ಚಿ. 23ನಾಡ ರಾಜ್ಯತ್‍ರ ಪಾದಿ ಬಾಗತ್‍ನ ಕ್‍ೕಟತೇಂಗಿಯು ನಾನ್ ನೀಕ್ ತಪ್ಪೀಂದ್ ಆಣೆ ಇಟ್ಟಿತ್ ಎಣ್ಣ್‌ಚಿ.
24ಅವ ಪೊರಮೆ ಪೋಯಿತ್: ನಾನ್ ಎಂತ ಕ್‍ೕಕಂಡೂಂದ್ ಅವಡ ಅವ್ವಂಡ ಪಕ್ಕ ಕ್‍ೕಟತ್.
ಅದ್ಂಗ್ ಅವ: ದೀಕ್ಷಾಸ್ನಾನ ತಪ್ಪ ಯೋಹಾನಂಡ ಮಂಡೆನ ಕೆತ್ತಿತ್ ತರಂಡೂಂದ್ ಕ್‍ೕಳ್‍ೕಂದ್ ಎಣ್ಣ್‌ಚಿ. 25ಆ ಮೂಡಿ ಬೆರಿಯ ರಾಜಂಡ ಪಕ್ಕ ಪೋಯಿತ್ ದೀಕ್ಷಾಸ್ನಾನ ತಪ್ಪ ಯೋಹಾನಂಡ ಮಂಡೆನ ಕೆತ್ತಿತ್ ಇಕ್ಕ ತಳಿಯತ್‍ಲ್ ಬೆಚ್ಚಿತ್ ತಪ್ಪಕ್ ಎಣ್ಣ್‌ಚಿ. 26ಈ ತಕ್ಕ್‌ನ ಕ್‍ೕಟದು ರಾಜ ಹೆರೋದಂಗ್ ಪೆರ್ತ್ ಬೇಜಾರ್ ಆಚಿ. ಇಂಜಕಲೂ ಎಲ್ಲಾಡ ಮಿಂಞತ್ ಆಣೆ ಮಾಡ್‍ನಗುಂಡ್ ಬಯ್ಯಕ್ ಎಡ್‌ಕತನೆಕೆ ಆಯಿಪೋಚಿ. 27ರಾಜ ಒರ್ ಸಿಪಾಯಿನ ಕಾಕಿತ್ ನೀನ್ ಜೈಲ್‌ಕ್ ಪೋಪಂಜಿ ಆ ಯೋಹಾನಂಡ ಮಂಡೆನ ಕೆತ್ತಿತ್ ಕೊಂಡ್‌ಬಾಂದ್ ಎಣ್ಣ್‌ಚಿ. 28ಆ ಸಿಪಾಯಿ, ರಾಜನಾನ ಹೆರೋದ ಎಣ್ಣ್‌ನ ಪ್ರಕಾರ ಯೋಹಾನಂಡ ಮಂಡೆನ ಕೆತ್ತಿತ್ ಒರ್ ತಳಿಯತ್‍ರ ಮೇಲೆ ಬೆಚ್ಚಿತ್ ಕೊಂಡ್‌ಬಂತ್ ಆ ಮೂಡಿಕ್ ಕೊಡ್‍ತತ್. ಆ ಮೂಡಿ ಅವ್ವಂಗ್ ಕೊಂಡ್ ಪೋಯಿತ್ ಕೊಡ್‍ತತ್. 29ಯೋಹಾನಂಡ ಶಿಷ್ಯಂಗ ಈ ಸುದ್ದಿನ ಕ್‍ೕಪದು ಜೈಲ್‌ಕ್ ಬಂದಿತ್ ಯೋಹಾನಂಡ ತಡೀನ ಎಡ್‌ತ ಪೋಯಿತ್ ಪೂತತ್.
ಯೇಸು ಅಯ್ಯಾಯಿರ ಜನಕ್ ಊಟ ಕೊಡ್‌ತದ್, ಸಮುದ್ರತ್‍ರ ಮೇಲೆ ನಡ್ಂದದ್, ರೋಗಿಯಳ ವಾಸಿ ಮಾಡ್‍ನದ್
(ಮತ್ತಾಯ 14.13–21; ಲೂಕ 9.10–17; ಯೋಹಾನ 6.1–14)
30ಯೇಸು ಅಯಿಚ ಅಪೊಸ್ತಲಂಗ ಯೇಸುರ ಪಕ್ಕ ವಾಪಸ್ ಬಂದಿತ್, ಅಯಿಂಗ ಏದೆಲ್ಲಾ ಬೋದನೆ ಪಿಂಞ ಅದ್ಬುದ ಕಾರ್ಯತ್‍ನ ಮಾಡ್‍ಚೋ ಅದ್‍ನೆಲ್ಲಾ ಎಣ್ಣ್‌ಚಿ. 31ಯೇಸುರ ಪಕ್ಕ ದುಂಬ ಜನ ಪೋಯಂಡ್ ಬಂದಂಡ್ ಇಂಜತ್. ಆನಗುಂಡ್ ಯೇಸುಕ್ ಪಿಂಞ ಯೇಸುರ ಶಿಷ್ಯಂಗಕ್ ಉಂಬ ತಿಂಬಕು ಸಮಯ ಕ್‌ಟ್ಟಿಯಂಡಿಂಜಿಲೆ. ನಂಗ ಇಲ್ಲಿಂಜ ದಾರೂ ಇಲ್ಲತ ಜಾಗಕ್ ಪೋಯಿತ್ ಚೆನ್ನ ಆರಾಮ್‍ಲ್ ಇಕ್ಕನಾಂದ್ ಎಣ್ಣ್‌ಚಿ. 32ಅಯಿಂಗ ದೋಣಿಲ್ ಅಳ್‌ತಿತ್ ದಾರೂ ಇಲ್ಲತ ಜಾಗಕ್ ಪೋಚಿ. 33ದುಂಬ ಜನಕ್ ಈ ದೋಣಿಲ್ ಪೋಪಯಿಂಗ ದಾರ್‍ೕಂದ್ ಗೊತ್ತಾಯಿ ಪೋಚಿ. ಅಯಿಂಗ ಯೇಸು ಪಿಂಞ ಅಂವೊಂಡ ಶಿಷ್ಯಂಗ ಆ ಕರೆಕ್ ಬಪ್ಪಕ್ ಮಿಂಞಲೇ ಓಡಿ ಪೋಯಿತ್ ಎತ್ತ್‌ಚಿ. 34ಯೇಸು ದೋಣಿಯಿಂಜ ಇಳಿವಕ ದುಂಬ ಜನಡ ಗುಂಪ್‍ನ ಕಾಂಬಕ, ಕೊರಿ ಕಾಪಂವೊ ಇಲ್ಲತ ಕೊರಿ ಗುಡ್ಡೆರನೆಕೆ ಅಯಿಂಗ ಇಂಜಗುಂಡ್ ಅಯಿಂಗಡ ಮೇಲೆ ಅಂವೊಂಗ್ ದುಂಬ ಕನಿಕರ ಆಯಿತ್, ಅಯಿಂಗಕ್ ದುಂಬ ಬೋದನೆನ ವಿವರಿಚಿಟ್ಟತ್. 35ಬಯಿಟ್ ಪಕ್ಕ ಬಂದಂಡಿಂಜಗುಂಡ್ ಅಂವೊಂಡ ಶಿಷ್ಯಂಗ ಯೇಸುರ ಪಕ್ಕ ಬಂದಿತ್ ಇದ್ ದಾರೂ ವಾಸ ಮಾಡತ ಜಾಗ, ದುಂಬ ಬಯಿಟಾಯಂಡುಳ್ಳಗುಂಡ್, 36ಈ ಜನಳ ಪಕ್ಕತ್‍ಲ್ ಉಳ್ಳ ಊರ್ ಪಟ್ಟಣಕ್ ಪೋಪಕ್ ಎಣ್ಣ್, ಅಯಿಂಗ ಅಲ್ಲಿ ಪೋಯಿತ್ ತಿಂಬಕ್ ಎಂತೇಂಗಿ ಎಡ್‍ತಿತ್ ತಿಂಗಡ್‍ೕಂದ್ ಅಂವೊಂಗ್ ಎಣ್ಣ್‌ಚಿ.
37ಅದ್ಂಗ್ ಯೇಸು: ನಿಂಗಳೇ ಅಯಿಂಗಕ್ ಉಂಬಕ್ ಕೊಡೀಂದ್ ಎಣ್ಣ್‌ಚಿ.
ಅದ್ಂಗ್ ಶಿಷ್ಯಂಗ: ಎಂತ ಎಣ್ಣ್‌ವಿರಾ, ನಂಗ ಅಯಿಂಗಕ್ ಒಟ್ಟಿ ಎಡ್‌ತ ಬಪ್ಪಕಾಯಿತ್ ಇನ್ನೂರ್ ಬೊಳ್ಳಿರ ಪಣತ್‍ನ ಖರ್ಚಿಮಾಡಿತ್ ಅಯಿಂಗಡ ಕೆಲ ದುಂಬ್‌ಚಿಡುವದಾಂದ್ ಕ್‍ೕಟತ್.
38ಅಕ್ಕ ಯೇಸು: ನಿಂಗಡ ಪಕ್ಕ ಎಚ್ಚಕ್ ಒಟ್ಟಿ ಉಂಡ್‍ೕಂದ್ ನೋಟಿತ್ ಬಾರೀಂದ್ ಎಣ್ಣ್‌ಚಿ.
ಅಯಿಂಗ ನೋಟುವಂಜಿ ಅಂಜ್ ಒಟ್ಟಿ ದಂಡ್ ಮೀನು ಉಂಡ್‍ೕಂದ್ ಎಣ್ಣ್‌ಚಿ. 39ಈ ಜನಯೆಲ್ಲ ಚೆರಿಯ ಚೆರಿಯ ಗುಂಪಾಯಿತ್ ಆ ಪಚ್ಚೆ ಪಿಲ್ಲ್‌ರ ಮೇಲೆ ಅಳ್‌ಪಕ್ ಎಣ್ಣೀಂದ್ ಯೇಸು ಶಿಷ್ಯಂಗಕ್ ಎಣ್ಣ್‌ಚಿ. 40ಆ ಜನ ನೂರ್ ನೂರ್ ಪಿಂಞ ಐಂಬದ್ ಐಂಬದ್ ಜನಳಾಯಿತ್ ಅತ್ತಿ ಪತ್ತಿ ಅಳ್‌ತತ್. 41ಯೇಸು ಅಂಜ್ ಒಟ್ಟಿ ಪಿಂಞ ದಂಡ್ ಮೀನ್‌ನ ಪುಡ್‍ಚಂಡ್ ಕೊಡಿಕ್ ಪರಲೋಕತ್‌ನ ನೋಟುವಂಜಿ ದೇವಕ್ ವಂದನೆ ಮಾಡಿತ್, ಒಟ್ಟಿನ ಮುರಿಪಂಜಿ ಅಂವೊಂಡ ಶಿಷ್ಯಂಗಕ್ ಕೊಡ್‌ತಿತ್, ಜನಕೆಲ್ಲ ಕೊಡೀಂದ್ ಎಣ್ಣ್‌ಚಿ. ದಂಡ್ ಮೀನ್‌ನ ಸಹ ಎಲ್ಲಾರ್‌ಕು ಪಾಲ್‌ಮಾಡ್‌ಚಿ. 42ಜನಯೆಲ್ಲ ಕೆಲ ದುಂಬ ತಿಂದಿತ್ ತೃಪ್ತಿಯಾನ ಪಿಂಞ, 43ಪನ್ನೆರಂಡ್ ಕುಕ್ಕೆರಚ್ಚಕ್ ಒಟ್ಟಿಯು ಮೀನು ಬಾಕಿ ಆನಾನ ಯೇಸುರ ಶಿಷ್ಯಂಗ ಎಡ್‍ತತ್ 44ಒಟ್ಟಿ ಪಿಂಞ ಮೀನ್‌ನ ತಿಂದ ಆಣಾಳ್ ಮಾತ್ರ ಸುಮಾರ್ ಅಂಜ್ ಆಯಿರ ಇಂಜತ್.
ಯೇಸು ಸಮುದ್ರತ್‍ರ ಮೇಲೆ ನಡ್ಂದದ್
(ಮತ್ತಾಯ 14.22–33; ಯೋಹಾನ 6.15–21)
45ಯೇಸು ಜನಳ ಅಯಿಚಂಡಿಪ್ಪಕ, ಅಂವೊಂಡ ಶಿಷ್ಯಂಗಕ್, ದೋಣಿಲ್ ಪತ್ತಿತ್, ಅಕ್ಕಲೆ ಅಂವೊಂಗಿಂಜ ಮಿಂಞ ಕೆರೆರ ಆಬರಿಲ್ ಉಳ್ಳ ಬೇತ್ಸಾಯಿದ ಎಣ್ಣುವ ಜಾಗಕ್ ಬೆರಿಯ ಪೋಯೀಂದ್ ಅಯಿಚತ್. 46ಯೇಸು ಅಲ್ಲಿಯತ್‍ರ ಜನಕೆಲ್ಲ ದೇವ ನಿಂಗಕ್ ನಲ್ಲದ್ ಮಾಡಡ್‍ೕಂದ್ ಎಣ್ಣಿತ್, ದೇವಡ ಪಕ್ಕ ಪ್ರಾರ್ಥನೆ ಮಾಡ್‌ವಕ್ ಕುಂದ್‌ರ ಕೊಡಿಕ್ ಪೋಚಿ. 47ಬೈಟಾಪಕ ದೋಣಿ ಕೆರೆರ ಮದ್ಯತ್‍ಲ್ ಪೋಯಿತ್ಂಜತ್; ಯೇಸು ಒಬ್ಬನೇ ಕರೆಲ್ ಇಂಜತ್. 48ಗಾಳಿ ಜೋರಾಯಿತ್ ಅಯಿಂಗಕ್ ಎದ್‍ಕೆ ಬೀಜಿಯಂಡಿಂಜಗುಂಡ್, ಯೇಸುರ ಶಿಷ್ಯಂಗ ದೋಣಿನ ಕಷ್ಟತ್‍ಲ್ ನೂಕಿಯಂಡ್ ಇಂಜಾನ ಯೇಸು ಕಂಡತ್. ಯೇಸು ಆ ಶಿಷ್ಯಂಗಡ ಪಕ್ಕ ಪೊಲಾಕ ನೇರತ್ ಒರ್ ಮೂಂದ್ ನಾಲ್ ಗಂಟೆಕ್ ನೀರ್‌ರ ಮೇಲೆ ನಡ್ಂದ್ ಬಂದಂಡಿಂಜತ್. ಅಂವೊ ಅಯಿಂಗಳ ದಾಟಿ ಪೋಪನೆಕೆ ಇಂಜತ್. 49ಅಂವೊ ನೀರ್‌ಲ್ ನಡ್‍ಪದ್‌ನ ಕಂಡ ಅಯಿಂಗ ಅದ್ ಬೂತಾಂದ್ ಗೇನ ಮಾಡಿತ್ ಕೂತ್ ಕೊಡ್‍ಪಕ್ ಸುರು ಮಾಡ್‍ಚಿ. 50ಅಯಿಂಗಕೆಲ್ಲ ಯೇಸುನ ಕಾಂಬದು ಪೋಡಿ ಆಯಿಪೋಚಿ. ನಿಂಗ ದೈರ್ಯ ಎಡ್‌ತೊಳಿ, ಇದ್ ನಾನೇ, ಪೋಡಿ ಬೋಂಡಾಂದ್ ಎಣ್ಣಿಯಂಡ್, 51ಯೇಸು ಅಯಿಂಗಡ ಕೂಡೆ ದೋಣಿಲ್ ಅಳ್‌ತಂಡತ್. ಅಲ್ಲಿ ಬೀಜಿಯಂಡಿಂಜ ಗಾಳಿ ನಿಂದತ್. ಆ ಶಿಷ್ಯಂಗಕ್ ಇಂಞು ಆಶ್ಚರ್ಯ ಆಚಿ. 52ಅಯಿಂಗಡ ಮನಸ್ಸ್ ಕಲ್ಲಾಯಿತ್ಂಜಗುಂಡ್ ಅಂಜ್ ಆಯಿರ ಜನಕ್ ಒಟ್ಟಿಯು ಮೀನು ಇಂವೊ ಎನ್ನನೆ ಕೊಡ್‍ತತ್ ಎಣ್ಣಿಯಂಡ್ ಅಯಿಂಗಕ್ ಅರ್ಥ ಆಯಿತಿಲ್ಲೆ.
ಯೇಸು ರೋಗಿಯಳ ವಾಸಿ ಮಾಡ್‍ನದ್
(ಮತ್ತಾಯ 14.34–36)
53ಅಯಿಂಗ ಕೆರೆನ ದಾಟಿತ್ ಗೆನೆಜರೇತ್ ನಾಡ್‍ಕ್ ಬಂತ್ ದೋಣಿನ ಕೆಟ್ಟ್‌ಚಿ. 54ಅಯಿಂಗ ದೋಣಿಯಿಂಜ ಇಳ್ಂಜನೆಕೆ ಯೇಸುನ ಅಲ್ಲಿಯತ್‍ರ ಜನ ಗೊತ್ತ್ ಮಾಡಿರ್‌ತ್. 55ಅಲ್ಲಿ ಉಳ್ಳ ಜನ, ಎಲ್ಲಾ ಜಾಗಕು ಓಡಿ ಪೋಯಿತ್ ಅಲ್ಲಿಯತ್‍ರ ಕಾಯಿಲೆಕಾರಳ ಯೇಸುರ ಪಕ್ಕ ಪಲಂಬ್‌ಲ್ ಇಟ್ಟಿತ್ ನೇತಿಯಂಡ್ ಬಾತ್. ಅಂವೊ ಎಲ್ಲಿಯೆಲ್ಲಾ ಉಂಡ್‍ೕಂದ್ ಗೊತ್ತಾಚೋ ಆ ಜಾಗಕೆಲ್ಲಾ ಕಾಯಿಲೆಕಾರಳ ಕೊಂಡ್ ಬಾತ್. 56ಯೇಸು ಏದೆಲ್ಲಾ ಊರ್‌ಕ್, ಪಟ್ಟಣಕ್, ದೇಶಕ್ಕು ಪೋಚೋ, ಜನ ಅಲ್ಲಿಯುಳ್ಳ ಪೇಟೇಕ್ ಕಾಯಿಲೆಕಾರಳ ಕಾಕಿಯಂಡ್ ಪೋಯಿತ್, ನೀನ್ ಇಟ್ಟಂಡುಳ್ಳ ಬಟ್ಟೇರ ತುದಿನಾಚೇಂಗಿಯು ಮುಟ್ಟ್‌ವಕ್ ಬುಡ್‍ೕಂದ್ ಯೇಸುನ ಬೋಡಿಯಂಡತ್. ದಾರೆಲ್ಲಾ ಮುಟ್ಟ್‌ಚೋ, ಅಯಿಂಗಡ ಕಾಯಿಲೆ ವಾಸಿ ಆಚಿ.
Currently Selected:
ಮಾರ್ಕ 6: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
